ಶಾಂತಿ, ಸೌಹಾರ್ದದಿಂದ ಈದ್ ಮಿಲಾದ್ ಆಚರಿಸಿ

ಕೊಳ್ಳೇಗಾಲ:

ಶಾಂತಿ ಹಾಗೂ ಸೌಹಾರ್ದದಿಂದ ಈದ್ ಮಿಲಾದ್ ಆಚರಿಸುವಂತೆ ಡಿವೈಎಸ್ಪಿ ಮೋಹನ್ ಸಲಹೆ ನೀಡಿದರು.

ಪಟ್ಟಣ ಪೊಲೀಸ್ ಠಾಣೆ ಆವರಣದಲ್ಲಿ ಶನಿವಾರ ವಿವಿಧ ಸಮುದಾಯದ ಮುಖಂಡರ ಸಮ್ಮುಖದಲ್ಲಿ ಶನಿವಾರ ಆಯೋಜಿಸಿದ್ದ ಶಾಂತಿಸಭೆಯಲ್ಲಿ ಮಾತನಾಡಿದರು.

ಈದ್ ಮಿಲಾದ್ ಹಬ್ಬವನ್ನು ಎಲ್ಲರೂ ಶಾಂತಿಯುತವಾಗಿ ಹಾಗೂ ಒಗ್ಗಟ್ಟಿನಿಂದ ಆಚರಿಸಬೇಕು ಎಂದರು.

ಆ.25ರಂದು ಸಂಜೆ ಮಸೀದಿಗಳಲ್ಲಿ ವಿಶೇಷ ಪ್ರಾರ್ಥನೆ ನಡೆಯಲಿದೆ. ಆ.26ರಂದು ಈದ್ ಮಿಲಾದ್ ಆಚರಣೆ ನಡೆಯಲಿದೆ ಎಂದು ಮು ಸ್ಲಿಂ ಸಮುದಾಯ ಮುಖಂಡರು ತಿಳಿಸಿದರು.

ಪಟ್ಟಣದ ಕೆಂಪನಪಾಳ್ಯ ರಸ್ತೆ ಸೇರಿದಂತೆ ಇನ್ನಿತರ ಕಡೆಗಳಲ್ಲಿ ಬೈಕ್ ವಿಲೀಂಗ್ ಪುಂಡಾಟಿಕೆ ಹೆಚ್ಚಾಗಿದೆ. ಈ ಬಗ್ಗೆ ಪೊಲೀಸರು ಸೂಕ್ತ ಕ್ರಮವಹಿಸಬೇಕು. ಗಾಂಜಾ ಮಾರಾಟ ಮಾಡುವುದನ್ನು ತಡೆಗಟ್ಟಬೇಕು. ಮಾದಕ ವಸ್ತುಗಳ ಸೇವನೆ ತಡೆ ಬಗ್ಗೆ ಹೆಚ್ಚು ಅರಿವು ಮೂಡಿಸಬೇಕು ಎಂದು ಮುಖಂಡರು ಆಗ್ರಹಿಸಿದರು.

ಡಿವೈಎಸ್ಪಿ ಮೋಹನ್ ಮಾತನಾಡಿ, ಅಪ್ರಾಪ್ತರಿಗೆ ಬೈಕ್‌ಗಳನ್ನು ನೀಡಬಾರದು ಎಂದು ಕಿವಿಮಾತು ಹೇಳಿದರು.

ಮುಖಂಡರಾದ ಅಕ್ತರ್ ಪಾಷ, ಜಮೀಲ್ ಪಾಷ, ಅಂಜು ಮಾನ್ ಇ-ಇಸ್ಲಾಮೀಯಾ ಸಮಿತಿ ಅಧ್ಯಕ್ಷ ಅಬೀಬ್ ಪಾಷ, ನಗರಸಭೆ ಮಾಜಿ ಅಧ್ಯಕ್ಷರೂ ಆದ ಕ್ರೈಸ್ತ ಮುಖಂಡ ಸೆಲ್ವರಾಜ್, ಪೀಟರ್, ವೀರಶೈವ ಲಿಂಗಾಯತ ಸಮಾಜದ ಮುಖಂಡ ವೀರಭದ್ರಸ್ವಾಮಿ, ನಾಯಕ ಸಮುದಾಯದ ಮುಖಂಡ ಚಿಕ್ಕಮಾದನಾಯಕ, ಶಂಕರ್ ನಾಯಕ, ಎಸ್.ಸಿದ್ದಪ್ಪಾಜಿ, ಮಂಜುನಾಥ್, ಕೊಳ್ಳೇಗಾಲ ಪೊಲೀಸ್ ವೃತ್ತ ನಿರೀಕ್ಷಕ ರವೀಂದ್ರ, ಪಟ್ಟಣ ಪೊಲೀಸ್ ಠಾಣೆ ಪಿಎಸ್‌ಐ ವರ್ಷಾ, ಅಪರಾಧ ವಿಭಾಗದ ಪಿಎಸ್‌ಐ ಉಮಾವತಿ ಇತರರು ಇದ್ದರು.