ಕಾಳನಹುಂಡಿ ಸರ್ಕಾರಿ ಶಾಲೆ ಶಿಥಿಲ

ಸುಮಾರು 1928ರಲ್ಲಿ ಸ್ಥಾಪನೆಯಾಗಿರುವ ಈ ಶಾಲೆಗೆ ಶತಮಾನದ ಹೊಸ್ತಿಲಿನಲ್ಲಿದೆ. ಇಲ್ಲಿ ಓದಿದ ಎಷ್ಟೋ ವಿದ್ಯಾರ್ಥಿಗಳು ದೊಡ್ಡ ಹುದ್ದೆ, ಸಮಾಜದಲ್ಲಿ ಸಾಧನೆ ಮಾಡಿದ್ದಾರೆ. ಅಲ್ಲದೇ ಗ್ರಾಮಕ್ಕೂ ಶಾಲೆಗೂ ಅವಿನಾಭಾವ ನಂಟಿದೆ. ಈ ಬೆಸುಗೆಯಿಂದಲೇ ಶಾಲೆಯಲ್ಲಿ 1ರಿಂದ 8ನೇ ತರಗತಿವರೆಗೆ 150 ಮಕ್ಕಳು ಓದುತ್ತಿದ್ದಾರೆ. ಉತ್ತಮ ದಾಖಲಾತಿ ಇರುವ ಒಳ್ಳೆಯ ಶಾಲೆಯಾಗಿ ಗುರುತಿಸಿಕೊಂಡಿದ್ದರೂ ಶಿಥಿಲಾವಸ್ಥೆಯಲ್ಲಿರುವ ಕೊಠಡಿಗಳಲ್ಲಿ ಪಾಠ ಪ್ರವಚನ ನಡೆಯುತ್ತಿರುವುದು ಆಡಳಿತ ವ್ಯವಸ್ಥೆ ತಲೆತಗ್ಗಿಸುವ ವಿಚಾರ.

ಮಳೆಗೆ ಬಂದಾಗ ಕುಸಿದ ಗೋಡೆ: ಖಾಸಗಿ ಶಾಲೆಗಳ ಪೈಪೋಟಿ, ಪಾಲಕರಿಗೆ ಇಂಗ್ಲೀಷ್ ಮೇಲಿನ ವ್ಯಾಮೋಹದ ನಡುವೆಯೂ ಕಾಳನಹುಂಡಿ ಸರ್ಕಾರಿ ಶಾಲೆ ಉತ್ತಮ ದಾಖಲಾತಿ ಹೊಂದಿದೆ.

ಶಾಲೆಯಲ್ಲಿ 7 ಕೊಠಡಿಗಳಿವೆ. 2023ರಲ್ಲಿ ಒಂದು ಕೊಠಡಿ ಮಳೆಯಿಂದ ಹಾನಿಯಾಗಿ ಕುಸಿದು ಬಿತ್ತು. ಅದೃಷ್ಟವಾತ್ ರಾತ್ರಿ ವೇಳೆ ಗೋಡೆ ಕುಸಿದಿದ್ದರಿಂದ ಶಿಕ್ಷಕರು ಮತ್ತು ಮಕ್ಕಳ ಜೀವಕ್ಕೆ ಅಪಾಯವಾಗಲಿಲ್ಲ. ಅಂದಿನಿಂದ ಈವರೆಗೂ ಕೊಠಡಿಯ ರಿಪೇರಿ ಅಥವಾ ನೂತನ ಕಟ್ಟಡ ನಿರ್ಮಾಣದ ಕಾರ್ಯ ಮಾಡಲೇ ಇಲ್ಲ. ಈ ಸಂಬಂಧ ಶಾಲೆಯ ಮುಖ್ಯಶಿಕ್ಷಕರು ಮತ್ತು ಗ್ರಾಮಸ್ಥರು ಜನಪ್ರತಿನಿಧಿಗಳಿಗೆ ಮತ್ತು ಅಧಿಕಾರಿಗಳಿಗೆ ಮನವಿ ಸಲ್ಲಿಸಿ ಬೇಸತ್ತು ಸುಮ್ಮನಾಗಿದ್ದಾರೆ. ಪಾಳುಬಿದ್ದಿರುವ ಕೊಠಡಿ ಶಾಲೆಯೊಳಗೆ ಇರುವುದನ್ನು ನೋಡಿದರೆ ಶಿಕ್ಷಣ ಆಡಳಿತ ವ್ಯವಸ್ಥೆಯೂ ಕುಸಿದಿರುವುದುನ್ನು ತೋರಿಸುತ್ತದೆ.

ಶಾಲೆಯ ಆವರಣದಲ್ಲಿ 4 ಕೊಠಡಿಗಳ ಮೇಲೆ ಅಳವಡಿಸಿರುವ ಮರದ ಪಟ್ಟಿಗಳು ಹಳೆಯದಾಗಿದ್ದು, ಅಲ್ಲಲ್ಲಿ ಮುರಿದುಹೋಗಿವೆ. ಮರದ ಪಟ್ಟಿಗಳ ಮೇಲೆ ಹೆಂಚನ್ನು ಕೂರಿಸಲಾಗಿದೆ. ಹಲವು ವರ್ಷಗಳ ಹಿಂದೆ ಇದೇ ರೀತಿ ತರಗತಿ ನಡೆಯುತ್ತಿದ್ದಾಗಲೇ ಮೇಲಿಂದ ಮರದ ಪಟ್ಟಿ ಕೆಳಗೆ ಕಳಚಿಕೊಂಡು ಬಿದ್ದಿತ್ತು. ವಿದ್ಯಾರ್ಥಿಯೊಬ್ಬನ ತಲೆಗೆ ಗಾಯವಾಗಿತ್ತು ಎಂದು ಹಳೆಯ ವಿದ್ಯಾರ್ಥಿಗಳು ನೆನಪು ಮಾಡಿಕೊಳ್ಳುತ್ತಾರೆ. ಮಳೆ ಬಂದರೆ ಒಂದೆರಡು ಕೊಠಡಿಗಳ ಒಳಗೆ ಹನಿ ಬೀಳುತ್ತದೆ. ಗಾಳಿ, ಮಳೆ ಜೋರಾದರೆ ಛಾವಣಿ ಯಾವ ಸಂದರ್ಭದಲ್ಲಿ ಬೇಕಾದರೂ ಮಕ್ಕಳ ಮೇಲೆ ಬೀಳಬಹುದು.

4 ಕೊಠಡಿಗಳ ಹಿಂಭಾಗದ ಗೋಡೆಯ ಮಣ್ಣು ಕೊರೆದುಹೋಗಿ ಶಿಥಿಲಗೊಂಡಿದೆ. ಈ ಗೋಡೆಗಳ ಒಳಗಿರುವ ತರಗತಿಯಲ್ಲಿ ಮಕ್ಕಳು ಪಾಠ ಕೇಳುತ್ತಿದ್ದಾರೆ. ಕಿಟಕಿಗಳು ಹಾಳಾಗಿವೆ. ಮಳೆಗಾಲದೊಳಗೆ ಶಾಲೆಯ ಹಿಂಭಾಗದ ಗೋಡೆಯನ್ನು ತಾತ್ಕಾಲಿಕವಾಗಿಯಾದರೂ ರಿಪೇರಿ ಮಾಡಿಸಿದರೆ ಒಳ್ಳೆಯದು.

ಕಾಳನಹುಂಡಿ ಗ್ರಾಮದ ಸರ್ಕಾರಿ ಶಾಲೆ ಸುತ್ತಮುತ್ತಲ ಸರ್ಕಾರಿ ಶಾಲೆಗಳಿಗೆ ಮಾದರಿಯಾಗಿದೆ. ಪಕ್ಕದ ಕಲ್ಪುರದಲ್ಲಿ ಸರ್ಕಾರಿ ಶಾಲೆಯಲ್ಲಿ ದಾಖಲಾತಿ ಕುಸಿದು ಮುಚ್ಚುವ ಸ್ಥಿತಿ ಬಂತು. ಬೇರೆ ಗ್ರಾಮಗಳ ಸರ್ಕಾರಿ ಶಾಲೆಗಳಲ್ಲೂ ಮಕ್ಕಳ ಸಂಖ್ಯೆ ಕಡಿಮೆ ಇದೆ. ಕಾಳನಹುಂಡಿ ಗ್ರಾಮಕ್ಕೆ ಖಾಸಗಿ ಶಾಲೆಗಳು ಬಸ್ ಸೌಲಭ್ಯವನ್ನು ನೀಡುತ್ತಿವೆ. ಇಲ್ಲಿಂದ ಹಲವು ಮಕ್ಕಳು ಖಾಸಗಿ ಶಾಲೆಗಳಿಗೆ ಹೋಗುತ್ತಿದ್ದಾರೆ. ಆದರೂ ಸರ್ಕಾರಿ ಶಾಲೆಯಲ್ಲಿ ದಾಖಲಾತಿ ಅಧಿಕವಾಗಿಯೇ ಇದೆ. ಇಂತಹ ಶಾಲೆಗೆ ಸೌಲಭ್ಯವನ್ನು ಕೊಡದೆ ಇರುವುದು ನಾಚಿಕೆಗೇಡಿನ ಸಂಗತಿ.

ಕೆಲವು ವರ್ಷಗಳ ಹಿಂದೆ ಶಾಲೆಯಲ್ಲಿ ಕೊಠಡಿ ನಿರ್ಮಾಣ ಮಾಡಲು ಕಾಮಗಾರಿ ಶುರು ಮಾಡಲಾಗಿತ್ತು. ಆದರೆ ಇದ್ದಕ್ಕಿದ್ದಂತೆಯೇ ಜಾಗದ ಕೊರತೆಯ ಕಾರಣ ಹೇಳಿ ಕೊಠಡಿ ನಿರ್ಮಾಣ ಮಾಡಲಿಲ್ಲ. ಈಗ ಹೊಸದಾಗಿ ಕಟ್ಟಡ ನಿರ್ಮಾಣ ಮಾಡದೆ ಇದ್ದರೆ ಸರ್ಕಾರಿ ಶಾಲೆಯ ಅವ್ಯವಸ್ಥೆಯ ಬಗ್ಗೆ ಸಮಾಜದ ಎದುರು ಮರ್ಯಾದೆ ಹೋಗುತ್ತದೆ.

ನಮ್ಮ ಶಾಲೆಯ ತರಗತಿ ಕೊಠಡಿಗಳ ಛಾವಣಿ ಹಾಳಾಗಿದೆ. ಮಳೆ ಬಂದರೆ ನೀರು ಸೋರುತ್ತದೆ. ಒಂದು ಕೊಠಡಿಯ ಗೋಡೆ ಬಿದ್ದು ಹೋಗಿದೆ. ಈ ಬಗ್ಗೆ ಹನೂರಿನ ಮಣಗಳ್ಳಿ ಗ್ರಾಮದಲ್ಲಿ ನಡೆದಿದ್ದ ಮಕ್ಕಳ ಗ್ರಾಮಸಭೆಯಲ್ಲಿ ವಿಡಿಯೋ ಸಂವಾದದಲ್ಲಿ ಸಚಿವ ಪ್ರಿಯಾಂಕ್ ಖರ್ಗೆ ಅವರ ಬಳಿಯೂ ಮನವಿ ಮಾಡಿದ್ದೇನೆ.

ಮಂದಾರಾ, 8ನೇ ತರಗತಿ ವಿದ್ಯಾರ್ಥಿ