ಆದಿವಾಸಿ ಗೃಹಭಾಗ್ಯ ದಾಖಲೆ ಸಂಗ್ರಹ ಶುರು

ಮುಖ್ಯಮಂತ್ರಿ ಆದಿವಾಸಿ ಗೃಹಭಾಗ್ಯ ಎಂಬ ಹೆಸರಿನ ಯೋಜನೆಯಡಿ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿರುವ ಅರಣ್ಯ ಮತ್ತು ಅರಣ್ಯಾಧಾರಿತ ಸಮುದಾಯಗಳಾದ ಸೋಲಿಗ, ಹಸಲರು, ಗೌಡಲು, ಸಿದ್ಧಿ, ಕುಡಿಯ, ಮಲೆ ಕುಡಿಯ, ಕಾಡು ಕುರುಬ, ಇರುಳಿಗ, ಬೆಟ್ಟ ಕುರುಬ, ಯರವ, ಣಿಯನ್ ಇತ್ಯಾದಿ ಸಮುದಾಯಗಳ 6,856 ವಸತಿ ರಹಿತ ಕುಟುಂಬಗಳಿಗೆ ಸೌಲಭ್ಯ ಒದಗಿಸಿಕೊಡಲು ಸೆಪ್ಟೆಂಬರ್‌ನಲ್ಲಿ ನಡೆದಿದ್ದ ಸಚಿವ ಸಂಪುಟ ಸಭೆಯಲ್ಲಿ ತೀರ್ಮಾನಿಸಲಾಗಿತ್ತು.

ರಾಜ್ಯದಲ್ಲಿ 6,856 ವಸತಿ ರಹಿತ ಆದಿವಾಸಿಗಳಿದ್ದರೆ ಚಾಮರಾಜನಗರ ಜಿಲ್ಲೆಯಲ್ಲಿ 2995 ಕುಟುಂಬಗಳಿವೆ. ಜಿಲ್ಲಾಡಳಿತದಿಂದ ಮನೆ ಇಲ್ಲದ ಆದಿವಾಸಿಗಳಿಗೆ ವಸತಿ ಸೌಲಭ್ಯ ಕಲ್ಪಿಸುವುದಕ್ಕಾಗಿ ಈ ಹಿಂದೆ ಸಮೀಕ್ಷೆ ನಡೆಸಲಾಗಿತ್ತು. ಅದರ ಪ್ರಕಾರ, ಚಾಮರಾಜನಗರ ತಾಲೂಕಿನಲ್ಲಿ 810 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬಗಳು-810), ಕೊಳ್ಳೇಗಾಲ ತಾಲೂಕಿನಲ್ಲಿ 1049 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬ-1049, ನಿವೇಶನ ಮತ್ತು ಮನೆ ಇಲ್ಲದ ಕುಟುಂಬಗಳು-199), ಗುಂಡ್ಲುಪೇಟೆ ತಾಲೂಕಿನಲ್ಲಿ 314 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬ-279, ನಿವೇಶನ ಮತ್ತು ಮನೆ ಇಲ್ಲದ ಕುಟುಂಬಗಳು-35), ಯಳಂದೂರು ತಾಲೂಕಿನಲ್ಲಿ 623 (ನಿವೇಶನ ಲಭ್ಯವಿದ್ದು, ಮನೆ ಇಲ್ಲದ ಕುಟುಂಬಗಳು-623) ಕುಟುಂಬಗಳು ಸೇರಿ ಒಟ್ಟಾರೆ 2995 ಕುಟುಂಬಳಿಗೆ ವಸತಿ ಸೌಲಭ್ಯದ ಅಗತ್ಯವಿರುವುದು ಸರ್ವೇಯಲ್ಲಿ ದಾಖಲಾಗಿದೆ. ಈ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಕೆ ಮಾಡಿ ವಸತಿ ಸೌಲಭ್ಯ ನೀಡಬೇಕೆಂದು ಪ್ರಸ್ತಾವನೆಯನ್ನು ಸಲ್ಲಿಸಲಾಗಿತ್ತು. ಬೇರೆ ಜಿಲ್ಲೆಗಳಲ್ಲೂ ಇರುವ ಅಂದರೆ, ರಾಜ್ಯದಲ್ಲಿ ಒಟ್ಟಾರೆಯಾಗಿ ಇರುವ 6,856 ವಸತಿ ರಹಿತರಿಗೆ ಸೌಲಭ್ಯ ನೀಡುವ ಸಲುವಾಗಿ ಮುಖ್ಯಮಂತ್ರಿ ಆದಿವಾಸಿ ಗೃಹಭಾಗ್ಯ ಯೋಜನೆಯನ್ನು ಜಾರಿಗೆ ತರಲಾಯಿತು. ಈ ಹಿನ್ನೆಲೆಯಲ್ಲಿ ಜಿಲ್ಲೆಯಲ್ಲಿ ನಡೆಸಿರುವ ಸರ್ವೇಯಲ್ಲಿ ಪತ್ತೆಯಾಗಿರುವ 2995 ವಸತಿ ರಹಿತರ ದಾಖಲೆಗಳನ್ನು ಸಂಗ್ರಹಿಸಲಾಗುತ್ತಿದೆ.

ವಸತಿ ರಹಿತ ಆದಿವಾಸಿಗಳು ಅಗತ್ಯ ದಾಖಲೆಗಳನ್ನು ಒದಗಿಸುವ ಮೂಲಕ ಯೋಜನೆಯನ್ನು ಬಳಕೆ ಮಾಡಿಕೊಳ್ಳಲು ಮುಂದಾಗಬೇಕಾಗಿದೆ. ಲಾನುಭವಿಗಳು ನೀಡುವ ದಾಖಲೆಗಳಲ್ಲಿ ಈ ಹಿಂದೆ ಬೇರೆ ಯೋಜನೆಯಡಿ ವಸತಿ ಸೌಲಭ್ಯ ಪಡೆದೆ ಇರುವುದು ಬಹುಮುಖ್ಯವಾಗಿರುತ್ತದೆ. ಉಳಿದ ಸರಳ ದಾಖಲೆಗಳನ್ನು ಸಲ್ಲಿಸಲು ಹಲವರು ಅನಕ್ಷರಸ್ಥರಾಗಿರುವ ಆದಿವಾಸಿಗಳಿಗೆ ಸ್ವಲ್ಪ ತ್ರಾಸವಾಗಬಹುದು. ಈ ಹಿನ್ನೆಲೆಯಲ್ಲಿ ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆ ಅಧಿಕಾರಿಗಳು, ಸಿಬ್ಬಂದಿಯೊಂದಿಗೆ ಸಮುದಾಯದ ಸಂಘಟನೆಗಳ ಸಹಕಾರವನ್ನು ಪಡೆದುಕೊಳ್ಳಲೇಬೇಕಿದೆ. ಜನನ-ಮರಣ ಪ್ರಮಾಣಪತ್ರ, ಆಧಾರ್ ಕಾರ್ಡ್ ಇಲ್ಲದವರಿಗೆ ಸಕಾಲದಲ್ಲಿ ದಾಖಲೆಗಳನ್ನು ಮಾಡಿಸಿಕೊಡಬೇಕಿದೆ.

ಜಿಲ್ಲೆಯಲ್ಲಿ ಮನೆ ಇಲ್ಲದ ಆದಿವಾಸಿಗಳಿಗೆ ವಸತಿ ಸೌಲಭ್ಯ ಕಲ್ಪಿಸಲು ಪ್ರಾಯೋಗಿಕವಾಗಿ ನಿರ್ಮಾಣ ಮಾಡಿದ್ದ ಸಿದ್ದು ನಿವಾಸ ರಾಜ್ಯಕ್ಕೆ ಮಾದರಿಯಾಗಿದ್ದು, ಮುಖ್ಯಮಂತ್ರಿ ಆದಿವಾಸಿ ಗೃಹಭಾಗ್ಯ ಯೋಜನೆಗೂ ದಿಕ್ಸೂಚಿಯಾಗಿದೆ. ಜಿಲ್ಲಾಧಿಕಾರಿ ಶಿಲ್ಪಾನಾಗ್ ಕಾಳಜಿವಹಿಸಿ ಮಲೆ ಮಹದೇಶ್ವರ ಬೆಟ್ಟದ ಆಣೆಹೊಳ ಗ್ರಾಮದ ಸೋಲಿಗ ಮಂಜುನಾಥ್‌ಗೆ ಸಿದ್ದು ನಿವಾಸ ಹೆಸರಿನಲ್ಲಿ ಒಂದು ಮನೆ ನಿರ್ಮಾಣ ಮಾಡಿಕೊಡಲಾಗಿತ್ತು. ಇದೇ ಮಾದರಿಯಲ್ಲಿ ಉಳಿದ ವಸತಿ ರಹಿತರಿಗೂ ಮನೆ ಕಟ್ಟಿಕೊಡುವ ಯೋಜನೆ ಇದಾಗಿತ್ತು. ಮಲೆ ಮಹದೇಶ್ವರ ಬೆಟ್ಟದಲ್ಲಿ ನಡೆದ ಕ್ಯಾಬಿನೆಟ್ ಸಭೆಯಲ್ಲಿ ಪಾಲ್ಗೊಂಡಿದ್ದ ಸಿಎಂ ಸಿದ್ದರಾಮಯ್ಯ ಸಿದ್ದು ನಿವಾಸವನ್ನು ಉದ್ಘಾಟನೆ ಮಾಡಬೇಕಿತ್ತು. ಆದರೆ ಕಾರಣಾಂತರಂಗಳಿಂದ ಉದ್ಘಾಟನೆಯಾಗಲಿಲ್ಲ. ಆದರೂ ಲಾನುಭವಿಗೆ ಮನೆಯನ್ನು ಹಸ್ತಾಂತರ ಮಾಡಲಾಯಿತು.

ಪಾಳು ಬಿದ್ದಂತಿರುವ, ಗೋಡೆ ಬಿರುಕು ಬಿಟ್ಟಿರುವ, ಕಿಟಕಿ, ಬಾಗಿಲುಗಳು ಮುರಿದು ಹೋಗಿರುವ ಮನೆಗಳು, ಗುಡಿಸಲುಗಳು, ಸೋಪಡಿಗಳಲ್ಲಿ ಜಿಲ್ಲೆಯ ಆದಿವಾಸಿಗಳು ಜೀವನ ನಡೆಸುತ್ತಿದ್ದಾರೆ. ಚಿಕ್ಕ ಮನೆಯಲ್ಲಿ ಹಲವು ಜನರು ವಾಸ ಮಾಡಲಾಗದೆ ಪಕ್ಕದಲ್ಲಿ ಜೋಪಡಿ, ಶೀಟ್‌ಗಳನ್ನು ಕಟ್ಟಿಕೊಂಡಿದ್ದಾರೆ. ಮಳೆ ಬಂದರೆ ಸೋರುವ ಮನೆಗಳು ಆದಿವಾಸಿಗಳ ಶೋಚನೀಯ ಬದುಕಿಗೆ ಹಿಡಿದ ಕನ್ನಡಿಯಾಗಿದೆ.