ಮಹದೇಶ್ವರ ಬೆಟ್ಟದಿಂದ ನಾಗಮಲೆಗೆ ಸುಮಾರು 13 ಕಿ.ಮೀ ದೂರ ಕಾಲ್ನಡಿಗೆಯಲ್ಲಿ ಬರುವ ಭಕ್ತರೇ ಗ್ರಾಮಗಳ ಅಂಗಡಿಗಳಿಗೆ ಗಿರಾಕಿಗಳು. ನೀರು, ಮಜ್ಜಿಗೆ, ಆಹಾರ ಪದಾರ್ಥಗಳನ್ನು ಅಂಗಡಿಗಳಲ್ಲಿ ಮಾರಾಟ ಮಾಡಲಾಗುತ್ತದೆ. ಇದರಿಂದಲೇ ನಡೆಯುತ್ತಿದ್ದ ಜೀವನ ನಿರ್ವಹಣೆ ಮೇಲೆ ಮೇ 10ರಂದು ಬೆಂಗಳೂರಿನ ಬಾಲಕ ಹರ್ಷಿತ್(10) ಮೇಲೆ ನಡೆದ ಚಿರತೆ ದಾಳಿಯ ಘಟನೆ ಹೊಡೆತ ಕೊಟ್ಟಿತು. ಭಕ್ತರ ಪ್ರವೇಶಕ್ಕೆ ನಿರ್ಬಂಧ ವಿಧಿಸಲಾಯಿತು. ಈ ಊರುಗಳಿಗೆ ಮೂಲಸೌಕರ್ಯಗಳನ್ನೇ ಒದಗಿಸಲಾಗದ ರಾಜ್ಯ ಸರ್ಕಾರ ಇಲ್ಲಿನ ಜನರಿಗೆ ಉದ್ಯೋಗ ಸೃಷ್ಟಿಸಲು ವಿಶೇಷ ಯೋಜನೆ ಮತ್ತು ಕಾರ್ಯಕ್ರಮ ರೂಪಿಸಿಲ್ಲ. ಸ್ಥಳೀಯ ಸಂಪನ್ಮೂಲ, ಸ್ಥಳೀಯ ನಿವಾಸಿಗಳ ಪ್ರತಿಭಾ ಕೌಶಲ್ಯವನ್ನು ಗುರುತಿಸಿ, ತರಬೇತಿ ನೀಡಿ ಗ್ರಾಮ ಮಟ್ಟದಲ್ಲೇ ಜೀವನೋಪಾಯಕ್ಕೆ ದಾರಿ ಮಾಡಿಕೊಡದೆ ಶಿವಶರಣ ಅಂಬಿಗರ ಚೌಡಯ್ಯ ಅವರ ‘ಬಡತನಕ್ಕೆ ಉಂಬುವ ಚಿಂತೆ’ ವಚನದಂತೆ ಗ್ರಾಮಸ್ಥರನ್ನು ಚಿಂತೆಗೆ ತಳ್ಳುವಂತೆ ಮಾಡಿದೆ.
