ಹಸು, ದನ, ಕರು,ಕುರಿ, ಕೋಳಿ ಇನ್ನಿತರೆ ಸಾಕುಪ್ರಾಣಿಳಿಗೆ ಚಿಕಿತ್ಸೆ ನೀಡುವುದರೊಂದಿಗೆ ಪಶು ಪಾಲನೆಗೆ ಸಂಬಂಧಿಸಿದ ಸರ್ಕಾರದ ವಿವಿಧ ಸೌಲಭ್ಯಗಳನ್ನು ತಲುಪಿಸುವ ಹೊಣೆಗಾರಿಕೆ ಪಶು ವೈದ್ಯರ ಮೇಲಿದೆ. ಇದರ ನಡುವೆ ಪ್ರಭಾರದ ಜವಾಬ್ದಾರಿ ಹೊರುವುದು ಕಾರ್ಯಭಾರದ ಒತ್ತಡದೊಂದಿಗೆ ಅಸಹಾಯಕ ಪರಿಸ್ಥಿತಿಗೆ ತಂದು ನಿಲ್ಲಿಸುತ್ತಿದೆ. ಊರಿನ ಯಾವುದೋ ಮೂಲೆಯಲ್ಲಿ ಹಸು ಸತ್ತು ಬಿದ್ದರೆ ಅದರ ಮರಣೋತ್ತರ ಪರೀಕ್ಷೆ ನಡೆಸಲು ಅಲ್ಲಿಗೆ ಹೋಗಬೇಕು. ಅದೇ ಸಂದರ್ಭದಲ್ಲಿ ಮತ್ತೊಂದು ಕಡೆ ದನಗಳಿಗೆ ಕಾಯಿಲೆ ಬಂದಿದ್ದರೆ ಚಿಕಿತ್ಸೆ ಕೊಡಲು ಓಡೋಡಿ ಬರಬೇಕಾಗಿದೆ. ಸಕಾಲಕ್ಕೆ ಚಿಕಿತ್ಸೆ ಸಿಗುತ್ತಿಲ್ಲವೆಂದು ರೈತರು ವ್ಯಕ್ತಪಡಿಸುವ ಆಕ್ರೋಶದ ಮುಂದೆ ವೈದ್ಯರು ಅಸಹಾಯಕರಾಗಿ ನಿಲ್ಲಬೇಕಾಗುತ್ತಿದೆ.
