ಪುಡಿಗಾಸು ಪರಿಹಾರಕ್ಕೆ ಅನ್ನದಾತರ ಅಲೆದಾಟ

ನಿರಂತರವಾಗಿ ಮರಗಳನ್ನು ಕತ್ತರಿಸಿದ ಪರಿಣಾಮ ಹಾಗೂ ಹವಾಮಾನ ವೈಪರೀತ್ಯದಿಂದ ಗಾಳಿ ಬಂದಂತೆಯೇ ನೆಲಮಟ್ಟದಲ್ಲಿ ಬೀಸುತ್ತಿದೆ. ಇದರಿಂದ ತಾಲೂಕಿನಲ್ಲಿ ಒಂದಲ್ಲ ಒಂದು ಕಡೆ ಬಾಳೆ ಬೆಳೆ ನೆಲ ಕಚ್ಚುತ್ತಿದೆ. ಇದರಿಂದ ರೈತರು ಸಾಲ ಸೋಲ ಮಾಡಿ ಬೆಳೆದ ಬಾಳೆ ಕೈಗೆ ಬಂದ ತುತ್ತು ಬಾಯಿಗೆ ಬಾರದಂತಾಗಿದ್ದು, ಕೋಟ್ಯಂತರ ರೂ.ಬೆಳೆ ನಷ್ಟ ಅನುಭವಿಸುವಂತಾಗಿದೆ. ಕಳೆದ ಮೂರು ವರ್ಷಗಳಿಂದ 5 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಬಾಳೆ ನಾಶವಾಗಿದೆ. ಆದರೆ ನೈಸರ್ಗಿಕ ವಿಪತ್ತು ಯೋಜನೆಯಡಿ ಸರ್ಕಾರ ಪರಿಹಾರ ನೀಡುತ್ತಿದ್ದರೂ ಪುಡಿಗಾಸಿನ ಪರಿಹಾರ ಪಡೆಯಲು ವರ್ಷಗಟ್ಟಲೇ ರೈತರು ಅಲೆದಾಡುವಂತಾಗಿದೆ.

ಪ್ರಧಾನಮಂತ್ರಿಗಳ ಫಸಲ್ ಬಿಮಾ ಯೋಜನೆ ಗುಂಪು ವಿಮೆಯಾಗಿದ್ದು, ಕೇಂದ್ರ ಸರ್ಕಾರ ರೈತರ ಬೆಳೆಗಳಿಗೆ ಬೆಂಬಲ ನೀಡುವ ಒಂದು ಪ್ರಮುಖ ಬೆಳೆ ವಿಮಾ ಯೋಜನೆಯಾಗಿದೆ. ಇದು ನೈಸರ್ಗಿಕ ವಿಕೋಪ, ಕೀಟಗಳಿಂದ ಬೆಳೆಹಾನಿಯಾದರೆ ರೈತರಿಗೆ ಆರ್ಥಿಕ ನೆರವು ನೀಡುತ್ತದೆ. ಇದರಲ್ಲಿ ಮುಂಗಾರು ಮತ್ತು ಹಿಂಗಾರು ಹಂಗಾಮಿನ ಆಹಾರಧಾನ್ಯಗಳು, ಎಣ್ಣೆಕಾಳುಗಳು, ವಾರ್ಷಿಕ ವಾಣಿಜ್ಯ ಹಾಗೂ ತೋಟಗಾರಿಕೆ ಬೆಳೆಗಳು ಸೇರಿದ್ದರೂ ಈ ವ್ಯಾಪ್ತಿಗೆ ಬಾಳೆ ಬೆಳೆ ಸೇರಿಲ್ಲ.

ರೈತರಿಗೆ ಸಂಜೀವಿನಿಯಾದ ಹವಾಮಾನ ಆಧಾರಿತ ಬೆಳೆವಿಮೆ

ಈ ಯೋಜನೆ ವಿಮೆ ಮಾಡಿದ ರೈತರಿಗೆ ಹವಾಮಾನದ ಪ್ರಕೋಪಗಳಾದ ಅತಿವೃಷ್ಟಿ, ಅನಾವೃಷ್ಟಿ, ಅಧಿಕ ತಾಪಮಾನ ಹಿಮ ತೇವಾಂಶ ಮೊದಲಾದವುಗಳಿಂದ ಆಗಬಹುದಾದ ಬೆಳೆನಷ್ಟಕ್ಕೆ ಪರಿಹಾರ ಒದಗಿಸಲಿದೆ. ಹವಾಮಾನ ವಿಮೆ ಯೋಜನೆಯು ಉತ್ತಮ ಫಸಲಿಗಾಗಿ ಎಲ್ಲ ಕ್ರಮಗಳನ್ನು ಕೈಕೊಂಡಿದ್ದರೂ ವಾತಾವರಣದಲ್ಲಿನ ಪ್ರತಿಕೂಲ ಪರಿಸ್ಥಿತಿಯ ಪರಿಣಾಮ ಉತ್ಪಾದನಾ ನಷ್ಟಕ್ಕೆ ರಕ್ಷಣೆ ನೀಡಲಿದೆ. ಹಿಂದಿನ ವರ್ಷಗಳ ಇಳುವರಿ ಮತ್ತು ಹವಾಮಾನದ ಪರಸ್ಪರ ಸಂಬಂಧದ ಅಧ್ಯಯನ, ಹವಾಮಾನದ ವಿವಿಧ ಅಂಶಗಳ ಗರಿಷ್ಠ ಮಿತಿಯನ್ನು ಕಂಡುಕೊಳ್ಳಲು ರೈತರು ಹೊಂದಬಹುದಾದ ನಷ್ಟದ ಪ್ರಮಾಣವನ್ನು ತಿಳಿದು ಅದಕ್ಕನುಗುಣವಾಗಿ ಪರಿಹಾರವನ್ನು ನಿರ್ಧರಿಸಲಾಗುತ್ತದೆ.

ಇದನ್ನು ಪ್ರಾಯೋಗಿಕವಾಗಿ 2003 ರ ಮುಂಗಾರು ಹಂಗಾಮಿನಿಂದ ಜಾರಿಗೆ ತರಲಾಗಿದ್ದು ಆಂಧ್ರ ಪ್ರದೇಶ, ಛತ್ತೀಸ್‌ಗಡ, ಹರಿಯಾಣ, ಕರ್ನಾಟಕ, ಮಧ್ಯಪ್ರದೇಶ, ಮಹರಾಷ್ಟ್ರ, ಪಂಜಾಬ್, ರಾಜಸ್ತಾನ ರಾಜ್ಯಗಳು ಜಾರಿಗೆ ತಂದಿವೆ. ಈ ಯೋಜನೆಯಡಿ ಮಹಾರಾಷ್ಟ್ರದ ಜಾಲಗಾಂವ್ ಜಿಲ್ಲೆಯಲ್ಲಿ ಒಂದು ಹೆಕ್ಟೇರ್ ಬಾಳೆಗೆ ವಾರ್ಷಿಕ 8 ಸಾವಿರ ರೂ. ವಿಮೆ ಮೊತ್ತ ಕಟ್ಟಿ 1 ಲಕ್ಷ 70 ಸಾವಿರ ರೂ.ವರೆಗೆ ಬೆಳೆ ವಿಮೆ ಮಾಡಿಸಲಾಗುತ್ತದೆ. ಹವಾಮಾನ ವೈಪರೀತ್ಯದಿಂದ ರೈತರು ನಷ್ಟ ಹೊಂದಿದ ಸಂದರ್ಭದಲ್ಲಿ ಸುಮಾರು 90 ಸಾವಿರ ಬೆಳೆ ಪರಿಹಾರ ಹಾನಿಗೊಳಗಾದ ಫಲಾನುಭವಿ ರೈತರ ಖಾತೆಗೆ ಜಮೆಯಾಗುತ್ತದೆ.

ಯೋಜನೆಯ ಮುಂಚೂಣಿ ಪ್ರದೇಶದ ವಿಮೆ ಘಟಕದಲ್ಲಿರುವ ಹಾಗೂ ಯೋಜನೆಯಡಿ ಅನುಸೂಚಿತವಾಗಿರುವ ಬೆಳೆ ಬೆಳೆಯುವ ಎಲ್ಲ ಕೃಷಿಕರು ಈ ಯೋಜನೆಯಯಡಿ ವಿಮೆ ಸೌಲಭ್ಯ ಪಡೆದುಕೊಳ್ಳಬಹುದಾಗಿದೆ. ರಾಜ್ಯದಲ್ಲಿ ಚಾಲ್ತಿಯಲ್ಲಿಲ್ಲ ರಾಜ್ಯದಲ್ಲಿ ಒಟ್ಟಾರೆ ಹತ್ತು ಲಕ್ಷ ಎಕರೆಗಿಂತಲೂ ಹೆಚ್ಚಿನ ಪ್ರದೇಶದಲ್ಲಿ ಬಾಳೆ ಬೆಳೆಯುತ್ತಿದ್ದರೂ ಇದನ್ನು ವಿಮೆಯ ವ್ಯಾಪ್ತಿಗೆ ಸೇರಿಸಿಲ್ಲ. 9 ವರ್ಷಗಳ ಹಿಂದೆ ಇದನ್ನು ಹವಾಮಾನ ವಿಮೆ ವ್ಯಾಪ್ತಿಗೆ ಸೇರಿಸಿದ್ದರೂ ಪ್ರತಿ ಹೆಕ್ಟೇರ್‌ಗೆ 9 ಸಾವಿರ ಪ್ರೀಮಿಯಂ ಪಾವತಿಸಬೇಕಾಗಿದ್ದರಿಂದ ಹೆಚ್ಚಿನ ರೈತರು ಇದನ್ನು ಪಡೆಯಲು ಆಸಕ್ತಿ ತೋರಿಸುತ್ತಿಲ್ಲ. ಇದರಿಂದ ಸರ್ಕಾರ ಇದನ್ನು ಇದರ ವ್ಯಾಪ್ತಿಯಿಂದ ಹೊರಗಿಟ್ಟಿದೆ. ಸದ್ಯ ನೈಸರ್ಗಿಕ ವಿಪತ್ತು ಪರಿಹಾರದಲ್ಲಿ ಹೆಕ್ಟೇರ್‌ಗೆ 17.5 ಸಾವಿರ ರೂ.ಮಾತ್ರ ನೀಡಲಾಗುತ್ತಿದ್ದು, ಆಲಿಕಲ್ಲು ಮಳೆ ಮುಂತಾದ ನೈಸರ್ಗಿಕ ಪ್ರಕೋಪದಿಂದ ತೀವ್ರ ನಷ್ಟ ಸಂಭವಿಸಿದ್ದರೆ ಎರಡನೇ ಕಂತಿನಲ್ಲಿ 5 ಸಾವಿರ ರೂ.ಸೇರಿಸಿಕೊಡುವ ಸಂಭವವೂ ಇದೆ ಎಂಬುದು ಅಧಿಕಾರಿಗಳ ಅಂಬೋಣ.