ಜಾನುವಾರುಗಳ ಮೇವಿಗೆ ತತ್ವಾರ

ಕಳೆದ ವರ್ಷ ಹಿಂಗಾರು ಮಳೆ ಕೈಕೊಟ್ಟ ಪರಿಣಾಮ ಜಾನುವಾರುಗಳ ಮೇವಿನ ಮೂಲಗಳಾದ ಹುರುಳಿ, ನೆಲಗಡಲೆ, ಮುಸುಕಿನ ಜೋಳ ರಾಗಿಯನ್ನು ಭಿತ್ತನೆ ಮಾಡಲು ಸಾಧ್ಯವಾಗಿಲ್ಲ. ಅಲ್ಲದೆ ಇದಕ್ಕೂ ಮುನ್ನ ಭಿತ್ತನೆ ಮಾಡಿದ್ದ ಸೂರ್ಯಕಾಂತಿ, ಜೋಳ ಮುಂತಾದ ಬೆಳೆಗಳು ತೇವಾಂಶದ ಕೊರತೆ ಹಾಗೂ ಬಿಸಿಲಿನ ತಾಪಕ್ಕೆ ಬಾಡಿದ್ದರಿಂದ ಕಳೆದ ಆರೇಳು ತಿಂಗಳಿನಿಂದಲೇ ಜಾನುವಾರುಗಳಿಗೆ ಮೇವಿನ ಕೊರತೆಯಾಗಿದ್ದರಿಂದ ರೈತರು ಹೆಚ್ಚಿನ ಹಣ ನೀಡಿ ತಮ್ಮ ಹೈನುಗಳಿಗೆ ಮೇವು ಖರೀದಿಸವಂತಾಗಿದೆ. ನೀರಾವರಿ ಪ್ರದೇಶಗಳಾದ ಟಿ.ನರಸೀಪುರ, ಕೊಳ್ಳೇಗಾಲ, ಯಳಂದೂರು ಹಾಗೂ ನಂಜನಗೂಡು ತಾಲೂಕುಗಳಿಂದ ಪ್ರತಿ ದಿನವೂ ನೂರಾರು ಕ್ವಿಂಟಾಲ್ ಮುಸುಕಿನ ಜೋಳದ ಮೇವನ್ನು ಖರೀದಿಸಿ ಟ್ರ್ಯಾಕ್ಟರ್, ಆಟೋಗಳ ಮೂಲಕ ಸಾಗಾಣೆ ಮಾಡುತ್ತಿದ್ದಾರೆ.

ಪ್ರತಿ ರಾಸಿಗೆ 5 ಕೆಜಿ ಮೇವು: ಪಶುಪಾಲನೆ ಇಲಾಖೆ ಅಂಕಿ ಅಂಶಗಳ ಪ್ರಕಾರ ತಾಲೂಕಿನಲ್ಲಿ ಇನ್ನೂ ಒಂದು ವಾರಕ್ಕೆ ಸಾಕಾಗುವಷ್ಟು ಮೇವಿನ ಸಂಗ್ರಹವಿದೆ. ಎನ್‌ಡಿ ಆರ್‌ಎಫ್ ಗೈಡ್ ಲೈನ್ ಪ್ರಕಾರ ಪ್ರತಿ ರಾಸಿಗೆ 5 ಕೆಜಿಯಂತೆ ನೀಡಿದರೆ 3 ರಿಂದ 4 ವಾರಗಳವರೆಗೆ ಸಾಕಾಗುತ್ತದೆ. ಆದರೆ ಹಾಲು ಕರೆಯುವ ಹಸುಗಳು ಹಾಗೂ ಉಳುಮೆ ಮಾಡುವ ಎತ್ತುಗಳಿಗೆ ರೈತರು ಹೊಟ್ಟೆತುಂಬುವಷ್ಟು (ಕನಿಷ್ಟ 25ರಿಂದ 30 ಕೆಜಿ) ಮೇವು ನೀಡುತ್ತಿದ್ದಾರೆ. ಇದರಿಂದ ರೈತರು ಬೇರೆ ಬೇರೆ ತಾಲೂಕುಗಳಿಂದ ಪ್ರತಿ ದಿನವೂ ಹತ್ತಾರು ಟ್ರ್ಯಾಕ್ತರ್‌ಗಳಲ್ಲಿ ಹಸಿ ಹಾಗೂ ಒಣ ಮೇವನ್ನು ಖರೀದಿಸುತ್ತಿರುವ ಪರಿಣಾಮ ರಸ್ತೆಗಳಲ್ಲಿ ಮೇವಿನ ವಾಹನಗಳ ಭರಾಟೆ ಜೋರಾಗಿದೆ.

ಹೈನುಗಾರಿಕೆ ಅವಲಂಬನೆ:

2021ರ ಜಾನುವಾರು ಗಣತಿಯ ಅಂಕಿಅಂಶಗಳ ಪ್ರಕಾರ ತಾಲೂಕಿನಲ್ಲಿ 61176 ಹಸು ಎಮ್ಮೆಗಳು, 23558 ಕುರಿಗಳು, 24365 ಮೇಕೆಗಳಿವೆ. ಎಚ್.ಎಫ್.ತಳಿಯ ಹಸುಗಳನ್ನು ಬಿಟ್ಟರೆ ನಾಟಿ ಹಸು ಎಮ್ಮೆ ಆಡು ಮೇಕೆಗಳ ಮಾಲೀಕರು ತಮ್ಮ ರಾಸುಗಳ ಮೇವಿಗೆ ಗೋಮಾಳಗಳನ್ನು ಅವಲಂಬಿಸಿದ್ದಾರೆ. ಕಂದಾಯ ಇಲಾಖೆಯ ದಾಖಲೆಗಳ ಪ್ರಕಾರ ತಾಲೂಕಿನಲ್ಲಿ 26026.19 ಹೆಕ್ಟೇರ್ ಗೋಮಾಳವಿದೆ. ಕಾಡಂಚಿನ ಗ್ರಾಮಗಳಲ್ಲಿ ಸುಮಾರು ಸಾವಿರಾರು ಹೆಕ್ಟೇರ್ ಪ್ರದೇಶದ ಸರ್ಕಾರಿ ಭೂಮಿಯನ್ನು ಕಂದಾಯ ಇಲಾಖೆಯು ಅರಣ್ಯ ಇಲಾಖೆಗೆ ನೀಡಿದೆ. ಅಲ್ಲದೆ ಬಹುತೇಕ ಗೋಮಾಳಗಳು ಒತ್ತುವರಿಯಾಗಿವೆ. ಸಣ್ಣ ಹಾಗೂ ಮಧ್ಯಮವರ್ಗದ ರೈತರು ಕಾರ್ಮಿಕರ ಕೊರತೆ, ಬೆಳೆದ ಬೆಲೆಗಳಿಗೆ ಸಮರ್ಪಕ ಬೆಲೆ ದೊರಕದಿರುವುದು, ಮಳೆಯ ಕೊರತೆಯಿಂದ ಅಂತರ್ಜಲ ಮಟ್ಟ ಕುಸಿತ ಮುಂತಾದ ಕಾರಣಗಳಿಂದ ಕೃಷಿಗಿಂತಲೂ ಹೆಚ್ಚಾಗಿ ಹೈನುಗಾರಿಕೆಯನ್ನು ಅವಲಂಬಿಸಿದ್ದಾರೆ. ಪ್ರತಿ ರೈತ ಕುಟುಂಬದಲ್ಲಿ ಒಂದೆರಡು ಹಸುಗಳನ್ನು ಸಾಕಾಣಿಕೆ ಮಾಡುತ್ತಿದ್ದಾರೆ.