ದಾಹ ನೀಗಿಸಲು ‘ತಂತ್ರಜ್ಞಾನ’ ಆಧಾರಿತ ಪರಿಹಾರ

ವಾತಾವರಣದಲ್ಲಿರುವ ಗಾಳಿಯಲ್ಲಿನ ತೇವಾಂಶದಿಂದ ನೀರು ಉತ್ಪಾದಿಸುವ ‘ಏರ್ ಟು ವಾಟರ್ ಪ್ಲಾಂಟ್ಸ್’ ತಂತ್ರಜ್ಞಾನವು ಭವಿಷ್ಯದಲ್ಲಿ ಜಿಲ್ಲೆಯ ಪಾಲಿಗೆ ‘ಭಗೀರಥ’ ನಾಗುವ ಲಕ್ಷಣಗಳು ಕಾಣುತ್ತಿದೆ. ನೂತನವಾಗಿ ಜಿಲ್ಲೆಗೆ ಬಂದ ಡಿಸಿ ಶ್ರೀರೂಪಾ ಅವರನ್ನು ಬಾಯಾರಿದ ಚಾಮರಾಜನಗರ ಸ್ವಾಗತಿಸಿತು. ಕುಡಿಯುವ ನೀರಿನ ಶಾಶ್ವತ ಯೋಜನೆಗಳು ಇನ್ನೂ ಪ್ರಗತಿಯಲ್ಲೇ ಇರುವ, ಪೂರ್ಣಗೊಂಡಿದ್ದರೂ ನೀರು ಹರಿಯದ, ಜಲಮೂಲಗಳಿಲ್ಲದ ಮತ್ತು ಅಂತರ್ಜಲ ಕುಸಿದಿರುವ ಪ್ರದೇಶಗಳ ನೀರಡಿಗೆ ನಿವಾರಿಸುವ ಸವಾಲು ಗಮನ ಸೆಳೆಯಿತು.

ಇದಕ್ಕೆ ತಂತ್ರಜ್ಞಾನ ಆಧಾರಿತ ಪರಿಹಾರ ಕಂಡುಕೊಳ್ಳಲು ಬೆಂಗಳೂರಿನ ಏರೋ ವಾಟರ್ ತಂತ್ರಜ್ಞಾನ ತಂಡದೊಂದಿಗೆ ಡಿಸಿ ಶ್ರೀರೂಪಾ ಮಹತ್ವದ ಚರ್ಚೆ ನಡೆಸಿದರು. ವಾಯುವಿನಿಂದ ನೀರನ್ನು ಉತ್ಪಾದನೆ ಮಾಡುವ ಏರ್ ಟು ವಾಟರ್ ಪ್ಲಾಂಟ್ಸ್ ಅಳವಡಿಸುವ ನಿರ್ಧಾರ ಕೈಗೊಂಡರು. ಈ ಪ್ರಯತ್ನದ ಮೊದಲ ಪ್ರಾಯೋಗಿಕ ಮಾದರಿಯೇ ಈಗ ಜಿಲ್ಲೆಯಲ್ಲಿ ಗುಟುಕು ನೀರಿಗೂ ಪರದಾಡಬೇಕಾದ ಕಡೆಗಳಲ್ಲಿ ಬವಣೆ ತಗ್ಗಿಸುವ ಹೊಸ ಆಶಾಭಾವವನ್ನು ಮೂಡಿಸುತ್ತಿದೆ.

ನಗರದ ಸೋಮವಾರಪೇಟೆಯ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಜಿಲ್ಲಾಡಳಿತ 100 ಲೀಟರ್ ಸಾಮರ್ಥ್ಯದ ಏರ್ ಟು ವಾಟರ್ ಪ್ಲಾಂಟ್‌ನ ಮೊದಲ ಮಾದರಿಯನ್ನು ಅಳವಡಿಸಿದೆ. ಜಿಲ್ಲಾ ಉಸ್ತುವಾರಿ ಸಚಿವ ಕೆ.ವೆಂಕಟೇಶ್ ಇದನ್ನು ಉದ್ಘಾಟನೆ ಮಾಡಿದ್ದರು. ಈ ಪ್ಲಾಂಟ್ ವಾತಾವರಣದಲ್ಲಿರುವ ತೇವಾಂಶವನ್ನು ಸಂಗ್ರಹಿಸಿ, ಸಾಂದ್ರೀಕರಿಸಿ, ಶುದ್ಧೀಕರಿಸಿ ಕುಡಿಯಲು ಯೋಗ್ಯವಾದ ನೀರನ್ನು ನೀಡುತ್ತದೆ.

ಈ ಕುರಿತು ಶಾಲೆಯ ಮುಖ್ಯ ಶಿಕ್ಷಕಿ ಸಿ.ಆರ್.ನಾಗಲಕ್ಷ್ಮೀ ‘ವಿಜಯವಾಣಿ’ಯೊಂದಿಗೆ ಮಾತನಾಡಿ, ಸ್ಕೂಲ್‌ನಲ್ಲಿ 1ರಿಂದ 7ನೇ ತರಗತಿವರೆಗೆ ಸುಮಾರು 80 ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ. ಶಾಲೆಗೆ ವಾರಕ್ಕೊಮ್ಮೆ ಸರಬರಾಜು ಆಗುವ ನಲ್ಲಿ ನೀರು ಅಥವಾ ಸಾರ್ವಜನಿಕ ಕೊಳವೆ ಬಾವಿಯಿಂದ ಬರುವ ನೀರು ಬರುತ್ತಿತ್ತು. ಮಕ್ಕಳಿಗೆ ಕುಡಿಯುವುದಕ್ಕಾಗಿ ಶುದ್ಧ ನೀರನ್ನು ಹೊರಗಿನಿಂದ ಹಣ ಕೊಟ್ಟು ತರಲಾಗುತ್ತಿತ್ತು. ಆದರೆ ಪ್ಲಾಂಟ್ ಅಳವಡಿಸಿದ ಬಳಿಕ ಹೊರಗಿನಿಂದ ನೀರು ತರುತ್ತಿಲ್ಲ. ಪ್ಲಾಂಟ್ ವಾತಾವರಣದಲ್ಲಿ ತೇವಾಂಶ ಹೆಚ್ಚಾಗಿರುವ ಸಂದರ್ಭಗಳಾದ ಮುಂಜಾನೆ ಮತ್ತು ಸಂಜೆ ವೇಳೆ ಹೆಚ್ಚು ನೀರು ಉತ್ಪಾದನೆ ಮಾಡುತ್ತಿದೆ. ದಿನಕ್ಕೆ 40-50 ಲೀಟರ್ ನೀರು ಗಾಳಿಯಿಂದ ಉತ್ಪಾದನೆಯಾಗುತ್ತಿದೆ. ವಿದ್ಯುಚ್ಛಕ್ತಿ ಮೂಲಕ ಕಾರ್ಯ ನಿರ್ವಹಿಸುತ್ತಿರುವ ಪ್ಲಾಂಟ್ ಅನ್ನು ಶಾಲೆಯ ಆವರಣದಲ್ಲಿ ಇಡಲಾಗಿದೆ. ಕುಡಿಯುವ ನೀರಿನ ನಲ್ಲಿಗಳನ್ನು ಕೊಠಡಿಯಲ್ಲಿ ಅಳವಡಿಸಲಾಗಿದೆ. ಶಿಕ್ಷಕರು ಮತ್ತು ವಿದ್ಯಾರ್ಥಿಗಳು ಕುಡಿಯುವುದಕ್ಕಾಗಿ ಈ ನೀರನ್ನು ಬಳಕೆ ಮಾಡುತ್ತಿದ್ದೇವೆ ಎಂದು ವಿವರಿಸಿದ್ದಾರೆ.

ಸರ್ಕಾರಿ ಶಾಲೆಯಲ್ಲಿ ಅಳವಡಿಸಿರುವ ಏರ್ ಟು ವಾಟರ್ ಪ್ಲಾಂಟ್ ನೋಡಿದರೆ, ಜಿಲ್ಲೆಯಲ್ಲಿ ಮಳೆ ಇಲ್ಲದ, ಅಂತರ್ಜಲ ಕುಸಿದಿರುವ ಪ್ರದೇಶಗಳಲ್ಲಿ ಅಗತ್ಯ ಸಾಮರ್ಥ್ಯದ ಪ್ಲಾಂಟ್ಸ್‌ಗಳನ್ನು ಅಳವಡಿಸಿದರೆ ನೀರಿನ ಬವಣೆ ಕಡಿಮೆಯಾಗುತ್ತದೆ ಎಂದು ಅಂದಾಜಿಸಬಹುದು. ಚಾಮರಾಜನಗರಕ್ಕೆ ತಿ.ನರಸೀಪುರಕ್ಕೆ ಸರಬರಾಜು ಆಗುವ ಕುಡಿಯುವ ನೀರು ವ್ಯತ್ಯಯವಾಗುತ್ತಲೇ ಇರುತ್ತದೆ. ನಗರ ಮತ್ತು ಪಟ್ಟಣ ಪ್ರದೇಶಗಳ ನಿವಾಸಿಗಳೇನೋ ಶುದ್ಧ ಕುಡಿಯುವ ನೀರಿನ ಘಟಕಗಳ ಮೊರೆ ಹೋಗುತ್ತಾರೆ. ಆದರೆ ಗುಡ್ಡಗಾಡು, ದಟ್ಟ ಅರಣ್ಯವಿರುವ ಪ್ರದೇಶಗಳ ಜನ ವಸತಿ ಸ್ಥಳಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಕಾಡುತ್ತಿದೆ. ಇದನ್ನು ಪರಿಹರಿಸಲು ಏರ್ ಟು ವಾಟರ್ ಸದ್ಯದ ತಂತ್ರಜ್ಞಾನ ಆಧಾರಿತ ಪರಿಹಾರವಾಗಿದೆ. ಈ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಬೇರೆ ಕಡೆಗಳಲ್ಲೂ ಏರ್ ಟು ವಾಟರ್ ಪ್ಲಾಂಟ್ಸ್‌ಗಳನ್ನು ಅಳವಡಿಸಲು ಚಿಂತನೆ ನಡೆಸಿದೆ. ೆ.24ರಂದು ಪ್ಲಾಂಟ್ ಉದ್ಘಾಟಿಸಿದ್ದ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ವೆಂಕಟೇಶ್, ದುರ್ಗಮ ಮತ್ತು ಕಾಡಿನ ಪ್ರದೇಶಗಳನ್ನು ಗಮನದಲ್ಲಿಟ್ಟುಕೊಂಡು ಈ ತಂತ್ರಜ್ಞಾನವನ್ನು ಪರಿಚರಿಸಲಾಗಿದೆ ಎಂದಿದ್ದನ್ನು ಇಲ್ಲಿ ಸ್ಮರಿಸಬಹುದು.

"