ಅಪರೂಪದ ತಾಳೆಗರಿಗಳ ಸಂಗ್ರಹ

ಕೇಂದ್ರ ಸರ್ಕಾರ ‘ಜ್ಞಾನ ಭಾರತ್ ಮಿಷನ್’ ಯೋಜನೆಯಡಿಯಲ್ಲಿ ರಾಜ್ಯದ ವಿವಿಧ ವಿಶ್ವವಿದ್ಯಾಲಯಗಳು ಹಾಗೂ ಸಂಘ-ಸಂಸ್ಥೆಗಳ ಸಂಗ್ರಹದಲ್ಲಿರುವ ಹಸ್ತಪ್ರತಿಗಳ ಸಂಗ್ರಹಣೆ ಮತ್ತು ಡಿಜಿಟಲೀಕರಣಕ್ಕೆ ಮುಂದಾಗಿದೆ. ಅದರಂತೆ ಚಾಮರಾಜನಗರ ವಿಶ್ವವಿದ್ಯಾಲಯದ ಸಹಕಾರದೊಂದಿಗೆ ಚಾಮರಾಜನಗರದ ಸರ್ಕಾರಿ ಪ್ರಥಮದರ್ಜೆ ಮಹಿಳಾ ಕಾಲೇಜಿನ ಇತಿಹಾಸ ವಿಭಾಗದ ಮುಖ್ಯಸ್ಥ ಹಾಗೂ ಪ್ರಾಧ್ಯಾಪಕರಾಗಿ ಕರ್ತವ್ಯ ನಿರ್ವಹಿಸುತ್ತಿರುವ ಡಾ.ಬಿ.ಆರ್.ಜಯಣ್ಣ ಅವರು ಕಳೆದ 3-4 ತಿಂಗಳಿಂದ ಜಿಲ್ಲೆಯ ವಿವಿಧ ಗ್ರಾಮಗಳು, ಮಠಮಾನ್ಯಗಳು, ದೇವಾಲಯಗಳು ಹಾಗೂ ಇನ್ನಿತರೆ ಐತಿಹಾಸಿಕ ಸ್ಥಳಗಳಿಗೆ ಭೇಟಿ ನೀಡಿ ಅಪರೂಪದ ತಾಳೆಗರಿ, ಓಲೆಗರಿ, ವಿವಿಧ ತಾಮ್ರ ಶಾಸನಗಳು ಹಾಗೂ ಕೈಬರಹದ ವಿವಿಧ ದಾಖಲೆಗಳನ್ನು ಸಂಗ್ರಹ ಮಾಡುತ್ತಿದ್ದಾರೆ.

ಈ ಮಹತ್ಕಾರ್ಯಕ್ಕೆ ರಜಾ ದಿನಗಳನ್ನು ಸದುಪಯೋಗಪಡಿಸಿಕೊಳ್ಳುತ್ತಿರುವ ಡಾ.ಜಯಣ್ಣ ಅವರು ಚಾಮರಾಜನಗರ ವಿಶ್ವವಿದ್ಯಾಲಯದ ಕುಲಪತಿ ಪ್ರೊ.ಎಂ.ಆರ್.ಗಂಗಾಧರ್ ಅವರ ಮಾರ್ಗದರ್ಶನದಲ್ಲಿ ಪ್ರಾಚೀನ ಕಾಲದ ಮತ್ತಷ್ಟು ದಾಖಲೆಗಳನ್ನು ಕಳೆ ಹಾಕುವಲ್ಲಿ ಶ್ರಮಿಸುತ್ತಿದ್ದಾರೆ.

ಸ್ನಾತಕೋತ್ತರ ಪದವಿ ಮತ್ತು ಉನ್ನತ ವ್ಯಾಸಂಗ ಮಾಡುತ್ತಿರುವಾಗಿನಿಂದಲೂ ಇತಿಹಾಸದ ಹಲವು ದಾಖಲೆಗಳನ್ನು ಸಂಗ್ರಹಿಸುವುದರಲ್ಲಿ ಜಯಣ್ಣ ಅವರು ಆಸಕ್ತಿಯನ್ನು ಹೊಂದಿದ್ದರು. ಅದು ಈ ಸಂದರ್ಭದಲ್ಲಿ ನೆರವಿಗೆ ಬರುತ್ತಿದ್ದು, ಈ ಮೂಲಕ ಜಿಲ್ಲೆಯಲ್ಲಿ ಅಡಗಿರುವ ಇತಿಹಾಸದ ಮತ್ತಷ್ಟು ಮಾಹಿತಿಗಳನ್ನು, ಈ ಭಾಗದ ವಚನ ಸಾಹಿತ್ಯ ಕಾಲದ ಮಾಹಿತಿಗಳನ್ನು, ರಾಜ-ಮಹಾರಾಜರ ದಾನದತ್ತಿಗಳ ಮಾಹಿತಿಗಳನ್ನು, ವೈದ್ಯಕೀಯ ಪದ್ಧತಿಗೆ ಸಂಬಂಧಿಸರಬಹುದಾದ ವಿಚಾರಗಳನ್ನು ತಿಳಿಯಲು ಸಹಕಾರಿಯಾಗಲಿದೆ.

ಜಿಲ್ಲೆಯ ಪಡಗೂರು ಮಠ, ಮೂಡಗೂರು ಮಠ, ಮರಿಯಾಲದ ಶ್ರೀಮುರುಘರಾಜೇಂದ್ರಸ್ವಾಮಿ ಮಠ, ಹುರಳಿನಂಜನಪುರ, ನಂಜದೇವನಪುರ, ತೆರಕಣಾಂಬಿ ಗ್ರಾಮದ ಶನೇಶ್ವರಸ್ವಾಮಿ ದೇವಾಲಯ, ಕಬ್ಬಹಳ್ಳಿ ಮಠ, ಕುಂತೂರು ಮಠ, ಮೈಸೂರು ಜಿಲ್ಲೆಯ ಸರಗೂರು ತಾಲೂಕಿನ ದಡದಹಳ್ಳಿ ಮಠ, ಚಿಲಕವಾಡಿ ಮಠ, ಕುಂದೂರು ಮಠ, ಶಂಭುಲಿಂಗೇಶ್ವರಸ್ವಾಮಿ ಬೆಟ್ಟ ಹಾಗೂ ಇನ್ನಿತರೆ ಕಡೆಗಳಲ್ಲಿ ಒಟ್ಟು 50 ಕ್ಕಿಂತಲೂ ಹೆಚ್ಚು ತಾಳೆಗರಿಗಳನ್ನು ಸಂಗ್ರಹ ಮಾಡಿದ್ದಾರೆ. ಇದರೊಂದಿಗೆ ಓಲೆಗರಿಗಳು, ವಿವಿಧ ತಾಮ್ರ ಶಾಸನಗಳು ಹಾಗೂ ಅಪರೂಪದ ಕೈಬರಹಗಳನ್ನು ಸಂಗ್ರಹಿಸಿದ್ದಾರೆ. ಈ ಕಾರ್ಯಕ್ಕೆ ಡಾ.ಜಯಣ್ಣ ಅವರು ಸ್ವತಃ ತಾವೇ ಖರ್ಚು ಭರಿಸುತ್ತಿದ್ದು, ಓರ್ವ ಇತಿಹಾಸ ಪ್ರಾಧ್ಯಾಪಕನಾಗಿ ಇದು ನನ್ನ ಕರ್ತವ್ಯ ಎಂದು ಹೇಳಿಕೊಳ್ಳುತ್ತಾರೆ. ಈ ಮೂಲಕ ಇನ್ನು ಹೆಚ್ಚಿನ ಐತಿಹಾಸಿಕ ದಾಖಲೆಗಳನ್ನು ಸಂಗ್ರಹಿಸಲು ಮುಂದಾಗುತ್ತಿದ್ದಾರೆ.

ಪ್ರಸ್ತುತ ಈಗ ಸಂಗ್ರಹಿಸಿರುವ ತಾಳೆಗರಿಗಳು ಹೆಚ್ಚು ಲಿಂಗಾಯತ ಸಂಸ್ಕೃತಿ ಮತ್ತು ಪರಂಪರೆಯನ್ನು ಸಾರುವ ಮಠಗಳೆ ಆಗಿದ್ದು, ಇದರಿಂದ ವಚನ ಸಾಹಿತ್ಯ ಅಧ್ಯಯನಕ್ಕೆ ಸಹಕಾರಿಯಾಗಬಹುದು ಎಂದು ಹೇಳಲಾಗುತ್ತಿದೆ. ಕೆಲವು ದಾಖಲೆಯ ಪ್ರಕಾರ ಸಂಗ್ರಹಿಸಿರುವ ತಾಳೆಗರಿಗಳು ವಚನ ಸಾಹಿತ್ಯ, ವಿವಿಧ ಗಿಡಿಮೂಲಿಕೆಗಳ ವೈದ್ಯಕೀಯ ಪದ್ಧತಿ, ರಾಜ-ಮಹಾರಾಜರ ದಾನದತ್ತಿಗಳನ್ನು ಒಳಗೊಂಡಿರಬಹುದು ಎಂದು ಹೇಳಲಾಗುತ್ತಿದೆ. ಇವುಗಳು ಪ್ರಾಚೀನ ಕನ್ನಡ ಮತ್ತು ಸಂಸ್ಕೃತ ಭಾಷೆಯಲ್ಲಿ ಇರುವುದು ವಿಶೇಷವಾಗಿದೆ. ಈ ದಾಖಲೆಗಳನ್ನು ಸಂಗ್ರಹಿಸಿದ ಬಳಿಕ ಪುರಾತತ್ವ ಇಲಾಖೆಗೆ ರವಾನೆ ಮಾಡಲಾಗುತ್ತದೆ. ಅಲ್ಲಿರುವ ತಜ್ಞರ ತಂಡದವರು ಸಮಗ್ರ ಅಧ್ಯಯನ ನಡೆಸುವ ಮೂಲಕ ಅಲ್ಲಿರುವ ಮಾಹಿತಯನ್ನು ಕಳೆಹಾಕುತ್ತಾರೆ. ಈ ಮೂಲಕ ನಮ್ಮ ಜಿಲ್ಲೆಯ ಪ್ರಾಚೀನ ಇತಿಹಾಸದ ಮತ್ತಷ್ಟು ಮಾಹಿತಿಗಳು ಲಭ್ಯವಾಗಲಿದೆ.