ಜಿಂಕೆ ಮಾಂಸ ಮಾರುತ್ತಿದ್ದವನ ಬಂಧನ

ತಾಲೂಕಿನ ಕೂತನೂರು ಗ್ರಾಮದ ಮಹದೇವಶೆಟ್ಟಿ ಎಂಬುವರ ಮಗ ಲಕ್ಷ್ಮಣ ಎಂಬಾತನೇ ಬಂಧಿತ ಆರೋಪಿ. ಜಿಂಕೆಯನ್ನು ಬೇಟೆಯಾಡಿರುವ ಖಚಿತ ಮಾಹಿತಿ ಮೇರೆಗೆ ಬಫರ್ ವಲಯದ ಪ್ರಭಾರ ಆರ್‌ಎಫ್‌ಒ ಶಿವಕುಮಾರ್ ಹಾಗೂ ಸಿಬ್ಬಂದಿ ಸೋಮವಾರ ಆರೋಪಿಯ ಮನೆಗೆ ದಾಳಿ ನಡೆಸಿ ಜಿಂಕೆಯ ತಲೆಬುರುಡೆ ಹಾಗೂ ಮೂರು ಕಾಲುಗಳನ್ನು ಜಪ್ತಿ ಮಾಡಿ ಆರೋಪಿಯನ್ನು ವಶಕ್ಕೆ ಪಡೆದರು. ಈ ವೇಳೆ ಮಾಂಸ ಸಿಕ್ಕಿಲ್ಲ.

ಹಿಂದಿನಿಂದಲೂ ತಾನು ಮಾಂಸಕ್ಕಾಗಿ ಮೊಲ, ಜಿಂಕೆ ಮುಂತಾದ ವನ್ಯಜೀವಿಗಳನ್ನು ಬೇಟೆಯಾಡಿ ಮಾರಾಟ ಮಾಡುತ್ತಿದ್ದುದಾಗಿ ಆರೋಪಿ ಒಪ್ಪಿಕೊಂಡಿದ್ದಾನೆ. ಈ ಬಗ್ಗೆ ವನ್ಯಜೀವಿ ಸಂರಕ್ಷಣಾ ಕಾಯ್ದೆಯನ್ವಯ ಪ್ರಕರಣ ದಾಖಲಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕಾರ್ಯಾಚರಣೆಯಲ್ಲಿ ಗಾರ್ಡ್‌ಗಳಾದ ಗಣೇಶ್ ಲಮಾಣಿ, ಅಮೀನ್ ಸಾಬ್, ಅಶೋಕ್ ಇದ್ದರು.