ಬಿ.ರಾಚಯ್ಯ, ಗೌರಮ್ಮ ದಂಪತಿ ಮಾಸದ ನೆನಪು

ತಾಲೂಕಿನ ಆಲೂರು ಗ್ರಾಮದ ಬಿ.ರಾಚಯ್ಯ ಸ್ಮಾರಕ ಭವನದ ಆವರಣದಲ್ಲಿ ಶುಕ್ರವಾರ ಆಯೋಜಿಸಿದ್ದ ಕಾರ್ಯಕ್ರಮ ಬಿ.ರಾಚಯ್ಯ ಅವರು ನಾಡಿಗೆ ಸಲ್ಲಿಸಿದ ಸೇವೆ ಮತ್ತು ಅವರಿಗೆ ಬೆನ್ನೆಲುಬಾಗಿ ನಿಂತಿದ್ದ ಪತ್ನಿ ಗೌರಮ್ಮ ಅವರ ಮಮಕಾರವನ್ನು ಕುಟುಂಬದವರು, ಗ್ರಾಮಸ್ಥರು, ಸಾರ್ವಜನಿಕರು ನೆನಪು ಮಾಡಿಕೊಳ್ಳುವಂತೆ ಮಾಡಿತು.

ಬಿ.ರಾಚಯ್ಯ ಅವರ ಜೀವನ ಚರಿತ್ರೆಯ ಛಾಯಾಚಿತ್ರಗಳನ್ನು ತುಂಬಿಕೊಂಡಿರುವ ಸ್ಮಾರಕ ಭವನ, ವಿವಿಧ ಬಗೆಯ ಹೂವುಗಳಿಂದ ಸಿಂಗಾರಗೊಂಡು ಸ್ಮರಣೆಯ ಭಾಗವಾದವು. ಕೊಳ್ಳೇಗಾಲ ಶಾಸಕ ಎ.ಆರ್.ಕೃಷ್ಣಮೂರ್ತಿ, ಮಂಜುಳಾ ಕೃಷ್ಣಮೂರ್ತಿ, ಜಿಲ್ಲಾ ಪಂಚಾಯಿತಿ ಮಾಜಿ ಸದಸ್ಯ ಎ.ಆರ್.ಬಾಲರಾಜ್ ಮತ್ತು ಶ್ರೀವರ್ಧನ್ ಅವರು ಮೊದಲಿಗೆ ಸಮಾಧಿಗೆ ಪೂಜೆ ಸಲ್ಲಿಸಿದರು. ಬಳಿಕ ಕುಟುಂಬಸ್ಥರು, ಮುಖಂಡರು, ವಿವಿಧ ಇಲಾಖೆಗಳ ಅಧಿಕಾರಿಗಳು, ಸಾರ್ವಜನಿಕರು ನಮನ ಸಲ್ಲಿಸುವ ಮೂಲಕ ಬಿ.ರಾಚಯ್ಯ ಮತ್ತು ಗೌರಮ್ಮ ಅವರ ಸ್ಮರಣೆ ಮಾಡಿದರು.

ಕುಟುಂಬಸ್ಥರಾದ ತ್ರಿವೇಣಿ ಬಿ.ಬಿ.ಲಿಂಗಯ್ಯ, ಎ.ಆರ್.ಪ್ರಭಾ, ಉಮಾ ಪುಟ್ಟಮಾದಯ್ಯ, ರೋಷಿಣಿ, ಪ್ರದೀಪ್‌ಕುಮಾರ್, ಆಲೂರು ಮಲ್ಲಣ್ಣ ಇತರರು ಹಾಜರಿದ್ದರು. ಗಾಯಕರಾದ ಬಸವರಾಜು, ನಟರಾಜು ಹಾಗೂ ಸಂಗಡಿಗರು ನಡೆಸಿಕೊಟ್ಟ ಸಂಗೀತ ಕಾರ್ಯಕ್ರಮ ಸ್ಮರಣೆಯ ಮೆರುಗನ್ನು ಹೆಚ್ಚಿಸಿತು. ಆಗಮಿಸಿದ್ದ ಎಲ್ಲರಿಗೂ ಊಟದ ವ್ಯವಸ್ಥೆ ಮಾಡಲಾಗಿತ್ತು.