ನಮ್ಮ ಜಿಲ್ಲೆ ಇಡೀ ರಾಜ್ಯದಲ್ಲಿ ಹೆಚ್ಚು ಕಾಡನ್ನು ಹೊಂದಿರುವ ಜಿಲ್ಲೆಯಾಗಿದೆ. ಇಲ್ಲಿನ ಬಿಳಿಗಿರಿರಂಗನಬೆಟ್ಟ ಪೂರ್ವ ಹಾಗೂ ಪಶ್ಚಿಮ ಘಟ್ಟಗಳು ಸಂದಿಸುವ ಸ್ಥಳವಾಗಿದೆ. ಇಲ್ಲಿ ಅನೇಕ ಬಗೆಯ ಕಾಡುಗಳನ್ನು ಒಂದೇ ಅರಣ್ಯದಲ್ಲಿ ಕಾಣಬಹುದಾಗಿದೆ. ಹಾಗಾಗಿ ಈ ಕಾಡಿನಲ್ಲಿ ವಿವಿಧ ಬಗೆಯ ಪ್ರಾಣಿ, ಪಕ್ಷಿ, ಕೀಟ, ಸರಿಸೃಪ, ಉಭಯವಾಸಿಗಳು, ಗಿಡ, ಮರ, ಬಳ್ಳಿ, ಪೊದೆ ಸಸ್ಯಗಳು ಸೇರಿದಂತೆ ಅನೇಕ ಜೀವವೈವಿಧ್ಯ ಕಾಣಬಹುದು. ಇದು ಕಾಡಿನ ಕೊಂಡಿಯಾಗಿವೆ. ಶುದ್ಧ ಆಮ್ಲಜನಕವನ್ನು ಪೂರೈಸುವ ಜತೆಗೆ ಮನುಕುಲ ಹಾಗೂ ಜೀವ ಸಂಕುಲಕ್ಕೆ ಬೇಕಾದ ಎಲ್ಲವನ್ನೂ ಕೊಡುವ ಕಾಡುಗಳನ್ನು ನಾಶ ಮಾಡಿದ್ದಲ್ಲಿ ಇಡೀ ಜೀವ ಸಂಕುಲಕ್ಕೆ ಕಂಟಕವಾಗುತ್ತದೆ. ಹಾಗಾಗಿ ಅರಣ್ಯ ರಕ್ಷಣೆ ನಮ್ಮೆಲ್ಲರ ಹೊಣೆಯಾಗಿದೆ. ಪ್ಲಾಸ್ಟಿಕ್ನಂತಹ ಪದಾರ್ಥಗಳನ್ನು ಕಾಡಿನಲ್ಲಿ ಬೀಸಾಡಬಾರದು. ಅರಣ್ಯ ಸಂಪತ್ತನ್ನು ಲೂಟಿ ಮಾಡುವರ ಬಗ್ಗೆ ಇಲಾಖೆಗೆ ಮಾಹಿತಿ ನೀಡಬೇಕು. ವನ್ಯಪ್ರಾಣಿಗಳ ಸಂರಕ್ಷಣೆಗೆ ಎಲ್ಲರೂ ಕೈ ಜೋಡಿಸಬೇಕು ಎಂದು ಮನವಿ ಮಾಡಿದರು.
