ಈ ಸಲ ಮುಳುಗದಿರಲಿ ಬದುಕು..!

ಕೊಳ್ಳೇಗಾಲ ತಾಲೂಕಿನ ದಾಸನಪುರದ ಮಹದೇವಿ ಮಾತಿನಲ್ಲಿ ಭವಿಷ್ಯದ ಆತಂಕವಿದೆ. ಕಾವೇರಿ ನದಿ ಪಾತ್ರದ ಮುಳ್ಳೂರು, ಹಳೇಹಂಪಾಪುರ, ದಾಸನಪುರ, ಹರಳೆ ಇನ್ನಿತರ ಗ್ರಾಮಗಳಲ್ಲಿ ಮಳೆಗಾಲದಲ್ಲಿ ಜನಮನ ಇಂತಹದ್ದೇ ತೊಯ್ದಟಕ್ಕೆ ಇಳಿಯುತ್ತದೆ. ಒಂದೆಡೆ ಕೆಆರ್‌ಎಸ್, ಕಬಿನಿ ತುಂಬಿ ಹರಿದರೆ ಬಾಗಿನ ಅರ್ಪಿಸುವ ಸಂಭ್ರಮ ಮನೆ ಮಾಡಿರುತ್ತದೆ. ಮೊತ್ತೊಂದೆಡೆ ನೀರು ನುಗ್ಗಿ ಮನೆಗಳು ಮುಳುಗಡೆಯಾಗುವ ಭೀತಿ ಬೇರೂರುತ್ತದೆ. ಮಳೆ ತರುವ ಹರ್ಷ ಮತ್ತು ಆತಂಕ ಜೀವನದ ಎರಡು ಮುಖಗಳ ವೈರುಧ್ಯವನ್ನು ಪರಿಚಯಿಸುತ್ತದೆ ಎನ್ನುವುದನ್ನು ಮಹದೇವಿ ಅವರ ನುಡಿಗಳಿಂದ ಪರಿಚಯವಾಗುತ್ತದೆ. ಮಾಧವಿ ಮನೆಯ ಹಿಂಭಾಗದಲ್ಲಿ ಹರಿಯುವ ನೀರಿನ ಹರಿವು ಜೋರಾದರೆ ಮುಳುಗಡೆಯಾಗುವ ಭೀತಿಗೆ ಊರು ತೊರೆಯುವ ಪರಿಸ್ಥಿತಿ ನಿರ್ಮಾಣವಾಗುತ್ತದೆ. ಇವರಂತೆಯ ಇತರರದ್ದರೂ ಇದೇ ಪರಿಸ್ಥಿತಿ.

2025ರಲ್ಲಿ ನೀರಿನ ಪ್ರಮಾಣ ತಗ್ಗಿ ಪ್ರವಾಹದ ಆತಂಕ ದೂರವಾಗಿತ್ತು. 2024ರಲ್ಲಿ ಕಬಿನಿ ಮತ್ತು ಕೆಆರ್‌ಎಸ್‌ನ ಹೊರ ಹರಿವು ಹೆಚ್ಚಾಗಿ ಮುಳ್ಳೂರು, ಹಳೇ ಹಂಪಾಪುರ, ದಾಸನಪುರ, ಯಡಕುರಿಯಾ, ಹರಳೆ ಗ್ರಾಮಗಳು ಜಲಾವೃತಗೊಂಡಿದ್ದರು. ಪ್ರವಾಹದಲ್ಲಿ ಮನೆಗಳಿಗೆ ನೀರು ನುಗ್ಗಿದ್ದ ಹಿನ್ನೆಲೆಯಲ್ಲಿ ಪ್ರಾಣಹಾನಿ ಸಂಭವಿಸುವುದನ್ನು ತಡೆಯಲು ಮುನ್ನೆಚ್ಚರಿಕೆ ಕ್ರಮವಾಗಿ 951 ಜನರನ್ನು ಕಾಳಜಿ ಕೇಂದ್ರದಲ್ಲಿ ಇರಿಸಲಾಗಿತ್ತು. ಸರ್ಕಾರಿ ಶಾಲೆ, ಹಾಸ್ಟೆಲ್‌ಗಳಲ್ಲಿ ಕೇಂದ್ರ ತೆರೆಯಾಗಿತ್ತು. 6 ವರ್ಷದೊಳಗಿನ 52 ಮಕ್ಕಳು, 342 ಪುರುಷರು, 557 ಮಹಿಳೆಯರು ಸೇರಿ ಒಟ್ಟು 951 ಜನರು ಕಾಳಜಿ ಕೇಂದ್ರದಲ್ಲಿದ್ದರು. ಸುತ್ತಮುತ್ತಲಿನ ಗ್ರಾಮಗಳ ಜಮೀನುಗಳಿಗೂ ನೀರು ನುಗಿತ್ತು. ಈ ವಿಪತ್ತು ಇತ್ತೀಚಿನ ತಾಜಾ ಉದಾಹರಣೆಯಾಗಿದ್ದು, ಕಳೆದ ಹಲವು ವರ್ಷಗಳಿಂದ ಈ ಗ್ರಾಮಗಳನ್ನು ಪ್ರವಾಹ ಬಿಟ್ಟು ಬಿಡದೆ ಕಾಡುತ್ತಲೇ ಇದೆ. ಹಾಗಾಗಿ ಈ ಬಾರಿ ಮಳೆ ಮತ್ತು ಕಾವೇರಿ, ಕಬಿನಿ ನದಿ ನೀರಿನ ಹರಿವಿನ ಹೆಚ್ಚಳವನ್ನು ಎದುರಿಸಲು ಈಗಿನಿಂದಲೇ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಬೇಕಾಗಿದೆ. ಒಂದು ವೇಳೆ ಮಳೆಗಾಲಕ್ಕೆ ಮಳೆ ಶುರುವಾದ ಮೇಲೆ ಸಿದ್ಧತೆ ಕೈಗೊಂಡು ಅಧಿಕಾರಿಗಳು ಗಡಿಬಿಡಿಯ ಮುಳುಗಿದರೆ, ಜನರು ಸಮಸ್ಯೆಯ ಸುಳಿಯಲ್ಲಿ ಸಿಲುಕುತ್ತಾರೆ.

ಪ್ರವಾಹದ ಭೀತಿಯ ಗ್ರಾಮಗಳಲ್ಲಿ ಸಮಸ್ಯೆಗಳ ಪ್ರವಾಹವೂ ಇದೆ. ಮುಳ್ಳೂರಿನ ಶ್ರೀನಿವಾಸ ನಾಯಕ ಮಾತನಾಡಿ, ಕಾವೇರಿ ನದಿ ನೀರಿನ ಹರಿವು ಹೆಚ್ಚಾದರೆ ನಮ್ಮೂರಿನ ಗ್ರಾಮ ಪಂಚಾಯಿತಿಯೇ ಮುಳುಗಡೆಯಾಗಿ ಹೋಗುತ್ತದೆ ಎಂದು ಹೇಳಿದ್ದಾರೆ. ಪ್ರವಾಹ ಬಂದಾಗ ಅಧಿಕಾರಿಗಳು ಬಂದು ಕ್ರಮವಹಿಸುತ್ತಾರೆ. ಮುಳ್ಳೂರಿನಲ್ಲಿ ತಡೆಗೋಡೆ ನಿರ್ಮಾಣ ಮಾಡಲಾಗಿದ್ದು, ಅದನ್ನು ದೇವಸ್ಥಾನದವರೆಗೂ ಕಟ್ಟಿಸಿಕೊಟ್ಟರೆ ಪ್ರವಾಹವಾದಾಗ ಮನೆಗಳಿಗೆ ನೀರು ನುಗ್ಗುವುದು ಕಡಿಮೆಯಾಗುತ್ತದೆ ಎಂದು ತಿಳಿಸಿದ್ದಾರೆ. ಹಳೇ ಹಂಪಾಪುರದ ರಘು ಮಾತನಾಡಿ, ನಮ್ಮ ಊರಿನ ಭಾಗ ತಗ್ಗು ಪ್ರದೇಶವಾಗಿದೆ. ಇಲ್ಲಿ ತಡೆಗೋಡೆ ಹಾಕಿದರೆ ಯಾವ ರೀತಿ ಪ್ರಯೋಜನವಾಗುತ್ತದೆಯೋ ಗೊತ್ತಿಲ್ಲ. ಆದರೆ ನಮ್ಮ ಜಮೀನುಗಳೆಲ್ಲಾ ಜಲಾವೃತಗೊಳ್ಳುತ್ತವೆ. ನಾವು ಪ್ರವಾಹ ಸಂಭವಿಸುವ ತಿಂಗಳಲ್ಲಿ ಭೂಮಿಯಲ್ಲಿ ಬೆಳೆ ಬೆಳೆಯುವುದನ್ನು ನಿಲ್ಲಿಸಿಬಿಡುತ್ತೇವೆ. ಒಂದು ವೇಳೆ ಬೆಳೆ ಇದ್ದರೆ ಪ್ರವಾಹದಿಂದ ಉಂಟಾಗುವ ಹಾನಿಗೆ ತಕ್ಷಣ ಪರಿಹಾರವನ್ನು ನೀಡಬೇಕು ಎಂದಿದ್ದಾರೆ. ದಾಸನಪುರದ ಶಾಂತಮ್ಮ ಮಾತನಾಡಿ, ಪ್ರವಾಹ ಸಂಭವವಿದ್ದಾಗ ಮುನ್ನೆಚ್ಚರಿಕೆ ಕ್ರಮವಾಗಿ ಕಾಳಜಿ ಕೇಂದ್ರಗಳಿಗೆ ಹೋಗುತ್ತೇವೆ. ಆದರೆ ಪ್ರವಾಹ ತಗ್ಗಿದ ಮೇಲೆ ಹಾವು, ಚೇಳುಗಳ ಕಾಟ ಹೆಚ್ಚಾಗುತ್ತದೆ ಎಂದು ಹೇಳುತ್ತಾರೆ.

ಪ್ರವಾಹದ ಭೀತಿಯಲ್ಲಿರುವ ಗ್ರಾಮಗಳು ಶಾಶ್ವತ ಪರಿಹಾರದತ್ತ ದೂರದ ನೋಟ ಬೀರುತ್ತಿವೆ. ಕ್ಷೇತ್ರದ ಶಾಸಕ ಎ.ಆರ್.ಕೃಷ್ಣಮೂರ್ತಿ ಈ ಬಗ್ಗೆ ಸದನದಲ್ಲಿ ಗಮನ ಸೆಳೆದು ಸರ್ಕಾರದ ಹಂತಕ್ಕೆ ಕೊಂಡೊಯ್ದಿದ್ದಾರೆ. ಕಬಿನಿ ಮತ್ತು ಕಾವೇರಿ ನದಿಯಿಂದ ಒಟ್ಟಾರೆಯಾಗಿ 2.50 ಲಕ್ಷ ಕ್ಯೂಸೆಕ್ ನೀರನ್ನು ನದಿಗೆ ಹರಿಸಿದಾಗ ಕೊಳ್ಳೇಗಾಲ ತಾಲೂಕಿನ ಗ್ರಾಮಗಳಾದ ಮುಳ್ಳೂರು, ಹಳೇ ಹಂಪಾಪುರ, ದಾಸನಪುರ, ಹಳೇ ಅಣಗಳ್ಳಿ, ಹರಳೆ, ಸರಗೂರು, ಧನಗೆರೆ, ಸತ್ತೇಗಾಲ ಹಾಗೂ ಯಡಕುರಿಯಾ ಗ್ರಾಮಗಳು ಕಾವೇರಿ ನದಿ ಪಾತ್ರದಲ್ಲಿರುವುದರಿಂದ ಪ್ರವಾಹಕ್ಕೆ ಸಿಲುಕಿ ಪದೇ ಪದೇ ಜನ, ಜಾನುವಾರು, ಆಸ್ತಿಗೆ ತೊಂದರೆಯಾಗುತ್ತಿರುವುದು ಕಂಡು ಬಂದಿರುತ್ತದೆ. ಆದ್ದರಿಂದ ನದಿ ಪಾತ್ರದಲ್ಲಿರುವ ಗ್ರಾಮಗಳಿಗೆ ಉಂಟಾಗಿರುವ ಹಾನಿಯನ್ನು ತಡೆಗಟ್ಟಲು ತಡೆಗೋಡೆ ನಿರ್ಮಿಸಬೇಕೆಂದು ಕೇಳಿಕೊಂಡಿದ್ದರು. ಈ ಸಂಬಂಧ ಕಾವೇರಿ ನೀರಾವರಿ ನಿಗಮದಿಂದ ತಡೆಗೋಡೆ ನಿರ್ಮಾಣ ಮಾಡಲು ಅಗತ್ಯವಿರುವ ಪ್ರಕ್ರಿಯೆಗಳನ್ನು ನಡೆಸಲಾಗುತ್ತಿದೆ.

ನೆರೆ ತಡೆಗೋಡೆ ನಿರ್ಮಾಣಕ್ಕಾಗಿ 500 ಕೋಟಿ ರೂ. ಅನುದಾನ ನೀಡುವಂತೆ ಕೇಂದ್ರ ಸರ್ಕಾರದ 16ನೇ ಹಣಕಾಸು ಆಯೋಗಕ್ಕೆ 2025ರ ನವೆಂಬರ್‌ನಲ್ಲಿ ವಿಧಾನ ಪರಿಷತ್ತಿನ ಸದಸ್ಯ ಕೆ.ಶಿವಕುಮಾರ್ ಪತ್ರ ಬರೆದು ಮನವಿ ಮಾಡಿದ್ದರು. ಕಾವೇರಿ ಮತ್ತು ಕಪಿಲಾ ನದಿಯ ಪ್ರವಾಹದಿಂದ ಮೈಸೂರು ಜಿಲ್ಲೆಯ ನಂಜನಗೂಡು ಪಟ್ಟಣ ಸೇರಿದಂತೆ ಚಾಮರಾಜನಗರ ಜಿಲ್ಲೆಯ ಕೆಲವು ಗ್ರಾಮಗಳಲ್ಲಿ ಉಂಟಾಗುತ್ತಿರುವ ಹಾನಿಯನ್ನು ತಡೆಯಲು ನದಿಗಳ ದಂಡೆಯ ಉದ್ದಕ್ಕೂ ತಡೆಗೋಡೆಗಳನ್ನು ನಿರ್ಮಿಸಲು 500 ಕೋಟಿ ರೂ. ವಿಶೇಷ ಆರ್ಥಿಕ ನೆರವು ಅಥವಾ ಅನುದಾನ ನೀಡಬೇಕೆಂದು ಕೇಂದ್ರ ಸರ್ಕಾರದ ಹಣಕಾಸು ಆಯೋಗದ ಅಧ್ಯಕ್ಷರಿಗೆ ಪತ್ರ ಬರೆದಿದ್ದು, ರಾಷ್ಟ್ರೀಯ ವಿಪತ್ತು ನಿರ್ವಹಣಾ ನಿಧಿ ಅಡಿಯಲ್ಲಿ ಅನುದಾನ ಕಲ್ಪಿಸಿಬೇಕೆಂದು ಕೋರಿದ್ದರು.

ಪ್ರವಾಹದ ಸಂದರ್ಭದಲ್ಲಿ ಜನರನ್ನು ಪದೇ ಪದೇ ಬೇರೆಡೆ ಸ್ಥಳಾಂತರಿಸಿ, ತಾತ್ಕಾಲಿಕವಾಗಿ ನಿರ್ಮಿಸಿದ ಶಿಬಿರಗಳಲ್ಲಿ ಒಂದೆರಡು ತಿಂಗಳ ಕಾಲ ಅವರಿಗೆ ವಸತಿ ಕಲ್ಪಿಸಲಾಗುತ್ತಿದೆ. ಹೀಗೆ ಗ್ರಾಮಸ್ಥರ ಸ್ಥಳಾಂತರದಿಂದ ಮಕ್ಕಳ ಶಿಕ್ಷಣಕ್ಕೂ ತೊಂದರೆಯಾಗಿದೆ. ಕೊಳ್ಳೇಗಾಲ ತಾಲೂಕಿನ ಮುಳ್ಳೂರು, ಹಳೇ ಅನ್ನಹಳ್ಳಿ, ಹರಳೆ, ಸರಗೂರು, ಧನಗೆರೆ, ಸತ್ತೇಗಾಲ, ಯಡಕುರಿ ಗ್ರಾಮದಲ್ಲಿ ನೆರೆಯಿಂದ ಜನರಿಗೆ ತೊಂದರೆಯಾಗಿದೆ ಎಂದು ಗಮನಕ್ಕೆ ತಂದಿದ್ದಾರೆ.

"

ಕಾವೇರಿ ಮತ್ತು ಕಬಿನಿ ನೀರಿನ ಹರಿವು ಹೆಚ್ಚಾದರೆ ನಮ್ಮ ಮನೆ ಮುಳುಗುವ ಸ್ಥಿತಿಗೆ ತಲುಪುತ್ತದೆ. ಶಿಥಿಲಾವಸ್ಥೆಯಲ್ಲಿರುವ ಮನೆ ಬಿದ್ದು ಹೋಗಬಹುದು. ಪ್ರವಾಹ ಪೀಡಿತ ಸ್ಥಳಗಳಲ್ಲಿ ನಮಗಾಗಿ ಉತ್ತಮ ಮನೆಗಳನ್ನು ನಿರ್ಮಾಣ ಮಾಡಿಕೊಟ್ಟರೆ ಸೂರು ಸಿಕ್ಕಂತಾಗುತ್ತದೆ.

— ಮಹದೇವಿ, ದಾಸನಪುರ, ಕೊಳ್ಳೇಗಾಲ

"

ಪ್ರವಾಹ ಬಂದಾಗ ನಮ್ಮ ಮನೆಗಳಿಗೆ ನೀರು ನುಗ್ಗುತ್ತದೆ. ಗ್ರಾಮದಲ್ಲಿ ಕಟ್ಟಿರುವ ತಡೆಗೋಡೆಯನ್ನು ದೇವಸ್ಥಾನದವರೆಗೂ ನಿರ್ಮಾಣ ಮಾಡುವುದರಿಂದ ಪ್ರವಾಹ ತಡೆಯಬಹುದು.

— ಮಹೇಶ್, ಮುಳ್ಳೂರು ನಿವಾಸಿ, ಕೊಳ್ಳೇಗಾಲ

"

ಕೊಳ್ಳೇಗಾಲದ ಶಾಸಕರಾದ ಎ.ಆರ್.ಕೃಷ್ಣಮೂರ್ತಿ ಅವರ ಸೂಚನೆಯಂತೆ ಪ್ರವಾಹ ಪೀಡಿತ ಗ್ರಾಮಗಳಲ್ಲಿ ತಡೆಗೋಡೆ ನಿರ್ಮಾಣ ಮಾಡುವ ಸಂಬಂಧ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ಮಾಡಿದ್ದೇನೆ. ಇದರ ಬಗ್ಗೆ ಆಳವಾಗಿ ಅಧ್ಯಯನ ನಡೆಸಲು ಕನ್ಸಲ್ಟೆನ್ಸಿಗೆ ಟೆಂಡರ್ ನೀಡಿ ಕಾರ್ಯಾದೇಶ ಮಾಡಲಾಗಿದೆ. ಕನ್ಸಲ್ಟೆನ್ಸಿಯಿಂದ ಡಿಪಿಆರ್ ತಯಾರಾಗುತ್ತದೆ. ಬಳಿಕ ಇದನ್ನು ನಾವು ಸಹ ಅಧ್ಯಯನ ಮಾಡಿ, ಶಾಸಕರಿಗೂ ತಿಳಿಸಿ ಮುಂದಿನ ಕ್ರಮ ತೆಗೆದುಕೊಳ್ಳುತ್ತೇವೆ.

— ಉಮೇಶ್, ಕಾರ್ಯಪಾಲಕ ಇಂಜಿನಿಯರ್, ಕಾವೇರಿ ನೀರಾವರಿ ನಿಗಮ