ಆಯುಧ ಸಿಕ್ಕಿರುವುದೇ ವಿಶೇಷ: ಬೃಹತ್ ಶಿಲಾಯುಗದ ಸಮಾಧಿಗಳು ಸುರಕ್ಷಿತವಾಗಿರುವ ದೊಡ್ಡಾಲತ್ತೂರಿನಲ್ಲಿ ನಡೆದಿರುವ ಉತ್ಖನನದಲ್ಲಿ ಆಯುಧಗಳು ಸಿಕ್ಕಿದ್ದವು. ಕಲ್ಲು ವೃತ್ತಾಕಾರ ಮತ್ತು ಕಲ್ಗುಪ್ಪೆ ವೃತ್ತದ ಎರಡು ಬಗೆಯ 13 ಸಮಾಧಿಗಳನ್ನು ಉತ್ಖನನ ಮಾಡಿದಾಗ ವಿಶೇಷ ಆಯುಧಗಳು ದೊರಕಿವೆ. ಸಮಾಧಿಗಳಲ್ಲಿ ಕಪ್ಪು, ಕೆಂಪು ಬಣ್ಣದ ಮಣ್ಣಿನ ಪಾತ್ರೆಗಳು, ಕಬ್ಬಿಣದ ಉಪಕರಣಗಳು, ಮಾನವ ಮತ್ತು ಪ್ರಾಣಿಗಳ ಮೂಳೆಗಳು, ಮಣಿಗಳು ಸಿಕ್ಕಿರುವುದು ಸಾಮಾನ್ಯ. ಆದರೆ ವಿಶೇಷವಾಗಿ ಕಬ್ಬಿಣದ ಗುರಾಣಿ, ಈ ಗುರಾಣಿಗೆ ಎರಡು ಕಡೆಗಳಲ್ಲಿ ಚಿಕ್ಕ ಕುಣಿಕೆಯನ್ನು ಜೋಡಿಸಿರುವುದು, ಕಬ್ಬಿಣದ ಕೊಡಲಿ, ಬಾಣದ ತುಂಡುಗಳು, ಎರಡು ಶೂಲವಿರುವ ಆಯುಧವನ್ನು ಇರಿಸಲಾಗಿತ್ತು. ರಾಜ್ಯದಲ್ಲಿ ಶಿಲಾಚಿತ್ರಗಳು ವಿರಳ. ಹಾಗಿರುವಾಗ ದೊಡ್ಡಾಲತ್ತೂರಿನ ವೃತ್ತಾಕಾರದ ಬಂಡೆಗಳ ಸಮಾಧಿಯ ಮೇಲೆ ಮಾನವನ ಚಿತ್ರವನ್ನು ಕೊರೆಯಲಾಗಿದೆ. ಇದೂ ಸಹ ಉತ್ಖನನದಲ್ಲಿ ಸಿಕ್ಕ ವಿಶೇಷವಾಗಿತ್ತು.
