62 ಸಾವಿರ ಪಿಂಚಣಿದಾರರ ಮೇಲೆ ಸಂಶಯ..!

ರಾಜ್ಯ ಸರ್ಕಾರದಿಂದ ಪಿಂಚಣಿ ಯೋಜನೆ ಲಾನುಭವಿಗಳ ಪರಿಶೀಲನೆ ಮತ್ತು ಅನರ್ಹರ ಪತ್ತೆ ಕಾರ್ಯ ನಡೆಯುತ್ತಿದೆ. ಇದಕ್ಕಾಗಿ ಸಂಯೋಜನೆ ಆ್ಯಪ್ ಮೂಲಕ ಮನೆ ಮನೆ ಸರ್ವೆ ಮಾಡಿ ಪಿಂಚಣಿದಾರರ ದಾಖಲಾತಿ ಪರಿಶೀಲಿಸಿ ಸಂಶಯಾಸ್ಪದ ಅನರ್ಹರನ್ನು ಪಟ್ಟಿ ಮಾಡುತ್ತಿದ್ದು, ಪ್ರಸ್ತುತ ಜಿಲ್ಲೆಯಲ್ಲಿ ಈ ರೀತಿಯ 62,235 ಲಾನುಭವಿಗಳು ಸಿಕ್ಕಿದ್ದಾರೆ.

ಸರ್ವೆಗೂ ಮೊದಲು ಜಿಲ್ಲೆಯಲ್ಲಿ ಸಾಮಾಜಿಕ ಭದ್ರತೆ ಮತ್ತು ಪಿಂಚಣಿ ವ್ಯವಸ್ಥೆಯಡಿ ಒಟ್ಟು 1,75,544 ಲಾನುಭವಿಗಳು ಪಿಂಚಣಿ ಪಡೆಯುತ್ತಿದ್ದರು. 60-64 ವರ್ಷದೊಳಗಿನ ವೃದ್ಧರಿಗೆ ಪ್ರತಿ ತಿಂಗಳು 600 ರೂ., 65 ವರ್ಷ ಮೇಲ್ಪಟ್ಟವರಿಗೆ 1200 ರೂ. ವೃದ್ಧಾಪ್ಯ ವೇತನ ದೊರೆಯುತ್ತದೆ. ಈ ಯೋಜನೆಯಡಿ 109463 ವೃದ್ಧರು ಪಿಂಚಣಿ ಪಡೆಯುತ್ತಿದ್ದರು. ಗಂಡ ಮೃತಪಟ್ಟ ಮಹಿಳೆಯರಿಗೆ ಪ್ರತಿ ತಿಂಗಳು 800 ರೂ. ವಿಧವಾ ವೇತನ ಸಿಗುತ್ತದೆ. ಇದನ್ನು 40,272 ಲಾನುಭವಿಗಳು ಪಡೆದುಕೊಳ್ಳುತ್ತಿದ್ದರು. ದೈಹಿಕ ನ್ಯೂನ್ಯತೆ ಶೇ.75ರಷ್ಟಿದ್ದರೆ 800 ರೂ., ಶೇ.75ಕ್ಕಿಂತಲೂ ಹೆಚ್ಚಿದ್ದರೆ 1400 ರೂ., ಬುದ್ಧಿಮಾಂದ್ಯರಾಗಿದ್ದರೆ 2000 ರೂ. ಅಂಗವಿಕಲರ ವೇತನ ದೊರೆಯುತ್ತದೆ. ಇದನ್ನು 20560 ಅಂಗವಿಕಲರು ತೆಗೆದುಕೊಳ್ಳುತ್ತಿದ್ದರು. 65 ವರ್ಷ ಮೇಲ್ಪಟ್ಟ ಹಿರಿಯ ನಾಗರಿಕರಿಗೆ ಸಂಧ್ಯಾ ಸುರಕ್ಷಾ ಯೋಜನೆಯಡಿ 1200 ರೂ. ದೊರೆಯುತ್ತದೆ. ಇದನ್ನು 32,354 ಲಾನುಭವಿಗಳು ಪಡೆದುಕೊಳ್ಳುತ್ತಿದ್ದರು. ಅವಿವಾಹಿತ ಮತ್ತು ವಿಚ್ಛೇದಿತ ಮಹಿಳೆಯರಿಗೆ ಮನಸ್ವಿನಿ ಯೋಜನೆಯಡಿ ಪ್ರತಿ ತಿಂಗಳು 800 ರೂ.ಪಿಂಚಣಿ ದೊರೆಯುತ್ತದೆ. ಈ ಸೌಲಭ್ಯಕ್ಕೆ 8777 ಮಹಿಳೆಯರು ಲಾನುಭವಿಗಳಿದ್ದರು. ಲಿಂಗತ್ವ ಅಲ್ಪಸಂಖ್ಯಾತರಿಗೆ ಮೈತ್ರಿ ಯೋಜನೆಯಡಿ ಪ್ರತಿ ತಿಂಗಳು 1400 ರೂ.ಗಳು ಸಿಗುತ್ತದೆ. ಇದನ್ನು 88 ಲಿಂಗತ್ವ ಅಲ್ಪಸಂಖ್ಯಾತರು ತೆಗೆದುಕೊಳ್ಳುತ್ತಿದ್ದರು. ಆತ್ಮಹತ್ಯೆಗೆ ಶರಣಾದ ರೈತರ ಪತ್ನಿಯರಿಗೆ ರೈತ ವಿಧವಾ ವೇತನ 2000 ರೂ.ಗಳನ್ನು ನೀಡಲಾಗುತ್ತದೆ. ಇದನ್ನು 30 ಮಹಿಳೆಯರು ಪಡೆದುಕೊಳ್ಳುತ್ತಿದ್ದರು. ಆದರೆ ಈಗ ಇವರಲ್ಲಿ 62235 ಸಂಶಯಾಸ್ಪದ ಅನರ್ಹರಿಗೆ ಪಿಂಚಣಿ ಸ್ಥಗಿತಗೊಂಡಿದೆ. ಉಳಿದ 1,13,309 ಲಾನುಭವಿಗಳಿಗೆ ಮಾತ್ರ ಪಿಂಚಣಿ ದೊರೆಯುತ್ತಿದೆ.

ಈಗಾಗಲೇ ಪಿಂಚಣಿ ಪಡೆಯುತ್ತಿದ್ದವರ ಮೇಲೆ ಸಂಶಯ ವ್ಯಕ್ತಪಡಿಸಲು ಕೆಲವು ಕಾರಣಗಳು ಇವೆ. ನಿಗದಿಗಿಂತ ಕಡಿಮೆ ವಯಸ್ಸಿನವರು, ವಾರ್ಷಿಕ ಆದಾಯ ಅಧಿಕವಿರುವವರು, ಆದಾಯ ತೆರಿಗೆ ಪಾವತಿ ಮಾಡುತ್ತಿರುವವರು, ಎಪಿಎಲ್ ಕಾರ್ಡ್ ಹೊಂದಿರುವವರು ಎಂದು ಕಾರಣಕ್ಕೆ ಲಾನುಭವಿಗಳನ್ನು ಸಂಶಯಾಸ್ಪದ ಪ್ರಕರಣಕ್ಕೆ ಸೇರಿಸಲಾಗಿದೆ. ಈ ರೀತಿ ಜಿಲ್ಲೆಯಲ್ಲಿ ಒಟ್ಟು 62,235 ಲಾನುಭವಿಗಳು ಇಕ್ಕಟ್ಟಿಗೆ ಸಿಲುಕಿದ್ದಾರೆ. ಚಾಮರಾಜನಗರ ತಾಲೂಕಿನಲ್ಲಿ 23658, ಗುಂಡ್ಲುಪೇಟೆ ತಾಲೂಕಿನಲ್ಲಿ 15626, ಹನೂರು ತಾಲೂಕಿನಲ್ಲಿ 6259, ಕೊಳ್ಳೇಗಾಲ ತಾಲೂಕಿನಲ್ಲಿ 9311, ಯಳಂದೂರು ತಾಲೂಕಿನಲ್ಲಿ 7381 ಲಾನುಭವಿಗಳು ಸಂಶಯಾಸ್ಪದ ಅನರ್ಹರ ಪಟ್ಟಿಗೆ ಸೇರಿಕೊಂಡಿದ್ದಾರೆ. ಇವರಿಗೆ ಕೆಲವು ತಿಂಗಳಿನಿಂದ ಪಿಂಚಣಿ ಬರುತ್ತಿಲ್ಲ ಎಂದು ತಿಳಿದುಬಂದಿದೆ.

ಪಿಂಚಣಿ ಸ್ಥಗಿತಗೊಂಡಿರುವ ಲಾನುಭವಿಗಳು ಜಿಲ್ಲಾಡಳಿತ ಭವನ, ತಾಲೂಕು ಕಚೇರಿಗಳಿಗೆ ಆಗಮಿಸುತ್ತಿದ್ದಾರೆ. ಈ ರೀತಿ ಸರ್ಕಾರಿ ಕಚೇರಿಗೆ ಬರುತ್ತಿರುವವರಲ್ಲಿ ವೃದ್ಧಾಪ್ಯ ವೇತನ ಪಡೆಯುವ ಲಾನುಭವಿಗಳೇ ಹೆಚ್ಚಾಗಿದ್ದಾರೆ. ಬಹುಪಾಲು ವೃದ್ಧರು ಅವಿದ್ಯಾವಂತರಾಗಿದ್ದು, ಇವರಿಗೆ ಯಾವ ಇಲಾಖೆಗೆ ಹೋಗಿ ಕೇಳಬೇಕು, ಯಾರ ಬಳಿ ವಿಚಾರಿಸಬೇಕೆಂದು ಗೊತ್ತಾಗುತ್ತಿಲ್ಲ. ಅನ್ಯರ ಸಹಾಯ ಪಡೆದುಕೊಂಡು ಬಂದು ಅಧಿಕಾರಿಗಳ ಬಳಿ ಕೇಳಿದಾಗ ಯಾವ ಕಾರಣಕ್ಕೆ ಪಿಂಚಣಿ ಸ್ಥಗಿತಗೊಂಡಿದೆ ಎಂದು ಅರಿತುಕೊಳ್ಳುವುದಕ್ಕೂ ತಿಳಿಯುತ್ತಿಲ್ಲ. ಈ ಕುರಿತು ತಾಲೂಕಿನ ಅಮಚವಾಡಿ ಗ್ರಾಮದ ನಿವಾಸಿ ಸಿದ್ದರಾಜನಾಯಕ ಬುಧವಾರ ಜಿಲ್ಲಾಡಳಿತ ಭವನಕ್ಕೆ ತಮ್ಮ ತಂದೆ ಮಹದೇವನಾಯಕಗೆ ವೃದ್ಧಾಪ್ಯ ವೇತನ ಬರುತ್ತಿಲ್ಲ ಎಂದು ವಿಚಾರಿಸಲು ಆಗಮಿಸಿದ್ದರು. ಇವರಿಗೆ ಯಾವ ಕಾರಣಕ್ಕೆ ವೃದ್ಧಾಪ್ಯ ವೇತನ ಬಂದಿಲ್ಲವೆಂದು ಸರಿಯಾಗಿ ಗೊತ್ತಾಗಲಿಲ್ಲ. ಮುಂದಿನ ದಿನಗಳಲ್ಲಿ ಪಿಂಚಣಿ ಬರುತ್ತದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ ಎಂದಷ್ಟೇ ತಿಳಿದುಕೊಂಡು ಹೋದರು.

ನಾನು ಮತ್ತು ನನ್ನ ಪತಿ ವೃದ್ಧಾಪ್ಯ ವೇತನದಲ್ಲೇ ಜೀವನ ನಡೆಸುತ್ತಿದ್ದೇವೆ. ನಮಗೆ ಮೂರು ತಿಂಗಳಿನಿಂದ ಪಿಂಚಣಿ ಬರುತ್ತಿಲ್ಲ. ಕೂಲಿ ಮಾಡಲು ಶಕ್ತಿ ಇಲ್ಲದ ನಮ್ಮ ವಾರ್ಷಿಕ ಆದಾಯ ಹೆಚ್ಚಾಗಿದೆ ಎಂದು ವೃದ್ಧಾಪ್ಯ ವೇತನ ಕೊಡುತ್ತಿಲ್ಲವೆಂದು ಗೊತ್ತಾಯಿತು. ಈಗ ವಾರ್ಷಿಕ ಆದಾಯ ಪ್ರಮಾಣ ಪತ್ರವನ್ನು ಸರಿ ಮಾಡಿಸಲು ಬೇರೆ ಸರ್ಕಾರಿ ಕಚೇರಿಗೆ ಹೋಗಲು ಹೇಳಿದ್ದಾರೆ. ಅಲ್ಲಿಗೆ ಹೋಗಲು ಮತ್ತು ಅಲ್ಲಿ ಹೇಗೆ ದಾಖಲೆಗಳನ್ನು ಮಾಡಿಸಿಕೊಂಡು ಪಿಂಚಣಿ ಮಾಡಿಸಬೇಕೆಂದು ನಮಗೆ ಗೊತ್ತಾಗುತ್ತಿಲ್ಲ. ದಯವಿಟ್ಟು ವೃದ್ಧಾಪ್ಯ ವೇತನ ಬರುವಂತೆ ಮಾಡಿಕೊಡಿ.

ಸಾಮಾಜಿಕ ಭದ್ರತೆ ಮತ್ತು ಪಿಂಚಣಿ ಯೋಜನೆಯ ಲಾನುಭವಿಗಳ ಪರಿಶೀಲನೆ ನಡೆಯುತ್ತಿದೆ. ಸಂಶಯಾಸ್ಪದ ಲಾನುವಿಗಳು ಮತ್ತೆ ಸೂಕ್ತ ದಾಖಲೆಗಳನ್ನು ಕೊಟ್ಟರೆ ಪಿಂಚಣಿ ಮುಂದುವರೆಯಲಿದೆ. ಅನರ್ಹರನ್ನು ಬಿಟ್ಟು ಉಳಿದ ಎಲ್ಲರಿಗೂ ಪಿಂಚಣಿ ಬರುತ್ತಿದೆ.