ನಾಡಪ್ರಭು ನಗರ ಯೋಜನೆ ಅಧ್ಯಯನವಾಗಲಿ

ನಗರದ ಡಾ.ರಾಜ್‌ಕುಮಾರ್ ರಂಗಮಂದಿರದಲ್ಲಿ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯಿತಿ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಯೋಗದಲ್ಲಿ ಮಂಗಳವಾರ ಆಯೋಜಿಸಿದ್ದ ನಾಡಪ್ರಭು ಕೆಂಪೇಗೌಡ ಜಯಂತಿ ಕಾರ್ಯಕ್ರಮದಲ್ಲಿ ಮುಖ್ಯಭಾಷಣ ಮಾಡಿದರು. ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರು ನಗರ ವಿನ್ಯಾಸ(ಟೌನ್ ಪ್ಲಾನಿಂಗ್) ಕಾಲೇಜು ಪ್ರಾರಂಭಿಸುವುದಾಗಿ ತಿಳಿಸಿರುವುದು ಸ್ವಾಗತಾರ್ಹ. ನಗರ ಯೋಜನೆಗಾಗಿ ಕೆಂಪೇಗೌಡರು ತಯಾರಿಸಿದ ನೀಲನಕ್ಷೆ ಸರ್ವಕಾಲಕ್ಕೂ ಮಾದರಿ. ಈ ಹಿನ್ನೆಲೆಯಲ್ಲಿ ಕೆಂಪೇಗೌಡರ ನಗರ ಯೋಜನಾ ಕ್ರಮಗಳನ್ನು ಮುಂದಿನ ಪೀಳಿಗೆಗೆ ತಲುಪಿಸುವ ಅಗತ್ಯವಿದೆ. ನಗರ ಮತ್ತು ಗ್ರಾಮ ಬೆಳೆಯಲು ಕೆಂಪೇಗೌಡರು ಅನುಸರಿಸಿದ ನೀರಾವರಿ ಅಭಿವೃದ್ಧಿಯ ಕ್ರಮಗಳು ಅಧ್ಯಯನವಾಗಬೇಕಾಗಿದೆ ಎಂದು ತಿಳಿಸಿದರು.

ಬೆಂಗಳೂರು ಇಲ್ಲದ ಕರ್ನಾಟಕವನ್ನು ಗ್ರಹಿಸಲು ಮತ್ತು ಊಹಿಸಲು ಸಾಧ್ಯವಿಲ್ಲ. ರಾಜಕೀಯ ಶಕ್ತಿ ಕೇಂದ್ರ, ಐಟಿ-ಬಿಟಿ, ಉದ್ಯಾನಗಳ ಜಾಲ, ಊರಿನ ಉದ್ದಗಲಕ್ಕೂ ನೀರಿನ ಸೆಲೆಗಳಾದ ಕೆರೆಗಳು, ಸಾಂಸ್ಕೃತಿಕ ಅಸ್ಮಿತೆಯಾಗಿ, ದೊಡ್ಡ ವಾಣಿಜ್ಯ ಕೇಂದ್ರವಾಗಿ ಬೆಂಗಳೂರು ಬೆಳೆದಿದೆ. ಇಂದಿನ ವಿಶ್ವ ಬಂಡವಾಳ ಹೂಡಿಕೆಯ ಸಮಾವೇಶದ ಪರಿಕಲ್ಪನೆಯನ್ನು ಕೆಂಪೇಗೌಡರು ಆಗಲೇ ಹೊಂದಿದ್ದರು. ಭೂಮಿ, ಮೂಲಸೌಕರ್ಯಗಳನ್ನು ಕೊಟ್ಟು ಮಾನವ ಸಂಪನ್ಮೂಲವನ್ನು ಒದಗಿಸುವ ಕಾರ್ಯವನ್ನು ಮಾಡಿದರು. ಕಸುಬು ಆಧಾರಿತ ಸಮುದಾಯಗಳಿಗಾಗಿ ಪೇಟೆಗಳನ್ನು ಕಟ್ಟಿ ಸಣ್ಣ ವ್ಯಾಪಾರಿಗಳೂ ಆರ್ಥಿಕ ಚಟುವಟಿಕೆಯಲ್ಲಿ ತೊಡಗುವಂತೆ ಮಾಡಿದರು. ಕುವೆಂಪು ಅವರ ವಿಶ್ವ ಮಾನವ ಸಂದೇಶವನ್ನು ಅವರಿಗೂ ಮೊದಲೇ ಕೆಂಪೇಗೌಡರು ಸಾರಿದ್ದರು. ಎಲ್ಲ ಸಮುದಾಯಗಳು ಬೆಂಗಳೂರಿನಲ್ಲಿ ನೆಲೆ ನಿಲ್ಲುವಂತೆ ಮಾಡಿದರು. ನಗರ ಸಮಾಜದೊಂದಿಗೆ ಗ್ರಾಮ ಸಮಾಜಗಳೂ ಬೆಳೆಯಬೇಕೆಂಬ ಉದ್ದೇಶವನ್ನು ಹೊಂದಿದ್ದರು. ವಿಜಯನಗರ ಸಾಮ್ರಾಜ್ಯದ ಅಧಿಕಾರ ವಿಕೇಂದ್ರೀಕರಣದಲ್ಲಿ ಕೆಂಪೇಗೌಡರು ಸ್ಥಳೀಯ ಆಡಳಿತವನ್ನು ಯೋಜನಾ ಬದ್ಧವಾಗಿ ಮಾಡಿದರು. ಬೇರೆ ರಾಜ್ಯಗಳ ರಾಜಧಾನಿಗಳು ಸಮುದ್ರದ ದಡದಲ್ಲಿವೆ. ಅತಿವೃಷ್ಟಿಯಾದರೆ ರಾಜಧಾನಿಗಳು ಮುಳುಗಡೆಯಾಗುತ್ತವೆ. ಆದರೆ ಬೆಂಗಳೂರು ಎತ್ತರದ ಪ್ರದೇಶದಲ್ಲಿದ್ದು, ಇದಕ್ಕೆ ಸಮುದ್ರದ ಅತಿವೃಷ್ಟಿ ಕಾಡುವುದಿಲ್ಲ. ಕೆಂಪೇಗೌಡರ ದೂರದೃಷ್ಟಿಯಿಂದ ರಾಜ್ಯಕ್ಕೆ ಸುರಕ್ಷಿತ ರಾಜಧಾನಿ ಸಿಕ್ಕಂತಾಯಿತು ಎಂದರು.

ಗುಂಡ್ಲುಪೇಟೆ ಶಾಸಕ ಎಚ್.ಎಂ.ಗಣೇಶ್‌ಪ್ರಸಾದ್ ಮಾತನಾಡಿ, ಕೆಂಪೇಗೌಡರ ಆದರ್ಶಗಳನ್ನು ಅನುಸರಿಸುವ ಮೂಲಕ ಅವರಿಗೆ ಗೌರವ ತಂದುಕೊಡಬೇಕು ಎಂದು ಹೇಳಿದರು. ಜಿಲ್ಲಾ ಗ್ಯಾರಂಟಿ ಯೋಜನೆ ಅನುಷ್ಠಾನ ಪ್ರಾಧಿಕಾರದ ಅಧ್ಯಕ್ಷ ಎಚ್.ವಿ.ಚಂದ್ರು ಮಾತನಾಡಿ, ಕೆಂಪೇಗೌಡರ ದೂರದೃಷ್ಟಿ ರಾಜಕಾರಣಿಗಳಿಗೂ ಇರಬೇಕು. ಮಾಜಿ ಸಚಿವರಾದ ದಿವಂಗತ ಎಚ್.ಎಸ್.ಮಹದೇವಪ್ರಾದ್, ಆರ್.ಧ್ರುವನಾರಾಯಣ್ ಮತ್ತು ಶಾಸಕ ಸಿ.ಪುಟ್ಟರಂಗಶೆಟ್ಟಿ ಅವರ ದೂರದೃಷ್ಟಿಯ ಲವಾಗಿ ಚಾಮರಾಜನಗರದ ಹೊರವಲಯಗಳಲ್ಲಿ ಮೆಡಿಕಲ್ ಕಾಲೇಜು, ಇಂಜಿನಿಯರಿಂಗ ಕಾಲೇಜುಗಳು ಸ್ಥಾಪನೆಯಾಗಿವೆ. ಭವಿಷ್ಯದಲ್ಲಿ ನಗರದ ಅಭಿವೃದ್ಧಿಗೆ ಇದು ಸಹಕಾರಿಯಾಗಲಿದೆ ಎಂದು ಅಭಿಪ್ರಾಯಪಟ್ಟರು. ಜಿಲ್ಲಾಧಿಕಾರಿ ಶ್ರೀರೂಪಾ ಮಾತನಾಡಿ, ಕೆಂಪೇಗೌಡರು ಪಾರದರ್ಶಕವಾದ ಆಡಳಿತವನ್ನು ನೀಡಿದರು. ಜಾತಿ ಧರ್ಮಗಳಿಗೆ ಸೀಮಿತವಾಗಿರದೆ ಸರ್ವರ ಅಭಿವೃದ್ಧಿಗಾಗಿ ಶ್ರಮಿಸಿದರು ಎಂದರು.

ಚಾಮರಾಜನಗರ-ರಾಮಸಮುದ್ರ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಮಹಮ್ಮದ್ ಅಸ್ಗರ್(ಮುನ್ನ), ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಎಂ.ಮುತ್ತುರಾಜು ಮಾತನಾಡಿದರು. ಒಕ್ಕಲಿಗ ಸಮುದಾಯದ ಮುಖಂಡರಾದ ಪಣ್ಯದಹುಂಡಿ ರಾಜು, ಸೋಮಶೇಖರ್, ನಾಗೇಂದ್ರ, ಮಹೇಶ್‌ಗೌಡ, ಚಿಕ್ಕತಾಯಮ್ಮ, ಶ್ರೀನಿವಾಸಗೌಡ, ರವಿಗೌಡ, ಜಿಲ್ಲಾ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ರಾಜು, ಕಲೆ ನಟರಾಜು ಮತ್ತು ಇತರರು ಹಾಜರಿದ್ದರು.

ಎಲ್ಲ ಜಾತಿ, ಧರ್ಮ, ಭಾಷೆಗಳ ಜನರು ವಾಸ ಮಾಡುತ್ತಿರುವ ಬೆಂಗಳೂರು ನಿಜವಾದ ಸರ್ವ ಜನಾಂಗದ ಶಾಂತಿಯ ತೋಟವಾಗಿದೆ ಎಂದು ಕಾವೇರಿ ಜಲಾನಯನ ಅಚ್ಚುಕಟ್ಟು ಪ್ರದೇಶಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಪಿ.ಮರಿಸ್ವಾಮಿ ಹೇಳಿದರು.

ಇಂತಹ ನಾಡು ಕಟ್ಟಿದ ಕೆಂಪೇಗೌಡರು ಬಾಲ್ಯದಲ್ಲೇ ತೀಕ್ಷ್ಮಮತಿಯಾಗಿದ್ದರು. ವಿಜಯನಗರ ಸಾಮ್ರಾಜ್ಯದಂತಹ ನಗರ ಕಟ್ಟಬೇಕೆಂಬ ಹಂಬಲವನ್ನು ಹೊಂದಿದ್ದರು. ಇದರ ಲವಾಗಿ ಮಹಾ ನಗರ ಬೆಂಗಳೂರು ನಿರ್ಮಾಣವಾಯಿತು. ಬೆಂಗಳೂರು ಅಭಿವೃದ್ಧಿಗೆ ವಿಶಿಷ್ಟ ರಾಜತಾಂತ್ರಿಕ ನೀತಿ ಅನುಸರಿಸಿದರು. 64 ಪೇಟೆಗಳನ್ನು ನಿರ್ಮಾಣ ಮಾಡಿ ವಸತಿ ಮತ್ತು ವೃತ್ತಿ ಆಧಾರಿತ ವ್ಯಾಪಾರಿ ಸ್ಥಳಗಳನ್ನು ಕಟ್ಟಿದರು. ಇದು ಬೆಂಗಳೂರಿನ ಆರ್ಥಿಕ ಬೆಳವಣಿಗೆಗೆ ಸಹಕಾರಿಯಾಯಿತು. ಕುಡಿಯುವ ನೀರಿಗಾಗಿ ಕೆರೆಗಳನ್ನು ನಿರ್ಮಾಣ ಮಾಡಿದರು. ಪ್ರಸ್ತುತ ಬೆಂಗಳೂರು ಪ್ರಪಂಚನದ ದೊಡ್ಡ ನಗರಗಳಲ್ಲಿ ಒಂದಾಗಿದೆ ಎಂದರು.

ರಾಜ್ಯಕ್ಕೆ ಶೇ.50ರಷ್ಟು ಆದಾಯ ತಂದುಕೊಡುತ್ತಿರುವ ಬೆಂಗಳೂರನ್ನು ನಿರ್ಮಾಣ ಮಾಡಿದ ಕೆಂಪೇಗೌಡರ ಜಯಂತಿ ದಿನದಂದು ಸರ್ಕಾರಿ ರಜೆ ೋಷಣೆ ಮಾಡಬೇಕು. ಚಾಮರಾಜನಗರದಲ್ಲಿ ಕೆಂಪೇಗೌಡ ಮತ್ತು ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ಪುತ್ಥಳಿಗಳನ್ನು ನಿರ್ಮಾಣ ಮಾಡಬೇಕೆಂದು ಸಮಾರಂಭದಲ್ಲಿ ಮಾತನಾಡಿದ ಒಕ್ಕಲಿಗರ ಸಂಘದ ಅಧ್ಯಕ್ಷ ಪುಟ್ಟಸ್ವಾಮಿಗೌಡ ಒತ್ತಾಯಿಸಿದರು.

ಬೆಂಗಳೂರಿನಲ್ಲಿರುವ ಕೆರೆ ಕಟ್ಟೆಗಳು ನಗರದ ಭವಿಷ್ಯದ ಪ್ರತೀಕವಾಗಿ ಸ್ಥಾಪನೆಗೊಂಡವು. ಇವುಗಳನ್ನು ನಿರ್ಮಾಣ ಮಾಡಿದ ನಾಡಪ್ರಭು ಕೆಂಪೇಗೌಡರು ಜನಪರ ಆಡಳಿತ ನೀಡಿದರು. ಅವರ ಆದರ್ಶಗಳನ್ನು ನಾವೆಲ್ಲರೂ ಪಾಲನೆ ಮಾಡಿ ಮೌಲ್ಯಕ್ಕೆ ಬೆಲೆ ಕೊಡಬೇಕು.