7 ದಿನದೊಳಗೆ ಇ-ಸ್ವತ್ತು ವಿಲೇವಾರಿ ಮಾಡಿ

ನಗರಸಭೆಯಲ್ಲಿ ಇ ಸ್ವತ್ತು ವಿಳಂಬ ಮಾಡುತ್ತಿರುವ ಬಗ್ಗೆ ಸಾರ್ವಜನಿಕರ ದೂರಿನ ಮೇರೆಗೆ ಶನಿವಾರ ನಗರಸಭೆ ಕಾರ್ಯಾಲಯಕ್ಕೆ ಉಪ ವಿಭಾಗಾಧಿಕಾರಿ ದಿನೇಶ್ ಕುಮಾರ್ ಮೀನಾ ಅವರು ಇ-ಸ್ವತ್ತು ವಿಲೇವಾರಿ ಪ್ರಕ್ರಿಯೆ ಬಗ್ಗೆ ಖುದ್ದು ಪರಿಶೀಲಿಸಿದರು. ನಗರಸಭೆ ಪೌರಾಯುಕ್ತೆ ರುದ್ರಮ್ಮ ಶರಣಯ್ಯ ಮತ್ತು ಇನ್ನಿತರ ಅಧಿಕಾರಿಗಳಿಂದ ಬಾಕಿ ಉಳಿದಿರುವ ಇ- ಸ್ವತ್ತು ದಾಖಲೆಗಳ ಬಗ್ಗೆ ಮಾಹಿತಿ ಪಡೆದರು.

ಭೇಟಿ ಸಂಬಂಧ ಸುದ್ದಿಗಾರರೊಂದಿಗೆ ಎಸಿ ದಿನೇಶ್ ಕುಮಾರ್ ಮೀನಾ ಮಾತನಾಡಿ, ಕೊಳ್ಳೇಗಾಲ ನಗರಸಭೆಯಲ್ಲಿ ಸಾರ್ವಜನಿಕರ ನೀಡಬೇಕಿದ್ದ ಒಟ್ಟು 340 ಇ-ಸ್ವತ್ತು ಬಾಕಿ ಉಳಿದಿದೆ. ಕಂದಾಯ ನಿರೀಕ್ಷಕರ ಲಾಗಿನ್‌ನಲ್ಲಿ 240, ಪೌರಾಯುಕ್ತರ ಲಾಗಿನ್‌ನಲ್ಲಿ 92 ಇ- ಸ್ವತ್ತು ಬಾಕಿ ಉಳಿದಿರುವುದು ಪರಿಶೀಲನೆ ವೇಳೆ ತಿಳಿದು ಬಂದಿದೆ ಎಂದರು.

ಇನ್ಮುಂದೆ ಕಾಲ ಮಿತಿಯೊಳಗೆ ಅರ್ಜಿದಾರರಿಗೆ ಇ- ಸ್ವತ್ತು ನೀಡಬೇಕು. ಬಾಕಿ ಉಳಿದಿರುವ ಇ-ಸ್ವತ್ತನ್ನು 7 ದಿನಗಳ ಒಳಗಾಗಿ ನೀಡಬೇಕೆಂದು ಸೂಚನೆ ನೀಡಿದ್ದೇನೆ. ಅಲ್ಲದೆ, ಮುಂದಿನ 15 ದಿನಗಳ ಬಳಿಕ ನಗರಸಭೆಯಲ್ಲಿ ಇ-ಸ್ವತ್ತು ಪ್ರಗತಿ ಪರಿಶೀಲನೆ ಸಭೆ ನಡೆಸುತ್ತೇನೆ ಎಂದರು. ಕಂದಾಯ ನಿರೀಕ್ಷಕ ( ಆರ್.ಐ) ರಮೇಶ್ , ವ್ಯವಸ್ಥಾಪಕ ಲಿಂ ಗರಾಜು, ಬಿಲ್ ಕಲೆಕ್ಟರ್ ಪ್ರಭಾಕರ್ ಮತ್ತಿತರಿದ್ದರು.