ಬೆಟ್ಟದ ಕಾಡಿನಲ್ಲಿ ತ್ಯಾಜ್ಯ ತೆರವುಗೊಳಿಸುತ್ತಿರುವ ಸಂಘ-ಸಂಸ್ಥೆಗಳು

ಗುಂಡ್ಲುಪೇಟೆಯ ಹಿಮಗಿರಿ ವನ್ಯಜೀವಿ ಸಂರಕ್ಷಣಾ ಸಂಸ್ಥೆ, ಬೆಂಗಳೂರಿನ ಮಹಾವೀರ್ ಎನರ್ಜಿ ಹಬ್ ಪ್ರೈವೇಟ್ ಲಿಮಿಟೆಡ್, ಅಡವಿ ಅಲರ್ಟ್ ಫೌಂಡೇಷನ್ ಗ್ರಾಮ ಪಂಚಾಯಿತಿಯ ಸಹಕಾರ ಪಡೆದುಕೊಂಡು ಕಸದಲ್ಲಿ ಕಾಡಾನೆ ಆಹಾರ ಹುಡುಕುತ್ತಿದ್ದ ಸ್ಥಳದಲ್ಲಿ ಮಂಗಳವಾರದಿಂದ ತ್ಯಾಜ್ಯ ತೆರವು ಮಾಡಲಾಗುತ್ತಿದೆ.

ಅಧಿಕ ಪ್ರಮಾಣದಲ್ಲಿದ್ದ ತ್ಯಾಜ್ಯವನ್ನು ಸ್ವಯಂ ಸೇವಕರು ಸಂಗ್ರಹಿಸಲು ಕಷ್ಟಸಾಧ್ಯವಿರುವ ಹಿನ್ನೆಲೆಯಲ್ಲಿ ಇದಕ್ಕಾಗಿ 1 ವಾಟರ್ ಟ್ಯಾಂಕರ್, 1 ಜೆ.ಸಿ.ಬಿ, 2 ಟಿಪ್ಪರ್ ಮತ್ತು 2 ಟ್ರ್ಯಾಕ್ಟರ್‌ಗಳನ್ನು ಬಳಸಲಾಗುತ್ತಿದೆ. ವಾಹನಗಳ ಮೂಲಕ ರಾಡಿಯಾಗಿ ಹರಡಿದ್ದ ಕಸವನ್ನು ಒಂದೆಡೆಗೆ ಸಂಗ್ರಹ ಮಾಡಲಾಗುತ್ತಿದ್ದು, ಈ ಕಾರ್ಯದ ಎರಡನೇ ದಿನವಾದ ಬುಧವಾರವೂ ಕಸ ಸಂಗ್ರಹಣೆ ಮುಂದುವರೆಯಿತು. ತ್ಯಾಜ್ಯವನ್ನು ಸಂಪೂರ್ಣವಾಗಿ ತೆರವುಗೊಳಿಸಲು ಇನ್ನೂ ಕೆಲವು ದಿನಗಳು ಹಿಡಿಯಬಹುದಾಗಿದ್ದು, ಎಷ್ಟು ದಿನಗಳಾದರೂ ಶ್ರಮದಾನ ಮಾಡಲು ಮೂರು ಸಂಸ್ಥೆಗಳು ಸಿದ್ಧವಿವೆ.

ಕೆಲವು ದಿನಗಳ ಹಿಂದೆ ಅರಣ್ಯದೊಳಗೆ ಬಿದ್ದಿದ್ದ ತ್ಯಾಜ್ಯ ರಾಶಿಯ ನಡುವೆ ಕಾಡಾನೊಂದು ಆಹಾರ ಹುಡುಕುತ್ತಿದ್ದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು. ಈ ಸ್ಥಳ ಯಾವುದು ಎಂಬ ಹುಡುಕಾಟವನ್ನು ಪ್ರಾಣಿಪ್ರಿಯರು ನಡೆಸಿದ್ದರು. ಆಗ ಇದು ಮಲೆ ಮಹದೇಶ್ವರ ಬೆಟ್ಟದ ತ್ಯಾಜ್ಯ ವಿಲೇವಾರಿ ಸ್ತಳ ಎಂದು ಗೊತ್ತಾಯಿತು. ಇಲ್ಲಿಗೆ ಬರುತ್ತಿದ್ದ ಕಾಡಾನೆ ತ್ಯಾಜ್ಯದೊಳಗೆ ಆಹಾರ ಹುಡುಕುತ್ತಿತ್ತು. ಈ ದೃಶ್ಯವನ್ನು ಸ್ಥಳೀಯರು ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಅಪ್ಲೋಡ್ ಮಾಡಿದ್ದರು. ಇದನ್ನು ನೋಡಿದ ಪರಿಸರವಾದಿಗಳು ಆಕ್ರೋಶ ವ್ಯಕ್ತವಾಗಿತ್ತು. ಈ ವಿಷಯ ಸುದ್ದಿಯಾಗದ ಬಳಿಕ ತ್ಯಾಜ್ಯ ರಾಶಿ ತುಂಬಿದ್ದ ಸ್ಥಳದಲ್ಲಿ ಅರೆಬರೆಯಾಗಿ ಸ್ವಚ್ಛತೆ ಮಾಡಲಾಗಿತ್ತು. ಆದರೆ ಹಿಮಗಿರಿ ವನ್ಯಜೀವಿ ಸಂರಕ್ಷಣಾ ಸಂಸ್ಥೆ, ಬೆಂಗಳೂರಿನ ಮಹಾವೀರ್ ಎನರ್ಜಿ ಹಬ್ ಪ್ರೈವೇಟ್ ಲಿಮಿಟೆಡ್, ಅಡವಿ ಅಲರ್ಟ್ ಫೌಂಡೇಷನ್‌ನಿಂದ ಸಮರ್ಪಕವಾಗಿ ತ್ಯಾಜ್ಯ ತೆರವಿನ ಕಾರ್ಯ ಮಾಡಿ ಸಾಮಾಜಿಕ ಕಳಕಳಿಯನ್ನು ಮೆರೆಯಲಾಯಿತು.

ಹಿಮಗಿರಿ ವನ್ಯಜೀವಿ ಸಂರಕ್ಷಣಾ ಸಂಸ್ಥೆ, ಬೆಂಗಳೂರಿನ ಮಹಾವೀರ್ ಎನರ್ಜಿ ಹಬ್ ಪ್ರೈವೇಟ್ ಲಿಮಿಟೆಡ್, ಅಡವಿ ಅಲರ್ಟ್ ಫೌಂಡೇಷನ್‌ನಿಂದ ಒಂದೆಡೆ ತ್ಯಾಜ್ಯವನ್ನು ಸಂಗ್ರಹಿಸಲಾಗುತ್ತಿದ್ದು, ಜಿಲ್ಲಾಧಿಕಾರಿ ಶ್ರೀರೂಪಾ ಅವರು ತಿಳಿಸಿದ ಕಡೆಗೆ ಕಸ ವಿಲೇವಾರಿ ಮಾಡಲಿದೆ. ತ್ಯಾಜ್ಯವನ್ನು ಹಾಕುವ ಪ್ರದೇಶಕ್ಕೂ ಹಾನಿಯಾಗಬಾರದು ಮತ್ತು ಸ್ಥಳೀಯ ನಿವಾಸಿಗಳೂ ತೊಂದರೆಯಾಗಬಾರದು ಎಂಬ ಕಾರಣಕ್ಕೆ ಜಿಲ್ಲಾಡಳಿತ ಸೂಚಿಸಿದ ಪ್ರದೇಶದಲ್ಲಿ ಕಸ ವಿಲೇವಾರಿ ಮಾಡಿಕೊಡಲಾಗುತ್ತಿದೆ.

ಮಲೆ ಮಹದೇಶ್ವರ ಬೆಟ್ಟ ಪ್ಲಾಸ್ಟಿಕ್ ಮುಕ್ತ ಪ್ರದೇಶವಾಗಿದೆ. ಅರಣ್ಯ ಮತ್ತು ವನ್ಯಜೀವಿಗಳ ಸಂರಕ್ಷಣೆಗಾಗಿ ಏಕ ಬಳಕೆಯ ಪ್ಲಾಸ್ಟಿಕ್ ಬಳಕೆಯನ್ನು ನಿಷೇಧ ಮಾಡಿದೆ. ಆದರೂ ಬೆಟ್ಟದಲ್ಲಿ ಪ್ಲಾಸ್ಟಿಕ್ ಬಳಕೆ ನಿಂತಿಲ್ಲ. ಸ್ಥಳೀಯರ ಮನೆಗಳಿಂದ ಉತ್ಪತ್ತಿಯಾಗುವ ತ್ಯಾಜ್ಯಕ್ಕಿಂತಲೂ ಮಹದೇಶ್ವರ ಬೆಟ್ಟಕ್ಕೆ ಬರುವ ಭಕ್ತರು ಉಪಯೋಗಿಸಿ ಬಿಸಾಕುವ ಕಸವೇ ಹೆಚ್ಚಾಗಿದೆ. ಪ್ಲಾಸ್ಟಿಕ್ ಬಾಟಲ್‌ಗಳು, ಕವರ್‌ಗಳನ್ನು ಬಳಸಿ ಬೆಟ್ಟದ ಪರಿಸರದಲ್ಲೇ ಬಿಸಾಡಿ ಹೋಗಲಾಗುತ್ತಿದೆ.