ಬುಡಕಟ್ಟು ಮಕ್ಕಳ ಆಶಾಕಿರಣ ‘ಏಕಲವ್ಯ’

ಬುಡಕಟ್ಟು ಮಕ್ಕಳಿಗೆ 6 ರಿಂದ 12ನೇ ತರಗತಿವರೆಗೆ ಗುಣಮಟ್ಟ ಶಿಕ್ಷಣವನ್ನು ನೀಡುವುದರ ಜತೆಗೆ ಮಕ್ಕಳ ದೈಹಿಕ, ಮಾನಸಿಕ, ಸಾಮಾಜಿಕ ಹಾಗೂ ಸಾಂಸ್ಕೃತಿಕ ಸಾಮರ್ಥ್ಯವನ್ನು ಸಮಗ್ರವಾಗಿ ಅಭಿವೃದ್ಧಿ ಪಡಿಸುವ ಸಲುವಾಗಿ ಸರ್ಕಾರ ಏಕಲವ್ಯ ಮಾದರಿ ಶಾಲೆ ಸ್ಥಾಪಿಸಿದೆ. ಹನೂರು ತಾಲೂಕು ಹೆಚ್ಚು ಗುಡ್ಡಗಾಡು ಪ್ರದೇಶದಿಂದ ಕೂಡಿದ್ದು, ಇಲ್ಲಿ ಸುಮಾರು 80ಕ್ಕೂ ಹೆಚ್ಚು ಗಿರಿಜನರ ಹಾಡಿಗಳಿವೆ. ಆದರೆ ಅರಿವಿನ ಕೊರತೆಯಿಂದ ಹಿಂದೆ ಗಿರಿಜನರು ಮಕ್ಕಳಿಗೆ ಶಿಕ್ಷಣ ಕೊಡಿಸುವಲ್ಲಿ ನಿರ್ಲಕ್ಷ್ಯವನ್ನು ಹೊಂದಿದ್ದರು. ಕೆಲ ಮಕ್ಕಳು 5ನೇ ತರಗತಿವರೆಗಷ್ಟೇ ಶಿಕ್ಷಣ ಪಡೆಯುವಂತಾಗಿತ್ತು. ಇದರಿಂದ ಮಕ್ಕಳು ಶಿಕ್ಷಣದಿಂದ ವಂಚಿತರಾಗಿದ್ದರು.

ಆದರೆ ಇತ್ತೀಚಿನ ವರ್ಷಗಳಲ್ಲಿ ಮಹತ್ವವನ್ನು ಅರಿತ ಬುಡಕಟ್ಟು ಸಮುದಾಯದ ಜನರು ಮಕ್ಕಳಿಗೆ ಶಿಕ್ಷಣ ಕೊಡಿಸುವಲ್ಲಿ ಹೆಚ್ಚಿನ ಆಸಕ್ತಿ ವಹಿಸಿದ್ದಾರೆ. ಉದ್ಯೋಗ ಪಡೆದುಕೊಳ್ಳಬೇಕು ಎನ್ನುವ ಹಂಬಲವನ್ನು ವ್ಯಕ್ತಪಡಿಸಿದ್ದಾರೆ. ಇದಕ್ಕೆ ಪೂರಕವೆಂಬಂತೆ ತಾಲೂಕಿನ ಮಂಗಲ ಗ್ರಾಮದ ಹೊರವಲಯದ ಪ್ರಕೃತಿ ಮಡಿಲಿನಲ್ಲಿ ಸ್ಥಾಪಿಸಿರುವ ಏಕಲವ್ಯ ಮಾದರಿ ವಸತಿ ಶಾಲೆಯು ತಾಲೂಕಿನ ಗಿರಿಜನರ ಮಕ್ಕಳ ಶಿಕ್ಷಣಕ್ಕೆ ಆಶಾಕಿರಣವಾಗಿದೆ. ಎಸ್ಸೆಸ್ಸೆಲ್ಸಿ ಹಾಗೂ ಪಿಯುಸಿಯಲ್ಲಿ ಈ ಬಾರಿ ಶೇಕಡ 100ರಷ್ಟು ಫಲಿತಾಂಶವನ್ನು ಪಡೆದುಕೊಂಡಿದ್ದು, ಮಕ್ಕಳ ಕಲಿಕೆಯನ್ನು ಬಲಗೊಳಿಸಿದೆ. ಪಾಲಕರ ಶಿಕ್ಷಣದ ಮಹತ್ವವನ್ನು ಇಮ್ಮಡಿಗೊಳಿಸಿದೆ.

404 ಮಕ್ಕಳು ದಾಖಲು: 2016-17ನೇ ಸಾಲಿನಲ್ಲಿ 60 ಮಕ್ಕಳ ದಾಖಲಾತಿಯೊಂದಿಗೆ 6ನೇ ತರಗತಿಯಿಂದ ಆರಂಭವಾದ ಈ ಮಾದರಿ ವಸತಿ ಶಾಲೆಯಲ್ಲಿ ಪಿಯುಸಿವರೆಗೆ ಶಿಕ್ಷಣ ಇದ್ದು, ಪ್ರಸ್ತುತ 404 ಬುಡಕಟ್ಟು ಸಮುದಾಯದ ಮಕ್ಕಳು ದಾಖಲಾಗಿದ್ದಾರೆ. ಇಲ್ಲಿಗೆ ಸೋಲಿಗರ ಗ್ರಾಮಗಳಾದ ತಾಲೂಕಿನ ಗಾಣಿಗಮಂಗಲ, ಕೋಣನಕೆರೆ, ಮಾವತ್ತೂರು ಹಾಗೂ ಮಲೆಮಹದೇಶ್ವರ ಬೆಟ್ಟ, ಪೊನ್ನಾಚಿ, ಒಡೆಯರಪಾಳ್ಯ, ಅಜ್ಜೀಪುರ ಭಾಗದ ಗಿರಿಜನರ ಹಾಡಿಗಳ ಮಕ್ಕಳು ದಾಖಲಾಗಿದ್ದಾರೆ. ಜತೆಗೆ ಯಾದಗಿರಿ, ರಾಚಚೂರು, ಕಲಬುರಗಿ ಹಾಗೂ ಗದಗ ಜಿಲ್ಲೆಯ ಮಕ್ಕಳು ಸಹ ಶಿಕ್ಷಣ ಪಡೆಯುತ್ತಿದ್ದು, ಶಿಕ್ಷಕರು ಗುಣಮಟ್ಟದ ಶಿಕ್ಷಣಕ್ಕೆ ಹೆಚ್ಚಿನ ಒತ್ತು ನೀಡಿರುವುದಕ್ಕೆ ಈ ಬಾರಿಯ ಫಲಿತಾಂಶವೇ ಸಾಕ್ಷಿಯಾಗಿದೆ.

ಶೇಕಡ 100ರಷ್ಟು ಫಲಿತಾಂಶ: ಈ ಶಾಲೆಯ ಎಸ್ಸೆಸ್ಸೆಲ್ಸಿ ಫಲಿತಾಂಶವನ್ನು ಅವಲೋಕಿಸಿದಾಗ 2023-24ನೇ ಸಾಲಿನಲ್ಲಿ ಶೇ.70.37, 2024-25ನೇ ಸಾಲಿನಲ್ಲಿ 64.95ರಷ್ಟು ಫಲಿತಾಂಶವನ್ನು ಪಡೆದುಕೊಂಡಿತ್ತು. ಕಡಿಮೆ ಫಲಿತಾಂಶದ ಬಗ್ಗೆ ಇಲ್ಲಿನ ಶಿಕ್ಷಕರು ಆತ್ಮವಲೋಕನ ನಡೆಸಿ ಮಕ್ಕಳ ಕಲಿಕೆಗೆ ಇನ್ನಿಲ್ಲದ ಶ್ರಮ ವಹಿಸಿದ್ದರು. ಇದರ ಪರಿಣಾಮ ಈ ಬಾರಿ ಎಸ್ಸೆಸ್ಸೆಲ್ಸಿ ಪರೀಕ್ಷೆ ಬರೆದಿದ್ದ 57 ಮಕ್ಕಳೂ ಸಹ ಪಾಸಾಗುವುದರ ಮೂಲಕ ಶೇ.100ರಷ್ಟು ಫಲಿತಾಂಶ ಪಡೆದಿದೆ. ಹಾಗೆಯೇ ಪಿಯುಸಿಯಲ್ಲೂ ಶೇ.100ರಷ್ಟು ಫಲಿತಾಂಶವನ್ನು ತನ್ನದಾಗಿಸಿಕೊಂಡಿದೆ. ಇದರಿಂದ ಗಿರಿಜನರ ಮಕ್ಕಳು ಉನ್ನತ ಶಿಕ್ಷಣವನ್ನು ಪಡೆಯಲು ಹೆಜ್ಜೆಯನ್ನಿಟ್ಟಿರುವುದು ನಿಜಕ್ಕೂ ಮೆಚ್ಚುವ ಸಂಗತಿ.

ಒಟ್ಟಿನಲ್ಲಿ ಹಿಂದೆ ಶಿಕ್ಷಣದ ಬಗ್ಗೆ ಆಸಕ್ತಿಯೇ ಇಲ್ಲದ ಬುಡಕಟ್ಟು ಸಮುದಾಯದ ಮಕ್ಕಳಿಗೆ ಈ ಏಕಲವ್ಯ ಮಾದರಿ ವಸತಿ ಶಾಲೆಯು ವರದಾನವಾಗಿದೆ. ಮಕ್ಕಳು ಶಿಕ್ಷಿತರಾಗುತ್ತಿರುವುದು ಗಿರಿಜನರಲ್ಲಿ ಸಂತಸವನ್ನು ಉಂಟು ಮಾಡಿದೆ.