ಮುತ್ತಿಗೆಯಲ್ಲಿ ರಸಗೊಬ್ಬರ ಪ್ರಾತ್ಯಕ್ಷಿಕೆಗಳ ಕ್ಷೇತ್ರೋತ್ಸವ

ತಾಲೂಕಿನ ಮುತ್ತಿಗೆ ಗ್ರಾಮದ ರೈತ ರಮೇಶ್ ಎಂಬುವವರ ಜಮೀನಿನಲ್ಲಿ ಬೆಂಗಳೂರು ಕೃಷಿ ವಿಶ್ವವಿದ್ಯಾನಿಲಯ, ಜಲಾನಯನ ಉತ್ಕೃಷ್ಟ ಕೇಂದ್ರ, ಮಂಡ್ಯ ಕೃಷಿ ವಿಜ್ಞಾನಗಳ ವಿಶ್ವವಿದ್ಯಾಲಯ ಹಾಗೂ ಕೃಷಿ ಇಲಾಖೆ ಸಂಯುಕ್ತ ಆಶ್ರಯದಲ್ಲಿ ಬುಧವಾರ ಆಯೋಜಿಸಿದ್ದ ಭೂಸಂಪನ್ಮೂಲ ಸಮೀಕ್ಷೆ ಆಧಾರಿತ ರಸಗೊಬ್ಬರಗಳ ಬಳಕೆಯ ಪ್ರಾತ್ಯಕ್ಷಿಕೆಗಳ ಕ್ಷೇತ್ರೋತ್ಸವವನ್ನು ಕೃಷಿ ಇಲಾಖೆ ಸಹಾಯಕ ನಿರ್ದೇಶಕಿ ರೂಪ ಉದ್ಘಾಟಿಸಿದರು.

ಈ ಸಂದರ್ಭದಲ್ಲಿ ಅವರು ಮಾತನಾಡಿ, ಭೂ ಸಂಪನ್ಮೂಲಗಳ ಸಮೀಕ್ಷೆಯು ರೈತರಿಗೆ ಅಗತ್ಯವಾದ ಸಂಪನ್ಮೂಲ ಮಾಹಿತಿ, ಬೇಸಾಯ ಕ್ರಮಗಳಲ್ಲಿ ಅನುಸರಿಸಿಕೊಳ್ಳಬೇಕಾದ ಸೂಕ್ಷ್ಮ ನಿರ್ವಹಣಾ ಚಟುವಟಿಕೆಗಳ ಒಂದು ತಾತ್ಪರ್ಯವನ್ನು ಒದಗಿಸುತ್ತದೆ. ಇದನ್ನು ಅರಿತು ರೈತರು ಅಳವಡಿಸಿಕೊಂಡಿದ್ದೇ ಆದಲ್ಲಿ, ನೆಲ ಜಲ ಸಂರಕ್ಷಣೆ ಮಾಡುವುದರ ತೆಗೆ ಕೃಷಿ ಪರಿಕರಗಳ ಒಂದು ಸಮತೋಲನ ಬಳಕೆ ಉಂಟಾಗಿ ಕೃಷಿ ಆರ್ಥಿಕತೆಯನ್ನು ಸರಿದೂಗಿಸಿಕೊಳ್ಳಲು ಸಹಕಾರಿಯಾಗುತ್ತದೆ ಎಂದು ತಿಳಿಸಿದರು.

ಕ್ಷೇತ್ರ ಮಟ್ಟದ ವಿಸ್ತರಣಾ ಕಾರ್ಯಕರ್ತರೊಂದಿಗೆ ಉತ್ತಮ ಸಂಪರ್ಕವನ್ನು ಹೊಂದಿ, ನಿಭಾಯಿಸಿಕೊಂಡು ಅಗತ್ಯ ಮಾಹಿತಿಗಳನ್ನು ಕಲೆ ಹಾಕಿಕೊಂಡು ಸಮಯ ನಿರ್ದಿಷ್ಟವಾಗಿ ಅಳವಡಿಸಿಕೊಂಡು ಮಣ್ಣು ನೀರು ಸಂರಕ್ಷಣೆಗೆ ಹೆಚ್ಚು ಹೊತ್ತು ನೀಡಿದಲ್ಲಿ ಸುಸ್ಥಿರ ಕೃಷಿ ಸಾಧಿಸಲು ಸಾಧ್ಯ ಎಂದು ಹೇಳಿದರು.

ರಿವಾರ್ಡ್ ಯೋಜನೆಯ ಸಹ ಪ್ರಧಾನ ಪರಿಶೋಧಕಿ ಡಾ.ಬಿ.ಜಿ.ವಾಸಂತಿ ಮಾತನಾಡಿ, ರಸಗೊಬ್ಬರಗಳನ್ನು ಬಳಸುವಾಗ ರೈತರು ಕಡ್ಡಾಯವಾಗಿ ಮಣ್ಣಿನ ಗುಣ ಧರ್ಮಗಳ ಆಧಾರದ ಮೇಲೆ ಬಳಕೆ ಮಾಡಿದರೇ, ಸಸ್ಯ ಬೆಳವಣಿಗೆ ಮತ್ತು ಇಳುವರಿ ಅಭಿವೃದ್ಧಿಯಾತ್ತದೆ. ಇದರೊಂದಿಗೆ ವ್ಯವಸಾಯದ ಖರ್ಚನ್ನು ಸರಿದೂಗಿಸಿಕೊಳ್ಳಬಹುದು ಎಂದು ತಿಳಿಸಿದರು.

ಕಾರ್ಯಕ್ರಮದಲ್ಲಿ ಮಂಡ್ಯ ಕೃಷಿ ಮಹಾವಿದ್ಯಾಲಯ ಪ್ರಾಧ್ಯಾಪಕ ಡಾ.ಜಿ.ಎಸ್.ಯೋಗೇಶ್, ಜಲಾನಯನ ಉತ್ಕೃಷ್ಟ ಕೇಂದ್ರದ ಸಲಹಾ ತಜ್ಞ ಡಾ.ಜಿ.ಎಸ್.ದಾಸೋಗ್, ರಿವಾರ್ಡ್ ಯೋಜನೆಯ ಹಿರಿಯ ಸಂಶೋಧನಾ ಸಹಚರರಾದ ಬಿ.ಕೆ.ಚೈತ್ರಾ, ವೆಂಕಟರೆಡ್ಡಿ, ಯೋಜನಾ ಸಹಾಯಕರಾದ ಧ್ರುವಕುಮಾರ್, ಸತೀಶ್, ಕೃಷಿ ಅಧಿಕಾರಿ ಜಯಶಂಕರ್, ಸ್ಟೆಪ್ಸ್ ಸಂಸ್ಥೆಯ ಮಂಜುಪ್ರಸಾದ್ ಮತ್ತು ಕಲ್ಪುರ, ಗೋವಿಂದವಾಡಿ, ಹೆಗ್ಗೋಠಾರ, ಮುತ್ತಿಗೆ ಗ್ರಾಮದ ರೈತರು ಭಾಗವಹಿಸಿದ್ದರು.