ಆಹಾರ ಸುರಕ್ಷತೆ, ಗುಣಮಟ್ಟ ಪರಿಶೀಲನೆ

ಪಟ್ಟಣದ ಬಸ್ ನಿಲ್ದಾಣ ಸಮೀಪವಿರುವ ಶ್ರೀನಿಧಿ ಉಪಚಾರ್ ಹೋಟೆಲ್‌ಗೆ ತೆರಳಿದ್ದ ಅಧಿಕಾರಿಗಳು, ಸ್ಟೋರ್ ರೂಂನಲ್ಲಿ ಪರಿಶೀಲಿಸಿದರು. ಬಳಿಕ ಅರಿಶಿಣ, ಧನೀಯಪುಡಿ, ಕಾರದ ಪುಡಿ, ಉಪ್ಪು, ನೀರು ಸೇರಿದಂತೆ ಇನ್ನಿತರ ಪದಾರ್ಥಗಳನ್ನು ಸಂಚಾರ ಆಹಾರ ಪ್ರಯೋಗಾಲಯದಲ್ಲಿ ಫುಡ್ ಅನಾಲಿಸ್ಟ್ ಕಿಶೋರ್, ಪ್ರಯೋಗಾಲಯ ಸಹಾಯಕ ಧರಣೇಶ್ ಅವರು ಗುಣಮಟ್ಟತೆ ಮತ್ತು ಸುರಕ್ಷತೆಯನ್ನು ಪರಿಶೀಲಿಸಿದರು. ಈ ವೇಳೆ ಎಸಿ ದಿನೇಶ್ ಕುಮಾರ್ ಮೀನಾ ಅವರು ಸ್ಥಳದಲ್ಲಿದ್ದ ಹೋಟೆಲ್ ಮಾಲೀಕರಿಗೆ ಅಡುಗೆ ತಯಾರಿಸುವ ಕೊಠಡಿಯಲ್ಲಿ ಅಶುಚಿತ್ವವಿದ್ದು ಸ್ವಚ್ಛತೆಯನ್ನು ಕಾಪಾಡಿಕೊಳ್ಳುವಂತೆ ಸೂಚನೆ ನೀಡಿದರು.

ನಂತರ, ಹೋಟೆಲ್ ಮುಂಭಾಗವಿದ್ದ ಚಿಲ್ಲರೆ ಅಂಗಡಿಯಲ್ಲಿ ಮಾರಾಟ ಮಾಡಲು ಇಟ್ಟಿದ್ದ ಲೇಬಲ್ ರಹಿತ ಬಟಾಣಿಯ ಖಾದ್ಯ ಮಾದರಿಯನ್ನು ಪರೀಶೀಲಿಸಿದಾಗ ಕೃತಕ ಬಣ್ಣ ಲೇಪನ ಮಾಡಿರುವುದು ಕಂಡು ಬಂದಿದ್ದರಿಂದ ಮಾಲೀಕರನ್ನು ತರಾಟೆಗೆ ತೆಗೆದುಕೊಂಡರು. ಬಳಿಕ, ಅಂಗಡಿ ಮಾಲೀಕನ ಮಾಹಿತಿ ಮೇರೆಗೆ ಜಯ ಇನ್ಸಿಟ್ಯೂಟ್ ರಸ್ತೆಯಲ್ಲಿರುವ ಶ್ರೀ ಮಾಜಿಸ ಟ್ರೇಡಿಂಗ್, ಚೈತ್ರ ಜನರಲ್ ಮಚೆರ್ಂಟ್ಸ್ ಹೋಲ್ ಸೆಲ್ ಅಂಗಡಿಗಳ ಮೇಲೆ ದಾಳಿ ನಡೆಸಿದರು. ಅಲ್ಲಿದ್ದ ಲೇಬಲ್ ರಹಿತ ಕಡಲೆ, ಕಾರದ ಕಡಲೆ ಬೀಜ, ಮಿಸ್ಚರ್, ಚಕ್ಕುಲಿ ಇನ್ನಿತರ ಪದಾರ್ಥಗಳನ್ನು ನೋಡಿ ಮಾಲೀಕರಿಗೆ ಲೇಬಲ್ ರಹಿತ ಯಾವುದೇ ಪದಾರ್ಥಗಳನ್ನು ಮಾರಾಟ ಮಾಡಕೂಡದು ಎಂದು ಸೂಚಿಸಿದರು.

ಆರ್.ಎಂ.ಸಿ ರಸ್ತೆಯಲ್ಲಿರುವ ಎಚ್.ಎಂ.ಎಸ್ ಟ್ರೇಡರ್ಸ್‌ಗೆ ಭೇಟಿ ನೀಡಿ, ಮೂಂಗ್ ದಾಲ್ ಮಾದರಿ ಪರಿಶೀಲಿಸಿದಾಗ ದಾಲ್‌ನಲ್ಲಿ ಕೃತಕ ಬಣ್ಣವಿರುವುದು ತಿಳಿದು ವಶಕ್ಕೆ ಪಡೆದರು. ಕೋಳಿ ಮಾಂಸ ಮಾರಾಟ ಮಳಿಗೆ ತೆರಳಿ ಸ್ವಚ್ಛತೆ ಕಾಪಾಡಿ ಕೊಳ್ಳುವಂತೆ ಸಲಹೆ ನೀಡಿದ್ದಲ್ಲದೆ, ಆಹಾರ ಸುರಕ್ಷತೆ ನೋಂದಣಿ ಪತ್ರ ಪಡೆಯುವಂತೆ ಮಾಲೀಕನಿಗೆ ಸೂಚನೆ ನೀಡಿದರು.

ಶ್ರೀ ದೇವರಾಜ ಅರಸು ಹಿಂದುಳಿದ ವರ್ಗಗಳ ಮೆಟ್ರಿಕ್ ನಂತರದ ಬಾಲಕಿಯರ ವಿದ್ಯಾರ್ಥಿನಿಲಯಕ್ಕೆ ಭೇಟಿ ನೀಡಿ, ಆಹಾರ ಪದಾರ್ಥಗಳನ್ನು ಪರಿಶೀಲಿಸಿದರು. ಈ ವೇಳೆ ವಿದ್ಯಾರ್ಥಿನಿಲಯದಲ್ಲಿ ಬಳಸಲಾಗುತ್ತಿದ್ದ ಬೆಲ್ಲದಲ್ಲಿ ಕೃತಕ ಬಣ್ಣ ಇರುವುದು ಕಂಡುಬಂದು ಈ ಬಗ್ಗೆ ಕ್ರಮವಹಿಸುವಂತೆ ಆಹಾರ ಸುರಕ್ಷತೆ ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ಗ್ರೇಡ್ 2 ತಹಸೀಲ್ದಾರ್ ರವಿ, ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರದ ಅಧಿಕಾರಿ ಶ್ರೀನಿವಾಸ್, ಟಿಎಚ್‌ಒ ಹಾಗೂ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರದ ಅಧಿಕಾರಿ ಡಾ.ಲೋಯಿತ್, ಕಂದಾಯ ನಿರೀಕ್ಷಕ ನಿರಂಜನ್, ರಾಕೇಶ್ ಮಠದ್ ಮತ್ತಿತರರಿದ್ದರು.