ಶ್ರೀರಂಗನಾಥಸ್ವಾಮಿ ದೇವಾಲಯ ಲೋಕಾರ್ಪಣೆ

ತಾಲೂಕಿನ ಶಿವನಸಮುದ್ರದಲ್ಲಿ ಏಳು ಹೆಡೆಯುಳ್ಳ ಆದಿಶೇಷನ ಮೇಲೆ ಮಲಗಿರುವ ಮಧ್ಯರಂಗನಾಥಸ್ವಾಮಿ ಮತ್ತು ರಂಗನಾಯಕಿ ಅಮ್ಮನವರ ದರ್ಶನವನ್ನು ಡಿಸಿಎಂ ಡಿ.ಕೆ.ಶಿವಕುಮಾರ್ ಅವರು ತಮ್ಮ ಪತ್ನಿ ಉಷಾ ಶಿವಕುಮಾರ್ ಅವರ ಜತೆಗೂಡಿ ಪೂಜೆ ಸಲ್ಲಿಸಿದರು.

ರೇಷ್ಮೆ ಮತ್ತು ಪಶುಸಂಗೋಪನೆ ಸಚಿವ ಹಾಗೂ ಚಾಮರಾಜನಗರ ಜಿಲ್ಲಾ ಉಸ್ತುವಾರಿ ಕೆ.ವೆಂಕಟೇಶ್, ಸಾರಿಗೆ ಮತ್ತು ಮುಜರಾಯಿ ಇಲಾಖೆ ಸಚಿವ ರಾಮಲಿಂಗಾರೆಡ್ಡಿ, ಹನೂರು ಶಾಸಕ ಎಂ.ಆರ್.ಮಂಜುನಾಥ್, ಕೊಳ್ಳೇಗಾಲ ಶಾಸಕ ಎ.ಆರ್.ಕೃಷ್ಣಮೂರ್ತಿ, ಚಾಮರಾಜನಗರ ಶಾಸಕ ಸಿ.ಪುಟ್ಟರಂಗಶೆಟ್ಟಿ, ಮಾಜಿ ಶಾಸಕ ಆರ್.ನರೇಂದ್ರ, ಕಾವೇರಿ ಜಲಾನಯನ ಯೋಜನೆ ಅಚ್ಚುಕಟ್ಟು ಪ್ರದೇಶಾಭಿವೃದ್ಧಿ ಪ್ರಾಧಿಕಾರ ಪಿ.ಮರಿಸ್ವಾಮಿ, ಹೈದರಾಬಾದ್ ಎ.ಎಂ.ಆರ್. ಗ್ರೂಪ್ ಆಫ್ ಕಂಪನಿಯ ಡಾ.ಎ.ಮಹೇಶ್ ರೆಡ್ಡಿ, ರಾಧಿಕಾರೆಡ್ಡಿ ಪೂಜಾ ಕಾರ್ಯದಲ್ಲಿ ಪಾಲ್ಗೊಂಡಿದ್ದರು.

ದೇವಾಲಯ ಆವರಣದಲ್ಲಿ ಆಯೋಜಿಸಿದ್ದ ವೇದಿಕೆ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದ ಡಿಸಿಎಂ ಡಿ.ಕೆ ಶಿವಕುಮಾರ್ ಅವರು ಮಾತನಾಡಿ, ಚಾಮರಾಜನಗರ ಹಿಂದುಳಿದ ಜಿಲ್ಲೆ ಅಲ್ಲ, ದೇವರ ನಾಡಾಗಿದೆ. ದಕ್ಷಿಣ ಭಾರತಕ್ಕೆ ಚಾಮರಾಜನಗರ ಐತಿಹಾಸಿಕ ಜಿಲ್ಲೆಯಾಗಿದೆ. ಮಲೆ ಮಹದೇಶ್ವರ, ಮಧ್ಯರಂಗನಾಥ, ಶ್ರೀಸಿದ್ದಪ್ಪಾಜಿ, ಬಿಳಿಗಿರಿ ರಂಗನಾಥಸ್ವಾಮಿ, ಗೋಪಾಲಸ್ವಾಮಿ, ಚಾಮರಾಜೇಶ್ವರ ಈ ಎಲ್ಲ ಪುಣ್ಯ ಕ್ಷೇತ್ರಗಳು ಚಾಮರಾಜನಗರ ಜಿಲ್ಲೆಯಲ್ಲಿವೆ. ಪ್ರಸಿದ್ಧ ಗಗನಚುಕ್ಕಿ-ಭರಚುಕ್ಕಿ ಜಲಪಾತವಿರುವ ಪ್ರದೇಶ ಕಾವೇರಿ ನದಿ ತಪ್ಪಲಿನಲ್ಲಿ ಶ್ರೀಮಧ್ಯರಂಗನಾಥಸ್ವಾಮಿ ಇರುವುದು ನಮ್ಮೆಲ್ಲರ ಪುಣ್ಯವಾಗಿದೆ ಎಂದರು.

ಎಎಂಆರ್ ಗ್ರೂಪ್‌ನ ಮಹೇಶ್ ರೆಡ್ಡಿ ಅವರು ದೇವಾಲಯ ಜೀರ್ಣೋದ್ಧಾರ ನೆರವೇರಿಸಿರುವ ಅವಕಾಶ ದೊರೆತಿದ್ದು, ಅವರ ಭಾಗ್ಯವೇ ಸರಿಯಾಗಿದೆ. ಶ್ರೀರಂಗ ಪಟ್ಟಣದ ಆದಿರಂಗ, ಶಿವನಸಮುದ್ರದ ಮಧ್ಯರಂಗ ಹಾಗೂ ತಮಿಳುನಾಡಿನ ಶ್ರೀರಂಗಕ್ಕೆ ಸೂರ್ಯೋದಯ ಬಳಿಕ ಸೂರ್ಯಾಸ್ತದದ ಒಳಗೆ ಭೇಟಿ ನೀಡುವುದು ಪದ್ಧತಿ. ನಾನು ಕೂಡ ಈ ತಿರಂಗಾ ಯಾತ್ರೆ ನಡೆಸಿದ್ದೇನೆ. ಮಧ್ಯರಂಗನಾಥ ಸ್ವಾಮಿ ದೇವಾಲಯದ ಜೀರ್ಣೋದ್ಧಾರ ಕಾಮಗಾರಿ ಪೂರ್ಣಗೊಳ್ಳಲು ನೆರವು ನೀಡಿದ ಮಹೇಶ್‌ರೆಡ್ಡಿ ಅವರ ಕುಟುಂಬಕ್ಕೆ ಭಗವಂತ ಒಳಿತು ಮಾಡಲಿ ಎಂದು ಹಾರೈಸಿದರು.

ದೇವರು ವರವನ್ನು ಕೊಡುವುದಿಲ್ಲ, ಶಾಪವನ್ನೂ ಕೊಡುವುದಿಲ್ಲ, ಅವಕಾಶ ಮಾತ್ರ ಕೊಡುತ್ತೇನೆ. ಅದನ್ನು ಬಳಸಿಕೊಂಡು ಕೈಲಾದಷ್ಟು ಧರ್ಮದ ಕೆಲಸ ಮಾಡಬೇಕು. ಭಗವಂತ ದಾರಿ ತೋರಿಸುತ್ತಾನೆ. ಗುರಿಯನ್ನು ನಾವೇ ತಲುಪಬೇಕು ಎಂದರು.

ಈ ವೇಳೆ ಸಚಿದ್ವಯರು, ಶಾಸಕರು, ಮಾಜಿ ಶಾಸಕರು, ಜಿಲ್ಲಾಧಿಕಾರಿ ಶ್ರೀರೂಪ, ಜಿಪಂ ಸಿಇಒ ಮೋನಾ ರೋತ್, ಎಸಿ ದಿನೇಶ್‌ಕುಮಾರ್ ಮೀನಾ, ತಹಸೀಲ್ದಾರ್ ಬಸವರಾಜು, ಶಿವನಸಮುದ್ರದ ಸಮೂಹ ದೇವಾಲಯದ ಇಒ ಸುರೇಶ್ ಮತ್ತಿತರ ಅಧಿಕಾರಿಗಳು ಹಾಜರಿದ್ದರು.

ಶ್ರೀರಂಗನಾಥಸ್ವಾಮಿಗೆ ಡಿಸಿಎಂ ಡಿ.ಕೆ.ಶಿವಕುಮಾರ್-ಪತ್ನಿ ಉಷಾ ಶಿವಕುಮಾರ್ ಅವರು ಸಂಕಲ್ಪ ಪೂಜೆ ಸಲ್ಲಿಸಿದರು. ಮೇ 17ರಿಂದ 21ರವರೆಗೆ ದೇವಾಲಯದಲ್ಲಿ ಪಂಚರಾತ್ರಗಮ ಶಾಸ್ತ್ರದಂತೆ ಪೂಜೆ ನೆರವೇರಿಸಲಾಯಿತು. ಲೋಕಾರ್ಪಣೆ ದಿನ ದೇವರಿಗೆ ಕ್ಷೀರಾಭಿಷೇಕ, ಪೂರ್ಣಾಹುತಿ, ಕುಂಭ ಪ್ರತಿಷ್ಠಾಪನೆ, ಮಹಾಕುಂಭ ಸಂಪ್ರೋಕ್ಷಣೆ, ಮಹಾ ಮಂಗಳಾರತಿ ಇನ್ನಿತರ ಪೂಜಾ ಕೈಂಕರ್ಯಗಳು ನೆರವೇರಿದವು. ವೇದ ವಿದ್ವಾಂಸರು, ಆಗಮನ ವಿದ್ವಾಂಸರು, ದಿವ್ಯ ಪ್ರಬಂಧ ವಿದ್ವಾಂಸರು ದೇವರ ಪರಾಯಣ ಮಾಡಿ ಪೂಜೆ ಸಲ್ಲಿಸಿದರು. ಎಲ್ಲ ಪೂಜೆ ಕಾರ್ಯಗಳು ಕೆ.ಶ್ರೀನಿವಾಸ್ ರಂಗಾಚಾರ್ಯರು, ಕೆ.ಶ್ರೀಧರ್, ಕೆ.ಮಧುಸೂದನ್, ಕೆ.ಮಾಧವನ್ ಭಟ್ ನೇತೃತ್ವದಲ್ಲಿ ನೆರವೇರಿತು.

ಶಿವನಸಮುದ್ರದ ಹೆಲಿಪ್ಯಾಡ್‌ಗೆ ಆಗಮಿಸಿದ ಡಿಸಿಎ ಡಿ.ಕೆ.ಶಿವಕುಮಾರ್ ಅವರಿಗೆ ಪೊಲೀಸ್ ಇಲಾಖೆ ಗೌರವ ಸಲ್ಲಿಸಿತು. ಈ ವೇಳೆ ಸ್ಥಳಕ್ಕೆ ಡಿ.ಕೆ.ಶಿವಕುಮಾರ್ ಅವರನ್ನು ನೋಡಲು ಕಾಂಗ್ರೆಸ್ ಕಾರ್ಯಕರ್ತರು ಹಾಗೂ ಅಭಿಮಾನಿಗಳು ಮುಗಿಬಿದ್ದರು.

ಸಂಸದರಿಂದ ದಾಸೋಹ ವ್ಯವಸ್ಥೆ: ದೇವಾಲಯ ಉದ್ಘಾಟನಾ ಸಮಾರಂಭಕ್ಕೆ ಆಗಮಿಸಿದ ಎಲ್ಲ ಭಕ್ತರು ಮತ್ತು ಸಾರ್ವಜನಿಕರಿಗೆ ದೇವಾಲಯ ಸಮೀಪ ಸಂಸದ ಸುನೀಲ್ ಬೋಸ್ ಅವರು ದಾಸೋಹ ವ್ಯವಸ್ಥೆ ಕಲ್ಪಿಸಿದರು. ಬೆಳಗ್ಗೆ ತಿಂಡಿ, ಮಧ್ಯಾಹ್ನ ಮತ್ತು ರಾತ್ರಿ ಭೋಜನದ ವ್ಯವಸ್ಥೆಯನ್ನು ಕಲ್ಪಿಸಲಾಗಿತ್ತು. ಸುಮಾರು 3ರಿಂದ 4 ಸಾವಿರ ಜನರಿಗೆ ಭೋಜನ ವ್ಯವಸ್ಥೆ ಮಾಡಲಾಗಿತ್ತು. ದೇವಾಲಯಕ್ಕೆ ಬಂದ ಭಕ್ತಾಧಿಗಳು ಪ್ರಸಾದ ಸ್ವೀರಿಸಿದರು.