ಹಾವೇರಿ: ಪಿಡಿಒ ಹಣದಾಸೆಗೆ ಅಭಿವೃದ್ಧಿ ಕೆಲಸ ಕೈಗೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ದೇವಿಹೊಸೂರ ಗ್ರಾಪಂ ಅಧ್ಯಕ್ಷೆ ರೇಣುಕಾ ಕೆಂಚಲ್ಲನವರ ಆರೋಪಿಸಿದ್ದಾರೆ.
ಈ ಕುರಿತು ತಾಪಂ ಇಒ ಅವರಿಗೆ ದೂರು ನೀಡಿರುವ ಅವರು, ಗ್ರಾಮೀಣ ಅಭಿವೃದ್ಧಿಗೆ ಸರ್ಕಾರ ಕೋಟಿಗಟ್ಟಲೇ ಹಣ ಸುರಿಯುತ್ತಿದೆ. ಆದರೂ ಗ್ರಾಮೀಣ ಪ್ರದೇಶದಲ್ಲಿ ಅಭಿವೃದ್ಧಿ ಮಾತ್ರ ಮರೀಚಿಕೆಯಾಗುತ್ತಿದೆ. ಇದಕ್ಕೆ ಕಾರಣ ಅಭಿವೃದ್ಧಿಗೆ ಪೂರಕವಾಗಿ ಕೆಲಸ ಮಾಡಬೇಕಿದ್ದ ಅಧಿಕಾರಿಗಳು ಭ್ರಷ್ಟಾಚಾರದಲ್ಲಿ ತೊಡಗಿರುವುದು. ನಾನು ಅಧ್ಯಕ್ಷೆಯಾಗಿ ಆಯ್ಕೆಯಾಗಿ ನಾಲ್ಕು ತಿಂಗಳು ಕಳೆದ ನಂತರ ಡಿಜಿಟಲ್ ಸಹಿಗೆ ಅವಕಾಶ ಕಲ್ಪಿಸಿದ್ದಾರೆ. ಇಲ್ಲಿಯವರೆಗೂ ನನಗೆ ಯಾವುದೇ ಡಿಜಿಟಲ್ ಸಹಿಯ ಅಧಿಕಾರ ನೀಡದೇ ಅಧಿಕಾರ ದುರ್ಬಳಕೆ ಮಾಡಿಕೊಂಡಿದ್ದಾರೆ ಎಂದು ದೂರಿದ್ದಾರೆ.
ಗ್ರಾಮದ 8 ವಾರ್ಡ್ಗಳಲ್ಲಿ ಬೀದಿದೀಪದ ಸಮಸ್ಯೆಯಿತ್ತು. ಪ್ರತಿ ವಾರ್ಡ್ಗೆ 10ರಂತೆ 80 ಎಲ್ಇಡಿ ಬಲ್ಬ್ ಹಾಕಿಸಲು ಪಿಡಿಒಗೆ ಸೂಚಿಸಿದ್ದೆ. ಅದರಂತೆ 100 ಎಲ್ಇಡಿ ಬಲ್ಬ್ ತಂದು 80 ಅಳವಡಿಸಿ ಉಳಿದವುಗಳನ್ನು ಪಂಚಾಯಿತಿಯಲ್ಲಿ ಇಡದೇ ನಾಪತ್ತೆ ಮಾಡಿದ್ದಾರೆ. ಅಲ್ಲದೆ ಒಂದು ಬಲ್ಬ್ನ್ನು ದುಪ್ಪಟ್ಟು ದರಕ್ಕೆ ಖರೀದಿಸಿದ್ದಾರೆ. ಇವರು ತಂದಿರುವ ಬಲ್ಬ್ಗೆ ಮಾರುಕಟ್ಟೆಯಲ್ಲಿ 200ರಿಂದ 250ರೂ. ದರವಿದೆ. ಆದರೆ, ಇವರು 450ರೂ.ಗೆ ಒಂದರಂತೆ ಖರೀದಿಸಿದ್ದಾರೆ. ಅಲ್ಲದೆ ಪೈಪ್ಲೈನ್ಗಳು ಒಡೆದಾಗ ದುರಸ್ತಿಗೆಂದು ತರುವ ಪೈಪ್ಗಳ ಬಿಲ್ಗಳಲ್ಲಿಯೂ ಭಾರಿ ಪ್ರಮಾಣದ ವ್ಯತ್ಯಾಸವಿದೆ. ಈ ಕುರಿತು ಪ್ರಶ್ನಿಸಿದರೆ ಪಂಚಾಯಿತಿಯಿಂದ ಹಣ ಕೊಡುವುದು ವಿಳಂಬವಾಗುತ್ತದೆ. ಹೀಗಾಗಿ, ದುಬಾರಿ ದರಕ್ಕೆ ಖರೀದಿಸುವುದು ಅನಿವಾರ್ಯ. ನಿಮಗೆ ಪಂಚಾಯಿತಿಯ ಹಣ ಉಳಿಸುವ ಮನಸಿದ್ದರೇ ನೀವೇ ಹಣ ಕೊಟ್ಟು ಬಲ್ಬ್ ಖರೀದಿಸಿ ತನ್ನಿ. ಪಂಚಾಯಿತಿಯಿಂದ ಹಣ ಬಂದಾಗ ತೆಗೆದುಕೊಳ್ಳಿ ಎಂದು ಉಡಾಫೆ ಉತ್ತರ ನೀಡುತ್ತಾರೆ. ಇದನ್ನು ಮೇಲಧಿಕಾರಿಗಳು ಪರಿಶೀಲಿಸಿ ಮಾರುಕಟ್ಟೆ ದರಕ್ಕಿಂತ ಹೆಚ್ಚಿನ ದರಕ್ಕೆ ವಸ್ತುಗಳನ್ನು ಖರೀದಿಸಿದ್ದಕ್ಕೆ ಕ್ರಮ ಕೈಗೊಳ್ಳಬೇಕು ಎಂದು ರೇಣುಕಾ ಕೆಂಚಲ್ಲನವರ ಒತ್ತಾಯಿಸಿದ್ದಾರೆ.
