ಕುಂತೂರು ಗ್ರಾಮಸ್ಥರು- ತಾಪಂ ಇಒ ನಡುವೆ ಮಾತಿನ ಗಲಾಟೆ

ಲೋಕಾಯುಕ್ತ ಪ್ರಕರಣ ವೊಂದರ ವಿಚಾರಕ್ಕೆ ಸಂಬಂಧಿಸಿದಂತೆ ಇಒ ಗುರುಶಾಂತಪ್ಪ ಬೆಳ್ಳುಂಗಡಿ ತಾಲೂಕಿನ ಕುಂತೂರು ಗ್ರಾಮದ ಅಂಬೇಡ್ಕರ್ ಬಡಾವಣೆಗೆ ಬುಧವಾರ ಭೇಟಿ ನೀಡಿದ್ದರು. ಗ್ರಾಮದಲ್ಲಿ ಚರಂಡಿ ಹೂಳೆತ್ತದ ಪರಿಣಾಮ ಗಬ್ಬುನಾರುತ್ತಿದ್ದು ಬಂದು ನೋಡುವಂತೆ ನಿವಾಸಿ ಮಹೇಶ್‌ಹಾಗೂ ಮಹಿಳೆಯರು ತಿಳಿಸಿದ್ದಾರೆ. ಈ ವೇಳೆ ಕಾರಿನಲ್ಲಿಯೇ ಕುಳಿತುಕೊಂಡು ಮಾತನಾಡುತ್ತಿದ್ದ ಇಒ ಅವರನ್ನು ಮೊದಲು ಕಾರಿನಿಂದ ಇಳಿದು ಸ್ಥಳ ನೋಡುವಂತೆ ಸ್ಥಳೀಯರು ಆಗ್ರಹಿಸಿದ್ದಾರೆ. ಈ ವೇಳೆ ಮಾತಿಗೆ ಮಾತು ಬೆಳೆದಿದ್ದು, ಇಒ ನಿಂದನಾತ್ಮಕ ಪದ ಬಳಸಿ ಬೈಯ್ದಿದ್ದಕ್ಕೆ ನಿವಾಸಿಗಳು ತರಾಟೆಗೆ ತೆಗೆದುಕೊಂಡಿದ್ದಾರೆ. ನಂತರ, ಇಒ ಸ್ಥಳಕ್ಕೆ ಭೇಟಿ ನೀಡಿ ಚರಂಡಿ ಸ್ವಚ್ಛಗೊಳಿಸುವಂತೆ ಪಿಡಿಒ ಗೆ ಸೂಚನೆ ನೀಡಿದ್ದಾರೆ. ನಿವಾಸಿಗಳು ಹಾಗೂ ಇಒ ನಡುವೆ ನಡೆದಿರುವ ಮಾತಿನ ಗಲಾಟೆ ವಿಡಿಯೋ ವೈರಲ್ ಆಗಿದೆ.

ಗ್ರಾಮದ ಡಾ.ಬಿ.ಆರ್. ಅಂಬೇಡ್ಕರ್ ಬಡಾವಣೆಯಲ್ಲಿ 1 ವರ್ಷದಿಂದ ಚರಂಡಿಯಲ್ಲಿನ ಹೂಳು ತೆಗೆದು ಸ್ವಚ್ಛಗೊಳಿಸಿಲ್ಲ. ಕುಂತೂರು ಪಿಡಿಒ ಅವರಿಗೆ ದೂರು ನೀಡಿದರೂ ಪ್ರಯೋಜನವಾಗಿಲ್ಲ. ಈ ನಡುವೆ ಗ್ರಾಮಕ್ಕೆ ಬಂದ ತಾ.ಪಂ ಇಒ ಕಾರಲ್ಲೇ ಕುಳಿತು ಉತ್ತರ ನೀಡುತ್ತಿದ್ದರು. ಮೊದಲು ಕಾರಿನಿಂದ ಕೆಳಗಿಳಿದು ಸಮಸ್ಯೆ ನೋಡಿ ಎಂದಾಗ ಮಾತಿಗೆ ಮಾತಿ ಬೆಳೆಯಿತು. ಈ ನಡುವೆ ಶಾಸಕರಿಗೂ ಕರೆ ಮಾಡಿ ನನಗೆ ಫೋನ್ ಕೊಟ್ಟಿದ್ದು, ಚರಂಡಿ ಸ್ವಚ್ಛಗೊಳಿಸದೆ ಸಮಸ್ಯೆಯಾಗಿದೆ ಎಂದು ಶಾಸಕರ ಬಳಿ ದೂರಿದೆ. ನಂತರ, ಇಒ ಚರಂಡಿ ವೀಕ್ಷಣೆ ಮಾಡಿದರು. ಸಮಸ್ಯೆಯನ್ನು ಕಾರಿನಿಂದ ಇಳಿದು ನೋಡಿ ಎಂದಿದ್ದಕ್ಕೆ ದಾದಾಗಿರಿ ಮಾಡ್ತಿದ್ದೀಯಾ ಎಂದರಲ್ಲದೆ, ನನಗೆ ಅವ್ಯಾಚ ಶಬ್ದದಿಂದ ನಿಂದಿಸಿದ್ದಾರೆ. ಇನ್ನು ಕುಂತೂರು ಪಂಚಾಯಿತಿ ಕಾರ್ಯದರ್ಶಿ ಮಹಿಳೆಯರು ಎದುರು ಬಯ್ದಿದ್ದಾರೆ. ಇವರ ಮೇಲೆ ಕ್ರಮವಾಗಬೇಕು ಎಂದು ಕುಂತೂರು ನಿವಾಸಿ ಮಹೇಶ್ ಹೇಳಿದರು.

ಘಟನೆ ಬಂಬಂಧ ಇಒ ಗುರುಶಾಂತಪ್ಪ ಬೆಳ್ಳುಂಗಡಿ ಅವರನ್ನು ಸಂಪರ್ಕಿಸಿದಾಗ ಪ್ರತಿಕ್ರಿಯಿಸಲಿಲ್ಲ. ಕುಂತೂರು ಪಂಚಾಯಿತಿ ಪಿಡಿಒ ಮಲ್ಲೇಶ್, ಸತೀಶ್, ಮೈಕಲ್ ಮತ್ತಿತರರಿದ್ದರು.