ಮಲೆ ಮಹದೇಶ್ವರ ಬೆಟ್ಟದಲ್ಲಿ ರಥೋತ್ಸವದಲ್ಲಿ ಪಾಲ್ಗೊಳ್ಳುವ ಸ್ಥಳೀಯ ರೈತರು ಬಳಿಕ ಹೊನ್ನೇರು ಕಟ್ಟಿ ಕೃಷಿ ಚಟುವಟಿಕೆ ಶುರು ಮಾಡುತ್ತಾರೆ. ಗುಡ್ಡಗಾಡು ಪ್ರದೇಶವಾಗಿರುವ ಮಹದೇಶ್ವರ ಬೆಟ್ಟದಲ್ಲಿ ದೇಸಿ ತಳಿಯ ಎತ್ತುಗಳು, ಸಾಂಪ್ರದಾಯಿಕ ಪದ್ಧತಿಯಲ್ಲಿ ಕೃಷಿ ಮಾಡುವುದು ಸುಸ್ಥಿರ ಬದುಕಿನ ಸಂಕೇತವಾಗಿದೆ. ಈ ಭಾಗದಲ್ಲಿ ರಾಗಿ ಪ್ರಧಾನ ಬೆಳೆಯಾಗಿದ್ದರೂ ಮಿಶ್ರ ಬೆಳೆ ಪದ್ಧತಿ ಅನುಸರಿಸಲಾಗುತ್ತಿದೆ. ರಾಗಿ ಸುತ್ತಲೂ ಹುಚ್ಚಳ್ಳು ಹಾಕಲಾಗುತ್ತದೆ. ಅವರೇ, ಅರಳೆ, ಹಲಸಂದೆ, ಸಾಸಿವೆ, ಆರಕ ಬೆಳೆಯಲಾಗುತ್ತದೆ. ಪೂರ್ವ ಮುಂಗಾರಿಗೆ ಈ ಬೆಳೆ ಹಾಕಲು ಜಮೀನು ಹದಗೊಳಿಸಲಾಗುತ್ತದೆ. ಒಂದರ್ಥದಲ್ಲಿ ಇದು ಕೃಷಿಗೆ ಮುನ್ನುಡಿ ಬರೆಯುವ ದಿನವೆಂದೇ ಹೇಳುವ ಆಚರಣೆ. ಈ ಸಂಪ್ರದಾಯ ಮಲೆ ಮಹದೇಶ್ವರ ಬೆಟ್ಟಕ್ಕೆ ಮಾತ್ರ ಸೀಮಿತವಾಗಿಲ್ಲ. ಜಿಲ್ಲೆಯ ವಿವಿಧ ಗ್ರಾಮಗಳಲ್ಲಿ ಚಾಲ್ತಿಯಲ್ಲಿದೆ. ಮುಂಜಾನೆಯೇ ಎತ್ತುಗಳನ್ನು ಸ್ವಚ್ಛಗೊಳಿಸಿ ತಾವೂ ಶುದ್ಧಗೊಂಡು, ಕುಟುಂಬ ಸಮೇತ ಜಮೀನಿಗೆ ಹೋಗಿ, ನೇಗಿಲು, ನೊಗ, ಎತ್ತು ಮತ್ತು ಭೂಮಿಗೆ ಪೂಜೆ ಸಲ್ಲಿಸಲಾಗುತ್ತದೆ. ಜಮೀನಿಗೆ ಗೊಬ್ಬರ ಹಾಕಲಾಗುತ್ತದೆ. ನಂತರ ಮನೆಯಲ್ಲಿ ಹಬ್ಬದೂಟ ಮಾಡಿ ಸವಿಯಲಾಗುತ್ತದೆ. ಕೃಷಿ ಕ್ಷೇತ್ರಕ್ಕೆ ಯಂತ್ರೋಪಕರಣ, ವಾಹನಗಳು ಪ್ರವೇಶ ಮಾಡಿದರೂ ಎತ್ತುಗಳಿಗೆ ಪೂಜೆ ಸಲ್ಲಿಸಿ ಉಳುಮೆ ಆರಂಭಿಸುವ ಹೊನ್ನೇರು ಧಾರ್ಮಿಕವಾಗಿ ಮಹತ್ವವನ್ನು ಪಡೆದುಕೊಂಡಿದೆ.
