ರೈತರಿಗೆ ಸಂಕಷ್ಟ ತಂದೊಡ್ಡಿದ ಮಳೆ

ತಾಲೂಕಿನಲ್ಲಿ ಮಳೆಯಿಲ್ಲದ ಪರಿಣಾಮ ಅಂತರ್ಜಲ ಮಟ್ಟ ಕುಸಿದಿತ್ತಾದರೂ ರೈತರು ಕೈಕಟ್ಟಿ ಕೂತಿಲ್ಲ. ನೀರಾವರಿ ಸೌಕರ್ಯವನ್ನು ಹೊಂದಿರುವ ಜಮೀನುಗಳಲ್ಲಿ ಪಂಪ್‌ಸೆಟ್‌ನಿಂದ ದೊರಕುವ ಅಲ್ಪ ಪ್ರಮಾಣದ ನೀರಿನಲ್ಲಿ ಕೃಷಿ ಮಾಡುತ್ತಿದ್ದಾರೆ. ಇದೇ ರೀತಿಯಲ್ಲಿ ತಾಲೂಕಿನ ಕಾಡಂಚಿನ ಗ್ರಾಮ ಮಿಣ್ಯಂನಲ್ಲೂ ರೈತರು ವ್ಯವಸಾಯದಲ್ಲಿ ತೊಡಗಿದ್ದು, ಕಾಡು ಪ್ರಾಣಿಗಳ ಹಾವಳಿಯ ನಡುವೆಯೂ ಹೆಚ್ಚಿನ ಇಳುವರಿಯತ್ತ ಮುಖ ಮಾಡದೆ ಖರ್ಚಿಗಾದರೂ ಫಸಲು ಕೈಗೂಡಲಿ ಎಂದು ಹೆಚ್ಚಿನ ರೈತರು ಬಾಳೆ ಬೆಳೆದಿದ್ದರು. ಕೆಲ ಜಮೀನುಗಳಲ್ಲಿ ಗೋನೆ ಬಿಟ್ಟಿದ್ದರೆ, ಇನ್ನೂ ಕೆಲವು ಜಮೀನುಗಳಲ್ಲಿ ಫಲ ಬಿಡುವ ಹಂತದಲ್ಲಿತ್ತು. ಇದರಿಂದ ರೈತರು ಆಶಾಭಾವನೆ ಹೊಂದಿದ್ದರು. ಆದರೆ ಬಿರುಗಾಳಿ ಸಹಿತ ಮಳೆಗೆ ಬಾಳೆ ಫಸಲು ಸಂಪೂರ್ಣ ನೆಲಕ್ಕುರುಳಿದ್ದು, ರೈತರ ಕನಸ್ಸನ್ನು ನುಚ್ಚುನೂರು ಮಾಡಿದೆ. ಇದರಿಂದ ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದೆ. ಇದು ರೈತರನ್ನು ಚಿಂತೆಗೀಡು ಮಾಡಿದ್ದು, ಸಾಲ ಮಾಡಿ ಫಸಲನ್ನು ಬೆಳೆದ ರೈತರನ್ನು ಸಂಕಷ್ಟಕ್ಕೆ ದೂಡುವಂತೆ ಮಾಡಿದೆ.

ಮಿಣ್ಯಂ ಕಂದಾಯ ಗ್ರಾಮಕ್ಕೆ ಸೇರಿದ ಗಾಜನೂರು, ಕೊಪ್ಪ ಹಾಗೂ ಮಿಣ್ಯಂ ಭಾಗದ ಸುಮಾರು 30ಕ್ಕೂ ಹೆಚ್ಚು ಎಕರೆಯಲ್ಲಿ ಬೆಳೆದಿದ್ದ ಬಾಳೆ ಫಸಲು ಗಾಳಿ, ಮಳೆಯಿಂದಾಗಿ ನೆಲಕ್ಕುರುಳಿದೆ. ಇದರಲ್ಲಿ ಮುನಿಯಪ್ಪ, ಮಹಾದೇವ ಅವರಿಗೆ ಸೇರಿದ ತಲಾ ಒಂದು ಎಕರೆ, ನಾಗರಾಜು ಅವರಿಗೆ ಸೇರಿದ ಒಂದೂವರೆ ಎಕರೆ, ಇದಿಯಮ್ಮ ಅವರಿಗೆ ಸೇರಿದ 2 ಸಾವಿರ ಬಾಳೆ ಗಿಡಿಗಳು, ಬಸವೇಗೌಡ ಅವರ ಜಮೀನಿನಲ್ಲಿ 1,200 ಗಿಡಗಳು, ವೀರಭದ್ರೇಗೌಡ, ಚಿನ್ನಮ್ಮ, ಅವರ ಜಮೀನಿನಲ್ಲಿ ತಲಾ 1,300 ಗಿಡಗಳು, ದೊಡ್ಡಯ್ಯ ಅವರ ಜಮೀನಿನಲ್ಲಿ 800, ಪುಟ್ಟಸ್ವಾಮಿ ಅವರ ಜಮೀನಿನಲ್ಲಿ 700 ಗಿಡಗಳು, ಬಸವಣ್ಣ, ಮಣಿ ಅವರ ಜಮೀನಿನಲ್ಲಿ ತಲಾ 400 ಗಿಡ, ಶಿವರಾಜು, ಗೋವಿಂದೇಗೌಡ, ರಮೇಶ್, ಮಾದೇಶ್, ಶಾಂತಮ್ಮ, ಮುರುಗ ಹಾಗೂ ಇತರ ರೈತರ ಜಮೀನುಗಳಲ್ಲಿ ನೂರಾರು ಬಾಳೆ ಗಿಡಗಳು ನೆಲ್ಲಕುರುಳಿದೆ. ಹಾಗೆಯೇ ಸಿದ್ದಯ್ಯ ಅವರ ಜಮೀನಿನಲ್ಲಿ ಟೊಮಾಟೋ ಫಸಲು ನಾಶವಾಗಿದೆ.

ಕೃಷಿ ಬಿಟ್ಟರೆ ಬೇರೆ ಉದ್ಯೋಗದ ಮೂಲವಿಲ್ಲಹನೂರು ಕೃಷಿ ಅವಲಂಬಿತ ಪ್ರದೇಶ. ಇಲ್ಲಿ ಕೃಷಿ ಬಿಟ್ಟರೆ ಬೇರೆ ಉದ್ಯೋಗದ ಮೂಲವಿಲ್ಲ. ಹಾಗಾಗಿ ಹೆಚ್ಚಿನ ರೈತರು ಕೃಷಿ ಹಾಗೂ ಹೈನುಗಾರಿಕೆ ಅವಲಂಬಿಸಿದ್ದಾರೆ. ಆದರೆ ಈ ಬಾರಿ ಮಳೆ ಕೊರತೆಯಿಂದಾಗಿ ಕೆರೆ-ಕಟ್ಟೆ ಹಾಗೂ ಹಳ್ಳಕೊಳ್ಳಗಳೆಲ್ಲವೂ ಬತ್ತಿ ಹೋಗಿದೆ. ಜಲಾಶಯಗಳಲ್ಲಿ ದಿನದಿಂದ ದಿನಕ್ಕೆ ನೀರಿನ ಪ್ರಮಾಣ ಕ್ಷೀಣಿಸುತ್ತಿದ್ದು, ಅಂತರ್ಜಲ ಮಟ್ಟ ತೀವ್ರ ಕುಸಿದಿದ್ದು, ಕೃಷಿಗೆ ತೀವ್ರ ಹಿನ್ನಡೆಯಾಗಿದೆ. ಇತ್ತ ಜಿಲ್ಲೆಯಲ್ಲಿಯೇ ಹನೂರು ತಾಲೂಕಿನಲ್ಲಿ ಹೆಚ್ಚು ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ತಲೆದೂರಿದ್ದು, 62 ಗ್ರಾಮಗಳಲ್ಲಿ ಕುಡಿವ ನೀರಿನ ಸಮಸ್ಯೆ ಇದೆ. ಇದರಿಂದ ರೈತರು ಕೃಷಿಗಾಗಿ ಹಾಗೂ ಜನ ಸಾಮಾನ್ಯರು ಕುಡಿವ ನೀರಿಗಾಗಿ ಪರತಪಿಸುತ್ತಿದ್ದಾರೆ. ಈತನ್ಮಧ್ಯೆ ಕಳೆದ 15 ದಿನಗಳಿಂದ ಸೂರ್ಯನ ಪ್ರಖರತೆಯ ಬಿಸಿಲಿನ ಬೇಗೆ ಹೆಚ್ಚಾಗಿದ್ದು, ಜನರು ಹೈರಾಣರಾಗಿದ್ದಾರೆ. ಹಾಗಾಗಿ ರೈತರು ಹಾಗೂ ಜನ ಸಾಮಾನ್ಯರೆಲ್ಲರೂ ಮಳೆ ಬರಲಿ ಎಂದು ಬೇಡಿಕೊಳ್ಳುತ್ತಿದ್ದರು. ಇತ್ತ ಕೆಂಪಯ್ಯನಹಟ್ಟಿ ಸೇರಿದಂತೆ ಕೆಲವು ಗ್ರಾಮಸ್ಥರು ಮಳೆಗಾಗಿ ವಿಶೇಷ ಪ್ರಾರ್ಥನೆ ಸಲ್ಲಿಸಿದ್ದಾರೆ. ಹಾಗಾಗಿ ತಾಲೂಕಿಗೆ ಮಳೆಯ ಅವಶ್ಯಕತೆ ಇತ್ತು. ಕಳೆದ 2 ದಿನ ಹಿಂದೆ ಹನೂರು ಪಟ್ಟಣ ಸೇರಿದಂತೆ ಕಣ್ಣೂರು, ಮಂಗಲ, ಗುಂಡಾಪುರ, ಬೂದುಬಾಳು, ಚಂಗವಾಡಿ, ಕೌದಳ್ಳಿ ಹಾಗೂ ಇನ್ನಿತರೆ ಗ್ರಾಮಗಳಲ್ಲಿ ಸಾಧಾರಣಾ ಪ್ರಮಾಣದಲ್ಲಿ ಮಳೆಯಾಗಿತ್ತು. ಇದರಿಂದ ಬಿಸಿಲಿನಿಂದ ಬಸವಳಿದಿದ್ದ ಜನತೆಗೆ ಮಳೆರಾಯನಿಂದ ತಂಪು ಅನುಭವ ನೀಡಿತ್ತು. ಇನ್ನು ಹೆಚ್ಚು ಮಳೆಯಾಗಲಿ ಎಂದು ಜನರ ಆಶಯವಾಗಿತ್ತು. ಹೀಗಿರುವಾಗ ಗುರುವಾರ ಸಂಜೆ ಮಿಣ್ಯಂ ಭಾಗದಲ್ಲಿ ಸುರಿದ ಬಿರುಗಾಳಿ ಸಹಿತ ಮಳೆಗೆ ವಿವಿಧ ಜಮೀನುಗಳಲ್ಲಿ ಬೆಳೆದಿದ್ದ ಬಾಳೆ ಫಸಲು ಸಂಪೂರ್ಣ ನೆಲಕ್ಕುರುಳಿದ್ದು, ರೈತರ ಜೀವನದ ಮೇಲೆ ಬರಸಿಡಿಲು ಬಡಿದಂತಾಗಿದೆ. ಜತೆಗೆ ಆರ್ಥಿಕವಾಗಿ ಹೊಡೆತ ಕೊಟ್ಟಂತಾಗಿದೆ. ಇದರಿಂದ ರೈತರು ತಲೆ ಮೇಲೆ ಕೈಹೊತ್ತು ಕೂರುವಂತಹ ಪರಿಸ್ಥಿತಿ ತಂದೊಡ್ಡಿರುವುದು ನಿಜಕ್ಕೂ ವಿಪರ್ಯಾಸ.