ನಗರಸಭೆಯಲ್ಲಿ ಅರ್ಜಿ ಬಾಕಿಗೆ ನೋಟೀಸ್

ಜಿಲ್ಲಾಧಿಕಾರಿ ಶ್ರೀರೂಪಾ ಪೌರಾಯುಕ್ತ ಛಲವಾದಿ ಪರಶುರಾಮ್‌ಗೆ ಕಾರಣ ನೋಟೀಸ್ ಕೊಟ್ಟಿದ್ದಾರೆ. ಜೂ.5ರಂದು ನಗರಸಭೆಗೆ ದಿಢೀರ್ ಭೇಟಿ ನೀಡಿದ್ದ ಜಿಲ್ಲಾಧಿಕಾರಿ ಶ್ರೀರೂಪಾ ಮತ್ತು ಅಧಿಕಾರಿಗಳು ತಂಡ ವಿವಿಧ ಶಾಖೆಗಳನ್ನು ಪರಿಶೀಲನೆಗೊಳಪಡಿಸಿದ್ದರು.

ಶಾಖೆಗಳಲ್ಲಿ ಬಾಕಿ ಉಳಿದಿದ್ದ ಅರ್ಜಿಗಳೆಷ್ಟು, ಯಾಕೆ ಬಾಕಿ ಉಳಿದಿವೆ, ವಿಲೇವಾರಿ ವಿಳಂಬಕ್ಕೆ ಕಾರಣವೇನು ಎಂದು ಕೇಳಿದ್ದರು. ಈ ವೇಳೆ ಪೌರಾಯುಕ್ತ ಪರಶುರಾಮ್ ಅವರ ಲಾಗಿನ್‌ನಲ್ಲಿ ಇ-ಸ್ವತ್ತು, ಖಾತೆ ಬದಲಾವಣೆಗಾಗಿ ಸಲ್ಲಿಸಿದ್ದ 93 ಅರ್ಜಿಗಳು ಬಾಕಿ ಉಳಿದಿದ್ದವು. ಈ ಹಿನ್ನೆಲೆಯಲ್ಲಿ ಪೌರಾಯುಕ್ತರಿಗೆ ನೋಟೀಸ್ ಕೊಟ್ಟಿರುವ ಡಿಸಿ ಶ್ರೀರೂಪಾ, ಸರ್ಕಾರದ ಕೆಲಸವನ್ನು ಸಕಾಲದಲ್ಲಿ ಮಾಡಿ ಮುಗಿಸಬೇಕಾಗಿದೆ. ಈ ರೀತಿ ಅರ್ಜಿಗಳನ್ನು ಬಾಕಿ ಉಳಿಸಬಾರದು. ತಕ್ಷಣ ವಿಲೇವಾರಿ ಮಾಡಬೇಕೆಂದು ಸೂಚನೆ ನೀಡಿದ್ದಾರೆ.

ಬಲೆಗೆ ಬಿದ್ದವರ ವರದಿ ಸಲ್ಲಿಕೆ: ನಗರಸಭೆಯಲ್ಲಿ ಇ-ಸ್ವತ್ತು ಮಾಡಿಕೊಡಲು ಲಂಚ ಪಡೆಯುತ್ತಿದ್ದಾಗ ಲೋಕಾಯುಕ್ತರ ಬಲೆಗೆ ಬಿದ್ದ ಇಬ್ಬರು ಅಧಿಕಾರಿಗಳ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸುವ ಸಲುವಾಗಿ ಪೌರಾಯುಕ್ತ ಛಲವಾದಿ ಪರಶುರಾಮ್ ಜಿಲ್ಲಾಧಿಕಾರಿ ಶ್ರೀರೂಪಾ ಅವರ ಕೈಗಿಟ್ಟಿದ್ದಾರೆ. ನಗರಸಭೆಯಲ್ಲಿ ನಿವೇಶನದ ಇ-ಸ್ವತ್ತು ಮಾಡಿಕೊಡಲು ಕಂದಾಯ ನಿರೀಕ್ಷಕ ಶಕೀಲ್ ಅಹಮದ್, ಕಂದಾಯ ಅಧಿಕಾರಿ ಹೇಮಂತ್‌ಕುಮಾರ್ 25 ಸಾವಿರ ರೂ. ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು. ಈ ಸಂಬಂಧ ದೂರುದಾರ ಮೀಸೆ ನಾಗರಾಜು ಲೋಕಾಯುಕ್ತ ಪೊಲೀಸರಿಗೆ ದೂರು ನೀಡಿದ್ದರು. ಜೂ.2ರಂದು ನಗರಸಭೆ ಕಚೇರಿಯಲ್ಲಿ ಲಂಚ ಪಡೆಯುವಾಗ ಇಬ್ಬರು ಅಧಿಕಾರಿಗಳು ಸಿಕ್ಕಿಬಿದ್ದರು. ಮಧ್ಯವರ್ತಿ ಅಬೀಬ್ ಕೂಡ ಸಿಕ್ಕಿದ್ದಿದ್ದ. ಈ ಪ್ರಕರಣದಲ್ಲಿ ಜೈಲು ಸೇರಿದ ಇಬ್ಬರು ಸರ್ಕಾರಿ ಅಧಿಕಾರಿಗಳು ಸೇವಾ ನಿಯಮದ ಪ್ರಕಾರ ಕೆಲಸದಿಂದ ಅಮಾನತಾಗಿದ್ದಾರೆ. ಈ ಕುರಿತ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಕೆ ಮಾಡಲು ಪೌರಾಯುಕ್ತ ಛಲವಾದಿ ಪರಶುರಾಮ್ ಡಿಸಿಗೆ ಸಲ್ಲಿಕೆ ಮಾಡಿದ್ದಾರೆ. ಭ್ರಷ್ಟ ಅಧಿಕಾರಿಗಳಿಗೆ ದಲ್ಲಾಳಿಗಳ ಸಹಕಾರ ಸಿಕ್ಕಿ ವ್ಯವಸ್ಥೆ ಹಾಳಾಗಿ ಹೋಗಿದೆ. ಈ ನಿಟ್ಟಿನಲ್ಲಿ ಡಿಸಿ ಶ್ರೀರೂಪಾ ನಗರಸಭೆಗೆ ದಿಢೀರ್ ಭೇಟಿ ನೀಡಿ ಮಧ್ಯವರ್ತಿಗಳಿಗೆ ಪ್ರವೇಶ ನೀಡಬಾರದು ಎಂದು ಸೂಚನೆ ನೀಡಿದ್ದಾರೆ. ಕಚೇರಿಯ ಗೋಡೆಯ ಮೇಲೆ ಮಧ್ಯವರ್ತಿಗಳಿಗೆ ಪ್ರವೇಶವಿಲ್ಲವೆಂದು ನಾಮಲಕವನ್ನು ಹಾಕಿಸಲು ಸೂಚನೆ ನೀಡಿದ್ದರು. ಅದರಂತೆ, ಗೋಡೆಯ ಮೇಲೆ ಬೋರ್ಡ್ ಹಾಕಿಸಲಾಗಿದೆ. ಆದರೆ ದಲ್ಲಾಳಿಗಳು ಬಂದು ಹೋಗುತ್ತಿದ್ದಾರೆ. ಮಧ್ಯವರ್ತಿ ಕೆಲಸ ಮಾಡಲು ಬೇರೆ ರೀತಿಯ ಮುಖವಾಡ ತೊಟ್ಟಿರುವವರನ್ನು ಪತ್ತೆ ಮಾಡುವುದು ಸುಲಭದ ಮಾತಲ್ಲ. ಗೋಡೆಯ ಮೇಲೆ ಬೋರ್ಡ್ ಹಾಕಿದರೆ ವ್ಯವಸ್ಥೆ ಬದಲಾಗುವುದಿಲ್ಲ ಎನ್ನುವ ಮಾತುಗಳು ಕೇಳಿಬರುತ್ತಿವೆ.

ನನ್ನ ನಿವೇಶನದ ಖಾತೆ ಮಾಡಿಕೊಡಲು ಕೋರಿ ಅರ್ಜಿ ಸಲ್ಲಿಸಿ 10 ವರ್ಷವಾಗಿದೆ. ನಗರಸಭೆ ಸಾಮಾನ್ಯಸಭೆಯಲ್ಲೂ ನನಗೆ ಖಾತೆ ಮಾಡಿಕೊಡಲು ನಿರ್ಣಾಯವಾಗಿತ್ತು. ಇದಕ್ಕೆ ಸಂಬಂಧಿಸಿದ ಎಲ್ಲ ದಾಖಲೆಗಳು ನನ್ನ ಬಳಿ ಇವೆ. ವರ್ಷಗಳೇ ಕಳೆಯುತ್ತಿದ್ದರೂ ಖಾತೆ ಮಾಡಿಕೊಟ್ಟಿಲ್ಲ. ಈಗ ಕೇಳಿದರೆ ಮತ್ತೊಮ್ಮೆ ಅರ್ಜಿ ಹಾಕಿ ಎಂದು ಕೇಳುತ್ತಿದ್ದಾರೆ.