ಇ-ಸ್ವತ್ತಿಗೆ ಲಂಚ ನಗರಸಭೆಗೆ ಕಳಂಕ

ಜೂ.2ರಂದು ನಗರದ ಆಸ್ತಿಯೊಂದರ ಇ-ಸ್ವತ್ತು ಮಾಡಿಕೊಡಲು 25 ಸಾವಿರ ರೂ.ಲಂಚ ಪಡೆಯುತ್ತಿದ್ದ ನಗರಸಭೆಯ ಕಂದಾಯ ಅಧಿಕಾರಿ ಹೇಮಂತ್‌ಕುಮಾರ್, ಕಂದಾಯ ನಿರೀಕ್ಷಕ ಶಕೀಲ್ ಅಹಮದ್, ಮಧ್ಯವರ್ತಿ ಹಬೀಬ್ ಲೋಕಾಯುಕ್ತರ ಬಲೆಗೆ ಬಿದ್ದಿದ್ದಾರೆ. ಮನೆ, ನಿವೇಶನದ ಮಾಲೀಕತ್ವವನ್ನು ಧೃಢೀಕರಿಸುವ ಅಧಿಕೃತ ಡಿಜಿಟಲ್ ದಾಖಲೆಯಾಗಿರುವ ಇ-ಸ್ವತ್ತು ಅಕ್ರಮ ಸಂಪಾದನೆಯ ಮೂಲವಾಗುತ್ತಿದೆ. ದಲ್ಲಾಳಿಗಳನ್ನು ಬೆಳೆಸಲು ಕಾರಣವಾಗುತ್ತಿದೆ.

ಚಾಮರಾಜನಗರ ನಗರಸಭೆಯಲ್ಲಿ ಇ-ಸ್ವತ್ತು ಮಾಡಿಸಿಕೊಳ್ಳಲು ಲಂಚ ನೀಡಬೇಕೆಂಬ ಆರೋಪ ಹಿಂದಿನಿಂದಲೂ ಇದೆ. ಬೇಸತ್ತ ಜನರು ನಗರಸಭೆ ಮುಂದೆ ಪ್ರತಿಭಟನೆ ನಡೆಸಿದ ಉದಾಹರಣೆಗಳೂ ಇವೆ. ಸುದ್ದಿಗೋಷ್ಠಿ ನಡೆಸಿ ಆಕ್ರೋಶ ವ್ಯಕ್ತಪಡಿಸಿಯೂ ಆಗಿದೆ.

ನಗರಸಭೆಯಲ್ಲಿ ಇ-ಸ್ವತ್ತು ಪಡೆಯಲು ಸಾರ್ವಜನಿಕರು ಅರ್ಜಿ ಸಲ್ಲಿಸಿ ಕಚೇರಿಗೆ ಅಲೆಯುವುದು, ವರ್ಷಗಟ್ಟಲೆ ಕಾದರೂ ಇ-ಸ್ವತ್ತು ಮಾಡಿಕೊಡದೆ ಇರುವುದು, ಅದೇ ದಲ್ಲಾಳಿಗಳ ಮೂಲಕ ಹೋದರೆ, ಇ-ಸ್ವತ್ತನ್ನು ಸುಲಭವಾಗಿ ಪಡೆಯಬಹುದು ಎಂಬ ಮಾತಿದೆ. ಇದಕ್ಕೆ ಪುಷ್ಟಿ ನೀಡುವಂತೆ ಜೂ.2ರಂದು ಲೋಕಾಯುಕ್ತರ ದಾಳಿ ನಡೆದಿದ್ದು, ಇಬ್ಬರು ಅಧಿಕಾರಿಗಳು ಮತ್ತು ಒಬ್ಬ ಮಧ್ಯವರ್ತಿಯನ್ನು ಬಂಧಿಸಿರುವುದು ನಗರಸಭೆಯ ಆಡಳಿತ ವ್ಯವಸ್ಥೆಯ ಮೇಲೆ ಲಂಚಾವತಾರದ ಕಳಂಕದ ಮಸಿ ಬಳಿದಿದೆ.

ನೂರಕ್ಕೂ ಹೆಚ್ಚು ಅರ್ಜಿಗಳು: ನಗರಸಭೆಯಲ್ಲಿ ಪ್ರಸ್ತುತ ಸುಮಾರು 110 ಅರ್ಜಿಗಳು ಇ-ಸ್ವತ್ತಿನ ಅರ್ಜಿಗಳು ಸಲ್ಲಿಕೆಯಾಗಿವೆ. ಇದಕ್ಕೂ ಮೊದಲು ಮೂರು ಸಾವಿರ ಅರ್ಜಿಗಳು ಇದ್ದವು ಎಂದು ನಗರಸಭೆ ಅಧಿಕಾರಿಗಳು ತಿಳಿಸಿದ್ದಾರೆ. ಇಷ್ಟೊಂದು ಅರ್ಜಿಗಳು ಬಾಕಿ ಉಳಿಯಲು ಹಿಂದೆ ಇದ್ದ ಆಡಳಿತ ವ್ಯವಸ್ಥೆಯೇ ಕಾರಣವಾಗಿತ್ತು. ಸಾರ್ವಜನಿಕರು ಸ್ವ-ಸತ್ತುಗಾಗಿ ಪ್ರತಿದಿನ ಕಚೇರಿಗೆ ಅಲೆಯುತ್ತಲೇ ಇದ್ದರು. ಜಿಲ್ಲಾಧಿಕಾರಿಗಳಿಗೆ ಸಲ್ಲಿಕೆಯಾಗುವ ದೂರಗಳಲ್ಲಿ ಇ-ಸ್ವತ್ತು ಮಾಡಿಕೊಡದೆ ಇರುವ ಬಗೆಗಿನ ತಕರಾರುಗಳೇ ಹೆಚ್ಚಾಗಿವೆ. ಪ್ರಸ್ತುತ ಬಾಕಿ ಇರುವ 110 ಅರ್ಜಿಗಳನ್ನು ಸಕಾಲದಲ್ಲಿ ವಿಲೇವಾರಿ ಮಾಡಿ ಇ-ಸ್ವತ್ತು ದೊರಕಿಸಿಕೊಡಬೇಕಾಗಿದೆ.

ನಗರಸಭೆಯಲ್ಲಿ ಇ-ಸ್ವತ್ತು ಮಾಡಿಸಿಕೊಡುವ ದಲ್ಲಾಳಿಗಳ ಹಾವಳಿ ವಿಪರೀತವಾಗಿದೆ. ಮಧ್ಯವರ್ತಿಗಳ ಕಡೆಯಿಂದ ಬಂದರೆ ಮಾತ್ರ ಕೆಲಸ ಆಗುತ್ತದೆ ಎನ್ನುವ ಪದ್ಧತಿ ರೂಢಿಯಾಗಿ ಹೋಗಿದೆ. ಕೆಲವರು ದಲ್ಲಾಳಿಗಳ ಕೆಲಸವನ್ನು ಖಾಯಂ ಉದ್ಯೋಗ ಮಾಡಿಕೊಂಡಿಬಿಟ್ಟಿದ್ದಾರೆ. ದಿನ ಬೆಳಗಾದರೆ ನಗರಸಭೆಗೆ ಇವರ ಭೇಟಿ ಇದ್ದೇ ಇರುತ್ತದೆ. ಕೆಲ ವರ್ಷಗಳ ಹಿಂದೆ ನಗರಸಭೆಯಲ್ಲಿ ದಲ್ಲಾಳಿಗಳ ಹಾವಳಿ ನಿಯಂತ್ರಣ ಮಾಡಲು ಸಂದರ್ಶಕರ ಹೆಸರು, ವಿಳಾಸ, ಭೇಟಿಯ ಕಾರಣವನ್ನು ಬರೆದುಕೊಳ್ಳಲಾಗುತ್ತಿತ್ತು. ಈ ಸಂದರ್ಭದಲ್ಲಿ ಬೇರೆಯವರಿಗೆ ಇ-ಸ್ವತ್ತು ಮಾಡಿಸಿಕೊಡಲು ನಗರಸಭೆ ಯಾರು, ಯಾವ ಕಾರಣಕ್ಕೆ ಬರುತ್ತಾರೆ ಎನ್ನುವುದು ಗೊತ್ತಾಗುತ್ತಿತ್ತು. ದಿನಕಳೆದಂತೆ ಈ ವ್ಯವಸ್ಥೆಯನ್ನು ಕೈಬಿಡಲಾಯಿತು. ದಲ್ಲಾಳಿಗಳಿಗೆ ರತ್ನಗಂಬಳಿ ಹಾಕಿದಂತಾಯಿತು. ನಗರಸಭೆಗೆ ಬರುವ ಸಾರ್ವಜನಿಕರಿಗೆ ಆಸ್ತಿ ದಾಖಲೆಗಳ ಕುರಿತು ಮಾಹಿತಿ ಪಡೆಯಲು, ಕೆಲಸ ಕಾರ್ಯಗಳನ್ನು ಎಲ್ಲಿ, ಹೇಗೆ ಮಾಡಿಸಿಕೊಳ್ಳಬೇಕೆಂಬ ಮಾಹಿತಿಯನ್ನು ತಿಳಿಸಲು ಸಿಬ್ಬಂದಿಯನ್ನು ನಿಯೋಜನೆ ಮಾಡಬೇಕಾಗಿದೆ. ದಲ್ಲಾಳಿಗಳ ಕಡೆಯಿಂದ ಬಂದ ಸಾರ್ವಜನಿಕರಿಗೆ ಅರಿವು ಮೂಡಿಸಿ ಸಕಾಲಕ್ಕೆ ಕೆಲಸ ಕಾರ್ಯಗಳನ್ನು ಮಾಡಿಕೊಟ್ಟರೆ ವಿಶ್ವಾಸ ಮೂಡುತ್ತದೆ.

ಜಿಲ್ಲೆಯಲ್ಲಿ ಕಾಗದ ರಹಿತ ಇ-ಆಫೀಸ್ ವ್ಯವಸ್ಥೆ ಜಾರಿಯಲ್ಲಿದೆ. ಆದರೆ ನಗರಸಭೆಯಲ್ಲಿ ಇನ್ನೂ ಕೂಡ ಪತ್ರ ವ್ಯವಹಾರ ನಡೆಯುತ್ತಿರುವುದು ಭ್ರಷ್ಟಾಚಾರಕ್ಕೆ ದಾರಿ ಮಾಡಿಕೊಡುತ್ತಿದೆ. ಇ-ಸ್ವತ್ತು ಪಡೆಯಲು ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಬಹುದು. ಸಲ್ಲಿಸಿದ ಅರ್ಜಿಗೆ ಅಧಿಕಾರಿಗಳು ಸಕಾಲದಲ್ಲಿ ಸ್ಪಂದಿಸಬೇಕು. ಇಲ್ಲದಿದ್ದರೆ ಅಧಿಕಾರಿಗಳ ಕರ್ತವ್ಯಲೋಪವಾಗುತ್ತದೆ. ಈ ವ್ಯವಸ್ಥೆ ಪಾರದರ್ಶಕತೆಗೆ ಸಹಕಾರಿಯಾಗಿದೆ. ದಲ್ಲಾಳಿಗಳ ಹಾವಳಿಗೂ ಕಡಿವಾಣ ಬೀಳುತ್ತದೆ. ಚಾಮರಾಜನಗರ ನಗರಸಭೆಯಲ್ಲಿ ಆನ್‌ಲೈನ್‌ನಲ್ಲಿ ಇ-ಸ್ವತ್ತು ಅರ್ಜಿ ಸಲ್ಲಿಸುವವರು ತುಂಬಾ ಕಡಿಮೆ ಇದ್ದಾರೆ. ಕಾಗದ ಪತ್ರ ವ್ಯವಹಾರದಲ್ಲೇ ಅರ್ಜಿಗಳನ್ನು ಸಲ್ಲಿಕೆ ಮಾಡುತ್ತಿದ್ದಾರೆ. ಇದು ಸೂಕ್ತ ದಾಖಲೆಗಳನ್ನು ಸಲ್ಲಿಸಿದ್ದರೂ ಇಲ್ಲವೆಂದು ಬಾಕಿ ಇಡುವ, ಅಲೆದಾಡಿಸುವ, ಸ್ವಹಿತಾಸಕ್ತಿಯನ್ನು ಪೂರೈಸಿಕೊಳ್ಳಲು ಕಾರಣವೂ ಆಗುತ್ತಿದೆ.

ಚಾಮರಾಜನಗರ ನಗರಸಭೆ ಮೇಲೆ ಹಲವು ಬಾರಿ ಲೋಕಾಯುಕ್ತರ ದಾಳಿ ನಡೆದಿದೆ. ಆಗಲೂ ಸಹ ಇ-ಸ್ವತ್ತು ಮಾಡಿಸಿಕೊಳ್ಳಲು ಲಂಚ ಪಡೆಯುವಾಗ ಸಿಕ್ಕಿಬಿದ್ದಿರುವ ಉದಾರಹಣೆಗಳಿವೆ. ಸರ್ಕಾರಿ ಕಚೇರಿಗಳನ್ನು ಭ್ರಷ್ಟಾಚಾರ ಮುಕ್ತಗೊಳಿಸಲು ಸಾರ್ವಜನಿಕರ ಬಳಿ ಲಂಚ ಕೇಳಿದರೆ ದೂರು ನೀಡಲು ನಾಮಲಕಗಳನ್ನು ಅಳವಡಿಸಲಾಗಿದೆ. ಇವೆಲ್ಲವೂ ಗೋಡೆಗೆ ಮಾತ್ರ ಸೀಮಿತವಾಗದೆ ಇರಬೇಕಾದರೆ ಆಡಳಿತ ವ್ಯವಸ್ಥೆ ಪಾರದರ್ಶಕವಾಗಿರಬೇಕಾಗಿದೆ.

ಇ-ಸ್ವತ್ತು ತಗಾದೆ ಕೇವಲ ಚಾಮರಾಜನಗರ ನಗರಸಭೆಗೆ ಮಾತ್ರ ಸೀಮಿತವಾಗಿಲ್ಲ. ಜಿಲ್ಲೆಯ ವಾಣಿಜ್ಯ ಕೇಂದ್ರವಾಗಿರುವ ಕೊಳ್ಳೇಗಾಲ ನಗರಸಭೆಯಲ್ಲೂ ಸಮಸ್ಯೆಯಾಗಿ ಕಾಡುತ್ತಿದೆ. ಇದರ ಸಂಬಂಧ ಬೆಂಗಳೂರಿನ ಸದಾಶಿವನಗರದ ಜಿ.ಸಿ.ರವಿಕುಮಾರ್ ಚಾಮರಾಜನಗರ ಲೋಕಾಯುಕ್ತಕ್ಕೆ ದೂರನ್ನೂ ಸಲ್ಲಿಸಿದ್ದಾರೆ. 2025ರ ಮಾ.13ರಂದು ನಿವೇಶನದ ಇ-ಸ್ವತ್ತಿಗಾಗಿ ಎಲ್ಲ ದಾಖಲೆಗಳೊಂದಿಗೆ ಅರ್ಜಿ ಸಲ್ಲಿಸಿದ್ದರೂ ವಿಳಂಬ ಮಾಡಲಾಗುತ್ತಿದೆ. ಬೇರೆಯವರಿಗೆ ಇ-ಸ್ವತ್ತು ಕೊಟ್ಟಿದ್ದರೂ ನನ್ನ ನಿವೇಶನಕ್ಕೆ ನೀಡಿಲ್ಲ. ಈ ವಿಚಾರದಲ್ಲಿ ಕರ್ತವ್ಯಲೋಪವೆಸಗಿರುವ ಅಧಿಕಾರಿಗಳ ವಿರುದ್ಧ ಕ್ರಮ ತೆಗೆದುಕೊಳ್ಳಬೇಕೆಂದು ದೂರಿನಲ್ಲಿ ಕೋರಿದ್ದಾರೆ.

ನಾನು ಪೌರಾಯುಕ್ತನಾಗಿ ಬರುವ ಮೊದಲು ಇ-ಸ್ವತ್ತಿಗಾಗಿ ಸಾವಿರಾರು ಅರ್ಜಿಗಳು ಬಾಕಿ ಇದ್ದವು. ಆದರೆ ಈಗ ಸುಮಾರು 110 ಅರ್ಜಿಗಳು ಇವೆ. ನಗರಸಭೆಯಲ್ಲಿ ಇ-ಸ್ವತ್ತು ಪಡೆಯಲು ಕಾಗದ ಪತ್ರದಲ್ಲಿ ಅರ್ಜಿ ಸಲ್ಲಿಸುವವರೇ ಹೆಚ್ಚು. ಇದರ ಬದಲು ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸುವುದು ಸೂಕ್ತ. ಸಕಾಲದಲ್ಲಿ ಅರ್ಜಿ ವಿಲೇವಾರಿ ಮಾಡದಿದ್ದರೆ ಅಧಿಕಾರಿಗಳೇ ಹೊಣೆಗಾರರಾಗುತ್ತಾರೆ.