ಮಲದ ಗುಂಡಿಗೆ ಇಳಿಸಿದವರ ವಿರುದ್ಧ ಕೇಸ್​

* ದೂರು ದಾಖಲಿಸಲು ವಿಳಂಬ ಆರೋಪ

ರಾಮನಗರ

ಮಾಗಡಿ ತಾಲೂಕಿನ ಬೀಚನಹಳ್ಳಿಯ ಮನೆಯೊಂದರ ಮಲದ ಗುಂಡಿಗೆ ಪೌರ ಕಾರ್ಮಿಕರನ್ನು ಬಲವಂತವಾಗಿ ಇಳಿಸಿ ಸ್ವಚ್ಛಗೊಳಿಸಿರುವ ಟನೆ ಸಂಬಂಧ 5 ಮಂದಿ ವಿರುದ್ಧ ಕುದೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಆದರೆ, ದೂರು ದಾಖಲಿಸಲು ವಿಳಂಬ ಮಾಡಲಾಗಿದೆ ಎನ್ನುವ ಆರೋಪ ಕೇಳಿ ಬಂದಿದೆ.

ತಾಲೂಕಿನ ಹುಳ್ಳೆನಹಳ್ಳಿ ಗ್ರಾಮ ಪಂಚಾಯಿತಿಯ ಮೂವರು ಪೌರ ಕಾರ್ಮಿಕರನ್ನು ವಾರದ ಹಿಂದೆ ಮನೆಯೊಂದರ ಮಲದ ಗುಂಡಿಗೆ ಇಳಿಸಿದ್ದ ಪ್ರಕರಣ ನಡೆದಿದೆ. ಈ ಸಂಬಂಧ ಸಮಾಜ ಕಲ್ಯಾಣ ಇಲಾಖೆ ಸಹಾಯಕ ನಿರ್ದೇಶಕರು ದೂರು ನೀಡಿದರೂ, ಪ್ರಕರಣ ದಾಖಲಿಸಲು ಕುದೂರು ಠಾಣೆಯಲ್ಲಿ ವಿಳಂಬ ಮಾಡಲಾಗಿದೆ ಎಂದು ಮ್ಯಾನ್ಯುಯಲ್​ ಸ್ಕ್ಯಾವೆಂಜಿಂಗ್ ನೇಮಕಾತಿ ನಿಷೇಧ ಮತ್ತು ಅವರ ಪುನರ್ವಸತಿ ಅಧಿನಿಯಮ 2013 ಅನುಷ್ಠಾನಕ್ಕೆ (ಎಂ.ಎಸ್​ ಕಾಯ್ದೆ) ಸಂಬಂಧಿಸಿದ ಜಿಲ್ಲಾ ಜಾಗೃತಿ ಮತ್ತು ಉಸ್ತುವಾರಿ ಸಮಿತಿ ಸಭೆಯಲ್ಲಿ ಸದಸ್ಯರು ಆರೋಪಿಸಿ ಕ್ರಮಕ್ಕೆ ಪಟ್ಟು ಹಿಡಿದರು.

ಸಭೆಯ ಅಧ್ಯಕ್ಷತೆ ವಹಿಸಿದ್ದ ಅಪರ ಜಿಲ್ಲಾಧಿಕಾರಿ ಆರ್​. ಚಂದ್ರಯ್ಯ, ಕಾಯ್ದೆ ಪ್ರಕಾರ ಕೂಡಲೇ ಪ್ರಕರಣ ದಾಖಲಿಸುವಂತೆ ಸೂಚನೆ ನೀಡಿದ ಬಳಿಕ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಮನೆ ಮಾಲೀಕ ಶ್ರೀನಿವಾಸ್​, ಪತ್ನಿ ವಿಜಯಲಕ್ಷ್ಮೀ , ಪುತ್ರರಾದ ಪ್ರದಿಪ್​, ಕೃಷ್ಣಮೂರ್ತಿ ಹಾಗೂ ಗುಂಡಿಗಿಳಿಸಲು ಪ್ರೇರಣೆ ನೀಡಿದ್ದಕ್ಕಾಗಿ ಅಂಕಯ್ಯನಪಾಳ್ಯದ ವಿಜಯಕುಮಾರ್​ ವಿರುದ್ಧ ಪ್ರಕರಣ ದಾಖಲಾಗಿದೆ.

ಟ್ರಾಕ್ಟರ್​ನೊಂದಿಗೆ ಬಂದಿದ್ದರು:

ಶ್ರೀನಿವಾಸ್​ ಮನೆಯ ಶೌಚಗೃಹದ ಗುಂಡಿ ಭರ್ತಿಯಾಗಿತ್ತು. ಅದನ್ನು ಸ್ವಚ್ಛಗೊಳಿಸಲು ಸಕ್ಕಿಂಗ್​ ಯಂತ್ರ ಕರೆಯಿಸುವ ಬದಲು, ಕುದೂರು ಗ್ರಾಪಂ ಟ್ರ್ಯಾಕ್ಟರ್ ಚಾಲಕರಾದ ಪರಿಶಿಷ್ಟ ಜಾತಿಯ ಯೋಗೇಶ್​, ಪ್ರವಿಣ್​ ಹಾಗೂ ಪರಿಶಿಷ್ಟ ಪಂಗಡದ ನರಸಿಂಹಮೂರ್ತಿ ಅವರನ್ನು ಪಂಚಾಯಿತಿ ಟ್ರ್ಯಾಕ್ಟರ್ ​ ಸಮೇತ ಸ್ಥಳಕ್ಕೆ ಕರೆಯಿಸಿದ್ದರು. ಮೂವರೂ ಮಲದ ಗುಂಡಿಗೆ ಇಳಿದು ಗುದ್ದಲಿ ಹಾಗೂ ಪ್ಲಾಸ್ಟಿಕ್​ ಬುಟ್ಟಿ ಮೂಲಕ ಮಲವನ್ನು ತೆರವು ಮಾಡಿ ಸ್ವಚ್ಛಗೊಳಿಸಿದ್ದಾರೆ. ಈ ಕುರಿತ ಫೋಟೋ ಹಾಗೂ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದವು.

ವಿಷಯ ಗೊತ್ತಾಗುತ್ತಿದ್ದಂತೆ ಜು.28ರಂದು ಸ್ಥಳಕ್ಕೆ ತೆರಳಿ ಮಹಜರು ಮಾಡಲಾಯಿತು. ನಂತರ ಠಾಣೆಗೆ ತೆರಳಿ ಐವರ ವಿರುದ್ಧ ಎಂ.ಎಸ್​ ಕಾಯ್ದೆ ಹಾಗೂ ಎಸ್​ಸಿ, ಎಸ್​ಟಿ ದೌರ್ಜನ್ಯ ತಡೆ ಕಾಯ್ದೆಯಡಿ ಪ್ರಕರಣ ದಾಖಲಿಸಬೇಕು ಎಂದು ಸಮಾಜ ಕಲ್ಯಾಣ ಇಲಾಖೆ ಸಹಾಯಕ ನಿರ್ದೇಶಕಿ ಉಮಾ ದೂರು ನೀಡಿದ್ದರು. ಆದರೆ, ಪ್ರಕರಣ ದಾಖಲಿಸಿಕೊಳ್ಳದ ಠಾಣೆ ಇನ್​ಸ್ಪೆಕ್ಟರ್​, ಉಪ ವಿಭಾಗಾಧಿಕಾರಿ ಗಮನಕ್ಕೆ ತನ್ನಿ ಎಂದು ಹೇಳಿ ಕಳಿಸಿದ್ದರು ಎನ್ನಲಾಗಿದೆ.