ಕಷ್ಟ ನಿವಾರಿಸುವ ಶಕ್ತಿ ಕೇಂದ್ರಈ ದೇಗುಲದಲ್ಲಿ ಶನೈಶ್ಚರಸ್ವಾಮಿ ಮೂರ್ತಿ ಒಳಗೊಂಡಂತೆ ಲಿಂಗಮೂರ್ತಿ, ನವಗ್ರಹ, ಮುರುಗ ಹಾಗೂ ವಿಘ್ನೇಶ್ವರ ಮೂರ್ತಿಯನ್ನು ಪೂಜಿಸಲಾಗುತ್ತಿದೆ. ಮಕ್ಕಳಾಗದವರು, ಮಾಟ ಮಂತ್ರದ ದೋಷಕ್ಕೆ ಒಳಗಾದವರು, ವ್ಯಾಪಾರ, ಕೃಷಿಯಲ್ಲಿ ನಷ್ಟ ಹಾಗೂ ಕುಟುಂಬದಲ್ಲಿ ಕಷ್ಟ ಎದುರಿಸುತ್ತಿರುವರರ ಹೆಚ್ಚಿನ ಭಕ್ತರು ಇಲ್ಲಿಗೆ ಆಗಮಿಸಿ ಹರಕೆ ಹೊತ್ತು ಪೂಜೆ ಸಲ್ಲಿಸುತ್ತಾರೆ. ಇಷ್ಟಾರ್ಥ ಸಿದ್ಧಿಗಾಗಿ ಭಕ್ತಿಯಿಂದ ಕೋರಿಕೆ ಸಲ್ಲಿಸಿದರೆ ಕಷ್ಟ ನಿವಾರಣೆಯಾಗುತ್ತದೆ ಎಂಬುದು ಭಕ್ತರ ಮನದಲ್ಲಿದ್ದು, ಅದರಂತೆಯೇ ನಡೆಯುತ್ತಿದೆ. ಹಾಗಾಗಿ ಈ ದೇಗುಲಕ್ಕೆ ಹನೂರು ಭಾಗದ ಭಕ್ತರು ಸೇರಿದಂತೆ ಬೆಂಗಳೂರು, ಮೈಸೂರು, ಮಂಡ್ಯ ಹಾಗೂ ತಮಿಳುನಾಡಿನ ತಿರುಪೂರ್, ಕೊಯಮತ್ತೂರು, ಸತ್ತಿ ಹಾಗೂ ಈರೋಡ್ನಿಂದ ಆಗಮಿಸುತ್ತಾರೆ. ಅಂತೆಯೇ ಪ್ರತಿ ವರ್ಷ ಭಕ್ತರ ಸಂಖ್ಯೆ ಹೆಚ್ಚಾಗುತ್ತಿದೆ. ಮನದಲ್ಲಿ ಅಂದುಕೊಂಡ ಆಶಯ ಈಡೇರಿದೊಡನೆ ಆಗಮಿಸುವ ಭಕ್ತರು ದೇಗುಲದಲ್ಲಿ ವಿಶೇಷ ಪೂಜೆ ಸಲ್ಲಿಸುವುದರ ಜತೆಗೆ ಮುಂಭಾಗದಲ್ಲಿನ ಅರಳಿ ಹಾಗೂ ಬೇವಿನಮರಕ್ಕೆ ಪೂಜೆ ನೆರವೇರಿಸುವ ಕಾರ್ಯ ಇಂದಿಗೂ ಮುಂದುವರಿದಿದೆ. ಹಾಗಾಗಿ ಈ ದೇಗುಲ ಪ್ರಸಿದ್ಧಿ ಪಡೆದುಕೊಂಡಿದೆ.
