ಹಣಕಾಸು ವಿಚಾರವಾಗಿ ಹಲ್ಲೆ ಆರೋಪ

ತಾಲೂಕಿನ ಮುಳ್ಳೂರು ಗ್ರಾಮದ ಕೂಲಿ ಕಾರ್ಮಿಕ ಮಹೇಶ್ ಹಲ್ಲೆಗೊಳಗಾದ ಯುವಕ. ಅದೇ ಗ್ರಾಮದ ಮಂಜುನಾಥ್, ಶಶಾಂಕ್, ನಿಶಾಂತ್, ನಂದೀಶ, ಗಣೇಶ್ ಪ್ರಸಾದ್, ರಾಹುಲ್ ಆರೋಪಿಗಳಾಗಿದ್ದಾರೆ. ಹಣಕಾಸು ವಿಚಾರವಾಗಿ ಕೊಳ್ಳೇಗಾಲದ ಆರ್‌ಎಂಸಿ ಬಳಿಗೆ ಮಂಜುನಾಥ್ ನನ್ನನ್ನು ಕರೆಸಿಕೊಂಡು ಬ್ಲೇಡ್‌ನಿಂದ ಹಲ್ಲೆ ಮಾಡಿದ್ದಾನೆ. ನಂತರ ಶಶಾಂಕ್, ನಿಶಾಂತ್ ಎಂಬುವರು ಆಸ್ಪತ್ರೆ ಬಳಿ ಬಂದು ನೀನು ದೂರು ಕೊಡುವುದು ಬೇಡ, ಈ ವಿಚಾರವನ್ನು ಬಗೆಹರಿಸಿಕೊಳ್ಳೋಣ ಎಂದು ತಿಮ್ಮರಾಜೀಪುರ ಕಡೆಗೆ ನನ್ನನ್ನು ಕರೆದೊಯ್ಯುವಾಗ ನಂದೀಶ್, ಗಣೇಶ್, ರಾಹುಲ್ ಹಿಂಬಾಲಿಸಿಕೊಂಡು ಬಂದು ಒಗ್ಗೂಡಿದರು. ನಾನು ಅನುಮಾನಗೊಂಡು ಪ್ರಶ್ನಿಸಿದ್ದಕ್ಕೆ ಕೆಳಕ್ಕೆ ಕೆಡವಿ, ತಲೆಗೆ ಕಲ್ಲಿನಿಂದ ಹೊಡೆದು ಹಲ್ಲೆ ಮಾಡಿದ್ದಾರೆ. ಅಲ್ಲದೆ ಮಂಜುನಾಥ್ ನನಗೆ ಕೊಲೆ ಬೆದರಿಕೆ ಹಾಕಿದ್ದಾನೆ ಎಂದು ದೂರು ನೀಡಿದ್ದಾನೆ.

ಆರೋಪಿ ಮಂಜುನಾಥ್ ಸಹ ಪೊಲೀಸರಿಗೆ ದೂರು ನೀಡಿದ್ದು, ತಿಮ್ಮರಾಜೀಪುರ ಬಳಿ ನಾನು ತೆರಳುವಾಗ ಮಹೇಶ್ ಸ್ಥಳಕ್ಕೆ ಬಂದು ನಿನ್ನನ್ನು ಕೊಲೆ ಮಾಡದೆ ಬಿಡುವುದಿಲ್ಲವೆಂದು ಹಲ್ಲೆ ಮಾಡಿದ್ದಾನೆ. ಗಲಾಟೆಯಲ್ಲಿ ಇಬ್ಬರು ಕೆಳಗೆ ಬಿದ್ದಾಗ ಚರಂಡಿ ಕಲ್ಲು ಮಹೇಶ್ ತಲೆಗೆ ತಗುಲಿ ಪೆಟ್ಟಾಗಿದೆ. ಉದ್ದೇಶಪೂರ್ವಕವಾಗಿ ನನ್ನನ್ನು ಹುಡುಕಿಕೊಂಡು ಬಂದು ಗಲಾಟೆ ಮಾಡಿ ಕೊಲೆ ಬೆದರಿಕೆ ಹಾಕಿರುವ ಮಹೇಶ್ ಮೇಲೆ ಕಾನೂನು ಕ್ರಮ ಜರುಗಿಸಬೇಕೆಂದು ದೂರು ನೀಡಿದ್ದಾರೆ. ದೂರು ಮತ್ತು ಪ್ರತಿ ದೂರು ದಾಖಲಿಸಿಕೊಂಡ ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.