ಚಿಕ್ಕಲ್ಲೂರು ಜಾತ್ರೆಯಲ್ಲಿ ಪಂಕ್ತಿ ಸೇವೆ

ಕೊಳ್ಳೇಗಾಲ ತಾಲೂಕಿನ ಶ್ರೀ ಕ್ಷೇತ್ರ ಚಿಕ್ಕಲ್ಲೂರು ಸಿದ್ದಪ್ಪಾಜಿ ಜಾತ್ರೆಯ ನಾಲ್ಕನೇ ದಿನದ ಪಂಕ್ತಿ ಸೇವೆಯನ್ನು ಭಕ್ತಿ-ಭಾವದಿಂದ ನೀಲಗಾರರ ಒಕ್ಕಲಿನ ಭಕ್ತರು ಆಚರಣೆ ಮಾಡಿದರು. ದೇವಾಲಯ ದೂರದ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಬಿಡಾರ ಹೂಡಿದ್ದರು. ಮಕ್ಕಳು, ಮಹಿಳೆಯರು ಕುಟುಂಬ ಸಮೇತರಾಗಿ ಬಾಡೂಟ ಸವಿದರು. ಪಾರಂಪರಿಕ ಸಂಪ್ರದಾಯ ಮೆರೆದರು. ದೇವರ ಸೇವೆಗೆ ಬಂದವರನ್ನು ಕೂರಿಸಿ ಬಾಡೂಟ ಉಣ ಬಡಿಸಿ ಆಥಿತ್ಯ ನೀಡಿದರು.

ಜಾತ್ರಾಮಾಳ ಭಕ್ತರಿಂದ ತುಂಬಿ ತುಳುಕುತ್ತಿತ್ತು. ಅಲ್ಲಲ್ಲಿ ತಂಬೂರಿ ಕಲಾವಿದ ತಂಡಗಳು ಪವಾಡ ಪುರುಷ ಘನನೀಲಿ ಶ್ರೀ ಸಿದ್ದಪ್ಪಾಜಿ ಗೀತೆಗಳನ್ನು ಹಾಡಿ ಕೊಂಡಾಡಿದರು. ಹೆಜ್ಜೆ ಹೆಜ್ಜೆಗೂ ನೀಲಗಾರರು ಜಾಗಟೆ, ಬೆತ್ತ ಹಿಡಿದು ಸಾಗುತ್ತಿದ್ದರು, ಶ್ರದ್ಧಾಭಕ್ತಿಯಿಂದ ಉರುಳು ಸೇವೆ ಮಾಡುತ್ತಿದ್ದರು. ಶ್ರೀ ಸಿದ್ದಪ್ಪಾಜಿ ಗದ್ದುಗೆ ಮುಂಭಾಗ ಧೂಪದ ಹೊಂಡದಲ್ಲಿ ಕರ್ಪೂರ, ಧೂಪ ಹಚ್ಚಿ ಇಷ್ಟಾರ್ಥ ನೆರವೇರಿಸುವಂತೆ ಬೇಡುತ್ತಿದ್ದರು.

ತಿಂಡಿ-ತಿನಿಸು, ವಸ್ತುಗಳ ಖರೀದಿ ಜೋರಾಗಿತ್ತು. ಅಪ್ಪನ ಕೈ ಹಿಡಿದು ಜಾತ್ರೆಯಲ್ಲಿ ಕಂಡದ್ದನು ತೆಗೆಸಿಕೊಂಡ ಮಕ್ಕಳ ಖುಷಿಗೆ ಪಾರವೇ ಇರಲಿಲ್ಲ. ಮಕ್ಕಳು, ಯುವಕರು, ಯುವತಿಯರು ಜಾತ್ರೆಯಲ್ಲಿದ್ದ ಮನರಂಜನೆ ಆಟವನ್ನಾಡಿ ಸಂಭ್ರಮಿಸಿದರು. ಹೊಟ್ಟೆ ಪಾಡಿಗಾಗಿ ಹಗ್ಗದ ಮೇಲೆ ಪಾದವಿಟ್ಟು ಭಕ್ತರಿಂದ ಕಾಣಿಕೆ ಪಡೆಯಲು ಸರ್ಕಸ್ ಮಾಡುತ್ತಿದ್ದ ಬಾಲಕಿ ಬದುಕಿನ ವೈರುಧ್ಯಗಳ ದರ್ಶನವೂ ಆಯಿತು.