ಜನಸ್ನೇಹಿಯಾದೀತೇ ಕಾರ್​ ಪಾರ್ಕಿಂಗ್​ ಕಟ್ಟಡ?

ಪವನ್​ ಆಚಾರ್ಯ ನೀರ್ಚಾಲು ಬೆಂಗಳೂರು

ಗಾಂಧಿ ಬಜಾರ್​ನಲ್ಲಿ ಸ್ಮಾರ್ಟ್​ಸಿಟಿ ಯೋಜನೆಯಡಿ ಬಹುಮಹಡಿ ಕಾರ್​ ಪಾರ್ಕಿಂಗ್​ ಕಟ್ಟಡ ಕಾಮಗಾರಿಗಳು ಪೂರ್ಣಗೊಂಡು ತಿಂಗಳುಗಳೇ ಕಳೆದರೂ ಇನ್ನೂ ಉದ್ಘಾಟನೆ ಭಾಗ್ಯ ಲಭಿಸಿಲ್ಲ. 22 ಕೋಟಿ ರೂ. ಯೋಜನೆ ಇದಾಗಿದ್ದು, ಒಂದು ವೇಳೆ ಸಾರ್ವಜನಿಕ ಸೇವೆಗೆ ಲಭ್ಯವಾದರೂ ವಾಣಿಜ್ಯ ವಹಿವಾಟು ಅಧಿಕ ಪ್ರಮಾಣದಲ್ಲಿರುವ ಈ ರಸ್ತೆಯಲ್ಲಿನ ಪಾರ್ಕಿಂಗ್​ ಕಟ್ಟಡ ಜನೋಪಯೋಗಕ್ಕೆ ಬರುವುದು ಸಂದೇಹ ಎನ್ನುತ್ತಾರೆ ಸ್ಥಳಿಯ ವ್ಯಾಪಾರಿಗಳು.

ಕಟ್ಟಡದ ತಳಮಹಡಿ ಹಾಗೂ ನೆಲಮಹಡಿಯಲ್ಲಿ ವ್ಯಾಪಾರಕ್ಕಾಗಿ 50 ಮಳಿಗೆ ನಿರ್ಮಿಸಲಾಗಿದೆ. 1ರಿಂದ 4ನೇ ಮಹಡಿಯವರೆಗೆ ಕಾರ್​ಗಳ ನಿಲುಗಡೆಗೆ ವ್ಯವಸ್ಥೆ (ಪ್ರತಿ ಮಹಡಿಯಲ್ಲಿ ತಲಾ 31 ವಾಹನ) ಇದ್ದು, 124 ವಾಹನಗಳನ್ನು ನಿಲ್ಲಿಸಬಹುದು. 1 ಲ್ಟ್​ಿ, 6 ಶೌಚಗೃಹಗಳಿವೆ. ಸುಮಾರು 2 ವರ್ಷಗಳಿಂದ ಪ್ರಗತಿಯಲ್ಲಿರುವ ಕಾಮಗಾರಿ ಬಹುತೇಕ ಕೆಲಸಗಳು ಮುಗಿದಿದೆ.

ಇಲ್ಲಿ ಪಾರ್ಕಿಂಗ್​ ಮಾಡೋರ್ಯಾರು?: ಗಾಂಧಿ ಬಜಾರ್​ನಲ್ಲಿ ಕಿರಿದಾದ ದ್ವಿಮುಖ ರಸ್ತೆ ಇರುವುದರಿಂದ ಇಲ್ಲಿ ಸಂಚಾರ ಸಿಕ್ಕು ಮಾಮೂಲಿ. ರಸ್ತೆಯ ಇಕ್ಕೆಲಗಳಲ್ಲಿ ಇರುವ ಪಾದಚಾರಿ ಮಾರ್ಗಗಳಲ್ಲಿ ಬೀದಿಬದಿ ವ್ಯಾಪಾರಿಗಳು ಹೂ& ಹಣ್ಣು, ತರಕಾರಿ ಹಾಗೂ ಚಿಲ್ಲರೆ ವ್ಯಾಪಾರ ಮಾಡುತ್ತಿರುವುದರಿಂದ ಗ್ರಾಹಕರು ರಸ್ತೆಬದಿಯಲ್ಲೇ ವಾಹನ ನಿಲ್ಲಿಸಿ ವ್ಯವಹರಿಸುತ್ತಾರೆ. ಅಡ್ಡಾದಿಡ್ಡಿಯಾಗಿ ಜನರು ಓಡಾಡುವುದರಿಂದ ರಸ್ತೆಯಲ್ಲಿ ವಾಹನಗಳ ಸಂಚಾರ ನಿಧಾನಗತಿಯಲ್ಲಿರುತ್ತದೆ. ಇಂತಹ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ಪಾಲಿಕೆಯಿಂದ ವ್ಯಾಪಾರಸ್ಥರಿಗೂ, ಗ್ರಾಹಕರಿಗೂ ಅನುಕೂಲವಾಗುವಂತೆ, ಮಳಿಗೆಗಳು ಹಾಗೂ ಕಾರ್​ ಪಾರ್ಕಿಂಗ್​ ಸ್ಥಳದ ಯೋಜನೆ ರೂಪಿಸಲಾಗಿದೆ. ಇಲ್ಲಿ 100 ರೂ. ವಸ್ತು ಕೊಳ್ಳಲು ಬರುವವರು 50 ರೂ. ಪಾರ್ಕಿಂಗ್​ಗೆ ಹಣ ಹೇಗೆ ಕೊಟ್ಟಾರು? ಮಧ್ಯಮ ವರ್ಗದವರೇ ಜಾಸ್ತಿ ಭೇಟಿ ನೀಡುವ ಈ ರಸ್ತೆಯಲ್ಲಿ ಮಲ್ಟಿ ಲೆವೆಲ್​ ಕಾರ್​ ಪಾರ್ಕಿಂಗ್​ ಎಷ್ಟರಮಟ್ಟಿಗೆ ಯಶಸ್ವಿಯಾಗುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.

ಈ ಕಟ್ಟಡ ನಿರ್ಮಿಸಿದ ಜಾಗದಲ್ಲಿ ಮೊದಲು ಹೂವಿನ ಮಾರುಕಟ್ಟೆ ಇತ್ತು. ಈಗ ಹೂವಿನ ವ್ಯಾಪಾರಿಗಳೆಲ್ಲ ಬೀದಿಬದಿ ನೆಲೆಗೊಂಡಿದ್ದಾರೆ.ಹೀಗಿರುವಾಗ ಆ ವ್ಯಾಪಾರಿಗಳನ್ನು ಮತ್ತೆ ನಾಲ್ಕು ಗೋಡೆಗಳ ಮಧ್ಯೆ ತರುವುದು ಪಾಲಿಕೆಗೆ ದೊಡ್ಡ ಸವಾಲಾಗಿದೆ. ಒಟ್ಟಿನಲ್ಲಿ ಈ ಯೋಜನೆಯ ಬಗ್ಗೆ ಗ್ರಾಹಕರಲ್ಲಿ ಹಾಗೆಯೇ ವ್ಯಾಪಾರಿಗಳಲ್ಲಿ ನಕಾರಾತ್ಮಕ ಅಭಿಪ್ರಾಯ ಇದೆ. ಈ ಪ್ರದೇಶದ ಹತ್ತಿರ ವಾಸಿಸುವ, ಕಾರ್​ ಪಾರ್ಕಿಂಗ್​ಗೆ ಸ್ಥಳ ಇಲ್ಲದವರಿಗೆ ಬಹುಶ@ ಈ ಜಾಗ ಉಪಯೋಗಕ್ಕೆ ಬರಬಹುದು. ಒಂದೆರಡು ದಿನದ ಮಟ್ಟಿಗೆ ವಾಹನಗಳನ್ನು ಸುರತವಾಗಿ ಇರಿಸುವವರಿಗೆ ಅನುಕೂಲವಾಗಬಹುದು. ಆದರೆ ಇದರಿಂದ ಈ ಭಾಗದ ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ಸಿಗುವುದು ಕಷ್ಟಸಾಧ್ಯ ಎಂಬುವುದು ಜನಾಭಿಪ್ರಾಯ.