ಚಿರತೆ ದಾಳಿ ಮೂರು ಜಾನುವಾರು ಸಾವು

ಗಂಗವಾಡಿ ಗ್ರಾಮದ ಹೊರವಲಯದಲ್ಲಿರುವ ರಾಮಯ್ಯ ಅವರ ಜಮೀನಿನಲ್ಲಿರುವ ಕೊಟ್ಟಿಗೆಯಲ್ಲಿ ನಾಲ್ಕು ಕರುಗಳು ಹಾಗೂ 5 ಹಸುಗಳನ್ನು ಕಟ್ಟಿ ಹಾಕಲಾಗಿತ್ತು. ರಾತ್ರಿ ಇವರು ಅನಾರೋಗ್ಯದ ನಿಮಿತ್ತ ಅಲ್ಲಿ ಮಲಗಿರಲಿಲ್ಲ. ಈ ಸಂದರ್ಭದಲ್ಲಿ ಚಿರತೆ ದಾಳಿ ನಡೆಸಿದೆ. ಶೀಟ್‌ನಿಂದ ನಿರ್ಮಿಸಿದ್ದ ಕೊಟ್ಟಿಗೆಯ ಸುತ್ತ ಇವರು ತಂತಿ ಬೇಲಿಯನ್ನು ಹಾಕಿದ್ದರು. ತಂತಿ ಬೇಲಿ ಮೇಲಿಂದ ಚಿರತೆ ಹಾರಿ ಒಳಕ್ಕೆ ಬಂದಿದೆ. ಕಟ್ಟಿ ಹಾಕಿದ್ದ ಹಸು, ಕರುಗಳ ಕುತ್ತಿಗೆ ಭಾಗವನ್ನು ಹಿಡಿದು ರಕ್ತ ಹೀರಿದೆ. ಆದರೆ ಕರುಗಳನ್ನು ಕಟ್ಟಿದ್ದರಿಂದ ಇದನ್ನು ಇಲ್ಲೇ ಬಿಟ್ಟು ಹೋಗಿದೆ. ಭಾನುವಾರ ಬೆಳಗ್ಗೆ ಇವರು ಕೊಟ್ಟಿಗೆಗೆ ಎಂದಿನಂತೆ ಹೋಗಿ ನೋಡಿ ಗಾಬರಿಗೊಂಡ ಇವರು ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದ್ದಾರೆ.

ಶಾಸಕ ಭೇಟಿ, ನೆರವು ಕೊಡಿಸುವ ಭರವಸೆ: ಸ್ಥಳಕ್ಕೆ ಶಾಸಕ ಎ.ಆರ್.ಕೃಷ್ಣಮೂರ್ತಿ ಭಾನುವಾರ ಘಟನಾ ಸ್ಥಳಕ್ಕೆ ಭೇಟಿ ನೀಡಿದ್ದರು. ಈ ಸಂದರ್ಭದಲ್ಲಿ ಗ್ರಾಮಸ್ಥರು ಇಲ್ಲಿ ನಿರಂತರವಾಗಿ ಚಿರತೆ ಸೇರಿದಂತೆ ಕಾಡುಪ್ರಾಣಿಗಳ ದಾಳಿ ನಡೆಯುತ್ತಿದೆ. ಇತ್ತೀಚೆಗೆ ಐದಾರು ಬಾರಿ ದಾಳಿ ನಡೆಸಿ, ಹಸು, ಕರು, ಕುರಿಗಳನ್ನು ಬಲಿ ಪಡೆದಿದೆ. ಇದಕ್ಕೆ ಅರಣ್ಯ ಇಲಾಖೆಯ ನಿರ್ಲಕ್ಷೃವೇ ಕಾರಣವಾಗಿದೆ.

ಇದು ಕಾಡಂಚಿನ ಗ್ರಾಮವಾಗಿದ್ದು ರೈತರು ತಮ್ಮ ಜಮೀನುಗಳಿಗೆ ತೆರಳಲು ಹಿಂದೇಟು ಹಾಕುವ ಸ್ಥಿತಿ ಇದೆ. ಇದನ್ನು ಹಿಡಿದು ಕಾಡಿಗೆ ಬಿಡಬೇಕು. ರಾತ್ರಿ ವೇಳೆ ಇಲಾಖೆ ಸಿಬ್ಬಂದಿ ಗಸ್ತು ತಿರುಗಬೇಕು. ಕಾಡಿನ ಪ್ರಾಣಿಗಳು ನಾಡಿಗೆ ಬರದಂತೆ ಎಚ್ಚರಿಕೆ ವಹಿಸಬೇಕು ಎಂದು ಮನವಿ ಮಾಡಿದರು. ಇದಕ್ಕೆ ಶಾಸಕ ಎ.ಆರ್.ಕೃಷ್ಣಮೂರ್ತಿ ಬಿಆರ್‌ಟಿ ಹುಲಿ ಯೋಜನೆ ನಿರ್ದೇಶಕ ಶಿಶ್ರಪತಿ ಅವರಿಗೆ, ಕೂಡಲೇ ಇಲ್ಲಿ ಬೋನನ್ನು ಇರಿಸಬೇಕು. ಕಾಡುಪ್ರಾಣಿಗಳ ಉಪಟಳ ಕಡಿಮೆ ಮಾಡುವ ನಿಟ್ಟಿನಲ್ಲಿ ರೈತರಿಗೆ ಸಹಕರಿಸಬೇಕು. ಇಲಾಖೆಯಿಂದ ಲಭಿಸುವ ಪರಿಹಾರ ನೀಡಬೇಕು ಎಂದು ಸೂಚನೆ ನೀಡಿದರು. ವೈಯಕ್ತಿಕವಾಗಿಯೂ ಶಾಸಕರು ಸಂತ್ರಸ್ತರಿಗೆ ಧನಸಹಾಯ ಮಾಡಿದರು.

ಕೂಂಬಿಂಗ್‌ಗೆ ಸಿದ್ಧತೆ: ಅರಣ್ಯ ಇಲಾಖೆ ವತಿಯಿಂದ ಚಿರತೆ ಸೆರೆ ಹಿಡಿಯಲು ಬೋನನ್ನು ಇರಿಸಲಾಗಿದ್ದು, ಇದರ ಚಲನವನ್ನುಗಳನ್ನು ಗ್ರಹಿಸಲು, ಎರಡು ಕಡೆ ಕ್ಯಾಮರಾಗಳನ್ನು, ಇಡಲಾಗಿದೆ. ಜತೆಗೆ ಡ್ರೋನ್ ಕ್ಯಾಮರಾದ ನೆರವನ್ನು ಪಡೆಯಲಾಗುತ್ತಿದ್ದು ಭಾನುವಾರ ಕೂಂಬಿಂಗ್ ನಡೆಸಲು ಕೂಡ ಕ್ರಮ ವಹಿಸಲಾಗಿದೆ.

ಎಸಿಎಫ್ ಪ್ರಕಾಶ್ಕರ್ ಅಕ್ಷಯ್‌ಅಶೋಕ್, ಆರ್‌ಎಫ್‌ಒ ಸತೀಶ್, ಪಿಎಸ್‌ಐ ಆಕಾಶ್, ಮುಖಂಡರಾದ ಕಂದಹಳ್ಳಿ ನಂಜುಂಡಸ್ವಾಮಿ, ವಸಂತಾ ರೇವಣ್ಣ, ರೂಪೇಶ್ ಸೇರಿದಂತೆ ಇತರರು ಇದ್ದರು.