ಅರಣ್ಯ ಸಂರಕ್ಷಣೆಗೆ ಪೂರಕವಾಗಿ ಮರಗಳನ್ನು ಬೆಳೆಸಿ

ಪಟ್ಟಣದ ಜೆಎಸ್‌ಎಸ್ ಕಾಲೇಜಿನಲ್ಲಿ ಅರಣ್ಯ ಇಲಾಖೆ ವತಿಯಿಂದ ಆಯೋಜಿಸಿದ್ದ ವಿಶ್ವ ಆನೆ ದಿನಾಚರಣೆ ಕಾರ್ಯಕ್ರಮದಲ್ಲಿ ಪೋಸ್ಟರ್ ಬಿಡುಗಡೆ ಮಾಡಿ ಮಾತನಾಡಿದರು. ಬಂಡೀಪುರ 1200ಕ್ಕೂ ಹೆಚ್ಚಿನ ಆನೆಗಳಿಗೆ ಆಶ್ರಯತಾಣವಾಗಿದೆ. ಆನೆಗಳು ಕಾಡಿನಿಂದ ಹೊರಬರದಂತೆ ತಡೆಯಲು ಸೋಲಾರ್ ಬೇಲಿ, ಕಂದಕ ಹಾಗೂ ರೈಲ್ವೆ ಕಂಬಿಗಳನ್ನು ಅಳವಡಿಸಲಾಗಿದ್ದರೂ ಅಲ್ಲಲ್ಲಿ ಅವು ಅದನ್ನು ದಾಟಿಬರುತ್ತಿವೆ. ಆನೆಗಳು ಏಕೆ ಹೊರಬರುತ್ತಿವೆ ಎಂಬುದನ್ನು ಅಧ್ಯಯನ ಮಾಡಬೇಕಾಗಿದೆ ಎಂದರು.

ಅರಣ್ಯ ನಾಶದಿಂದ ಆನೆಗಳು ಹೊರಬರುತ್ತಿವೆ. ಅವು ಗ್ರಾಮಗಳತ್ತ ಬಂದಾಗ ಗಲಾಟೆ ಮಾಡದೆ ಸುಮ್ಮನಿದ್ದರೆ ಅವು ತಮ್ಮಷ್ಟಕ್ಕೆ ತಾವೇ ಹಿಂದಿರುಗುತ್ತವೆ. ಆನೆಗಳು ನೆಲೆಸಲು ಪ್ರತಿಯೊಬ್ಬರೂ ಅರಣ್ಯ ಸಂರಕ್ಷಣೆಗೆ ಪೂರಕವಾಗಿ ಮರಗಳನ್ನು ಬೆಳೆಸಬೇಕು. ಮುಂದಿನ ಜನಾಂಗಕ್ಕೆ ಅರಣ್ಯ ಮತ್ತು ವನ್ಯಜೀವಿಗಳನ್ನು ಉಳಿಸಬೇಕಾಗಿದೆ ಎಂದು ಹೇಳಿದರು.

ಬಂಡೀಪುರದ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಶುಭಂಸಿಂಗ್ ತನ್ವರ್ ಮಾತನಾಡಿ, ಸರ್ಕಾರ ಮತ್ತು ಅರಣ್ಯ ಇಲಾಖೆ ಅರಣ್ಯ ಮತ್ತು ವನ್ಯಜೀವಿಗಳ ಸಂರಕ್ಷಣೆಗೆ ಆದ್ಯತೆ ನೀಡಿರುವುದರ ಜತೆಗೆ ಸ್ಥಳೀಯರ ಸಹಕಾರದಿಂದ ಬಂಡೀಪುರ ವನ್ಯಜೀವಿಗಳ ಸುಂದರ ತಾಣವಾಗಿದೆ. ಹುಲಿ, ಆನೆಗಳ ಸಂತತಿ ಹೆಚ್ಚಲು ಸ್ಥಳೀಯ ಹಾಗೂ ಸಮುದಾಯಗಳ ನೆರವಿನಿಂದ ಸಾಧ್ಯವಾಗಿದೆ. ಇದನ್ನು ಮುಂದಿನ ಜನಾಂಗಕ್ಕೆ ತಲುಪಿಸಲು ವಿದ್ಯಾರ್ಥಿಗಳ ಸಹಯೋಗ ಪಡೆದುಕೊಳ್ಳಲಾಗುತ್ತಿದೆ ಎಂದು ಹೇಳಿದರು.

ಗುಂಡ್ಲುಪೇಟೆ ಉಪವಿಭಾಗದ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಕೆ.ಸುರೇಶ್ ಮಾತನಾಡಿ, ಹಿಂದೆ ವ್ಯಾಪಕವಾಗಿದ್ದ ಕಳ್ಳಬೇಟೆಯನ್ನು ಸಂಪೂರ್ಣ ತಡೆಗಟ್ಟಿದ ಪರಿಣಾಮ ಅರಣ್ಯದಲ್ಲಿ ಆನೆಗಳ ಸಂತತಿ ಹೆಚ್ಚಿದೆ. ಇದರಿಂದ ಕಾಡಂಚಿನ ಗ್ರಾಮಗಳಲ್ಲಿ ಮಾನವ ಆನೆ ಸಂಘರ್ಷ ಹೆಚ್ಚಾಗುತ್ತಿದ್ದು ನಾನಾ ಕ್ರಮಗಳನ್ನು ಕೈಗೊಂಡರೂ ಆಗಾಗ ಅವು ಕಾಡಿನಿಂದ ಹೊರಬರುತ್ತಿವೆ. ನೀಲಗಿರಿ ಜೀವವೈವಿಧ್ಯ ತಾಣವಾದ ಬಂಡೀಪುರದಲ್ಲಿ 1200 ಆನೆಗಳಿವೆ. ಅರಣ್ಯ ಇಲಾಖೆ ಬೆಳೆನಷ್ಟಕ್ಕೆ ಪರಿಹಾರ ಕೊಡುವ ಮೂಲಕ ರೈತರಿಗಾದ ನಷ್ಟವನ್ನು ತುಂಬಿಕೊಡುತ್ತಿದೆ. ಮುಂದಿನ ದಿನಗಳಲ್ಲಿ ಆನೆಗಳೊಂದಿಗೆ ಸಹಬಾಳ್ವೆ ಅಗತ್ಯವಾಗಲಿದೆ ಎಂದು ಹೇಳಿದರು.

ಚಿತ್ರಕಲೆ, ಪ್ರಬಂಧ ಸ್ಪರ್ಧೆಗಳಲ್ಲಿ ವಿಜೇತರಾದವರು ಹಾಗೂ ಛಾಯಾಚಿತ್ರ ಸ್ಪರ್ಧೆಗಳಲ್ಲಿ ಜಯಗಳಿಸಿದವರಿಗೆ ಬಹುಮಾನ ಮತ್ತು ಪ್ರಮಾಣಪತ್ರಗಳನ್ನು ವಿತರಣೆ ಮಾಡಲಾಯಿತು. ಆನೆಕಾವಲಿಗೆ ಶ್ರಮಿಸಿದ ಸಿಬ್ಬಂದಿಯನ್ನೂ ಗೌರವಿಸಲಾಯಿತು. ಕಾರ್ಯಕ್ರಮದಲ್ಲಿ ಹೆಡಿಯಾಲ ಉಪವಿಭಾಗದ ಎಸಿಎಫ್ ಪರಮೇಶ್, ಗೋಪಾಲಸ್ವಾಮಿಬೆಟ್ಟ ವಲಯದ ಆರ್‌ಎಫ್‌ಒ ಸತೀಶ್ ಕುಮಾರ್, ಬಂಡೀಪುರದ ಮೋಹನ್ ಕುಮಾರ್, ಮದ್ದೂರಿನ ಶೈಲೇಂದ್ರಕುಮಾರ್, ನಿಸಾರ್ ಅಹಮದ್, ಶಿವಕುಮಾರ್, ಮಾಜಿ ವೈಲ್ಡ್‌ಲೈಫ್ ವಾರ್ಡನ್ ಮಲ್ಲೇಶಪ್ಪ, ಚಾಮುಲ್ ನಿರ್ದೇಶಕ ನಂಜುಂಡಪ್ರಸಾದ್, ಕಾಲೇಜಿನ ಪ್ರಾಂಶುಪಾಲೆ ಡಾ.ಮಹದೇವಮ್ಮ ಹಲವರು ಇದ್ದರು.

ವಿಶ್ವ ಆನೆ ದಿನಾಚರಣೆ ಅಂಗವಾಗಿ ಅರಣ್ಯ ಇಲಾಖೆ ಕಾಲೇಜಿನ ಹೊರಗೆ ನಿಲ್ಲಿಸಿದ್ದ ಸೆಲ್ಫಿ ಬೋರ್ಡ್ ಎಲ್ಲರ ಆಕರ್ಷಣೆಯ ಕೇಂದ್ರವಾಗಿತ್ತು. ಶಾಸಕ ಗಣೇಶ್ ಪ್ರಸಾದ್ ಸೇರಿದಂತೆ ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಎಲ್ಲ ಗಣ್ಯರು ಅಲ್ಲಿ ನಿಂತು ಫೋಟೋ ತೆಗೆಸಿಕೊಳ್ಳುವ ಮೂಲಕ ಸಂಭ್ರಮಿಸಿದರು.