ಅಂತಾರಾಜ್ಯ ದರೋಡೆಕೋರರರ ಸೆರೆ

ಕೃತ್ಯಕ್ಕಿಳಿವ ಮುನ್ನ ದೇವರಿಗೆ ಪೂಜೆ ಸಲ್ಲಿಸುತ್ತಿದ್ದ ಖದೀಮರು!

ಮಾಗಡಿ

ಪಟ್ಟಣದಲ್ಲಿ ಕಳ್ಳತನ ಮಾಡಿ ಸಾಕಷ್ಟು ಆತಂಕ ಮೂಡಿಸಿದ್ದ ಇಬ್ಬರು ಅಂತಾರಾಜ್ಯ ದರೋಡೆಕೋರರನ್ನು ಮಾಗಡಿ ಪೊಲೀಸರು ಬಂಧಿಸಿದ್ದಾರೆ.

ಕಡೂರಿನ ಮಹಮದ್​ ಸಾದಿಕ್​, ಶಿವಮೊಗ್ಗ ಅಮೀರ್​ ಅಮುಜಾ ಬಂಧಿತರು.

ಮಹಮದ್​ ಸಾಧಿಕ್​ ಹಾಗೂ ಸಹಚರರು ರಾಜ್ಯದ ಹಲವೆಡೆ 60ಕ್ಕೂ ಹೆಚ್ಚು ಪ್ರಕರಣಗಳಲ್ಲಿ ಭಾಗಿಯಾಗಿದ್ದಾನೆಂದು ಪೊಲೀಸ್​ ಮೂಲಗಳು ತಿಳಿಸಿವೆ.

ಪ್ರಕರಣದ ಹಿನ್ನೆಲೆ: ಪಟ್ಟಣದ ಆರ್ಯವೈಶ್ಯ ಸಮಾಜದ ಮುಖಂಡ ವೇಣುಗೋಪಾಲ್​ ಅವರ ಮನೆಯಲ್ಲಿ ಸುಮಾರು ಐದು ಕೆಜಿ ಚಿನ್ನಾಭರಣ ಮತ್ತು 6 ಲ ರೂ. ಕಳವು ಮಾಡಲಾಗಿತ್ತು. ಈ ಪ್ರಕರಣ ಪಟ್ಟಣದ ಜನತೆಯಲ್ಲಿ ಆತಂಕ ಮೂಡಿಸಿತ್ತು.

ಪ್ರಕರಣದ ಬೆನ್ನತ್ತಿದ ಡಿವೈಎಸ್ಪಿ ಪ್ರವಿಣ್​, ಮಾಗಡಿ ಸಿಪಿಐ ಜಿ.ವೈ.ಗಿರಿರಾಜ್​, ಕುದೂರು ಸಿಪಿಐ ನವೀನ್​ ನೇತೃತ್ವದಲ್ಲಿ ಸಿಬ್ಬಂದಿ ಬೀರಪ್ಪ, ಸೂರ್ಯಕುಮಾರ್​, ಮುನೀಂದ್ರ, ಹೇಮಂತ್​ ಕುಮಾರ್​ ಅವರ ಎರಡು ತಂಡ ರಚಿಸಿ ಕಾರ್ಯಾಚರಣೆ ಕೈಗೊಂಡಿದ್ದರು.

ಸಿಕ್ಕಿದ್ದು ಹೇಗೆ ?: ಕಳವು ಸಂದರ್ಭದಲ್ಲಿ ದರೋಡೆಕೋರರು ಫೋನ್​ ಬಳಸಿರಲಿಲ್ಲ. ಆದರೆ ಕಳವು ಮಾಡಿದ ನಂತರ ಪಟ್ಟಣದ ಕೆಲವು ಬೀದಿಗಳಲ್ಲಿ ಓಡಾಡಿದ್ದಾರೆ. ಅವರ ಮುಖ ಚಹರೆ ಮೇಲೆ ಸಿಪಿಐ ಗಿರಿರಾಜ್​ ಹಲವು ಪೊಲೀಸ್​ ಠಾಣೆಗೆ ಮಾಹಿತಿ ನೀಡಿದ್ದರು. ರಾಜ್ಯದ ಹಲವೆಡೆಗಳಲ್ಲಿ ದರೋಡೆಕೋರರಾದ ಕಡೂರಿನ ಮಹಮದ್​ ಸಾದಿಕ್​, ತೀರ್ಥಹಳ್ಳಿಯ ಅಮೀರ್​ ಅಮುಜಾ ಮತ್ತು ಸಹಚರರೇ ಮಾಗಡಿಯ ವೇಣು ಮನೆಯಲ್ಲಿ ಕಳವು ಮಾಡಿರುವುದು ದೃಢವಾಗಿತ್ತು.

ಈ ಹಿನ್ನೆಲೆಯಲ್ಲಿ ತನಿಖೆ ಚುರುಕುಗೊಳಿಸಲಾಗಿತ್ತು. ಮಾಗಡಿ ಪೊಲೀಸರು ಬೆನ್ನುಹತ್ತಿದ್ದಾರೆಂಬ ಮಾಹಿತಿ ಪಡೆದ ಸಾಧಿಕ್​ ಮತ್ತು ಅಮೀರ್​, ಸಹಚರರೊಂದಿಗೆ ನಕಲಿ ಪಾಸ್​ ಪೋರ್ಟ್​ ಬಳಸಿ ಬಾಂಗ್ಲಾದೇಶಕ್ಕೆ ನುಸುಳುವ ಪ್ಲಾನ್​ ಮಾಡಿದ್ದರು. ಪ್ರಕರಣದ ಬೆನ್ನತ್ತಿದ್ದ ಸಿಪಿಐ ಗಿರಿರಾಜ್​ ಸಿಬ್ಬಂದಿಯೊಂದಿಗೆ ಮುಂಬೈ ವಿಮಾನ ನಿಲ್ದಾಣದ ಬಳಿ ಬಂಧಿಸಿದ್ದಾರೆ.

ದೇವರ ಮೊರೆ: ಕಳವು ಮಾಡುವ ಮೋದಲು ತೋಟವೊಂದರಲ್ಲಿ ಪ್ರತಿಷ್ಠಾಪಿಸಿದ್ದ ಭೂತಮ್ಮ ದೇವಿ, ಬಾಬಯ್ಯ, ಚೌಡೇಶ್ವರಿ ದೇವಿಗೆ ಪೂಜೆ ಸಲ್ಲಿಸುತ್ತಿದ್ದ ಖದೀಮರು, ಯಾವುದೇ ಕಳ್ಳತನಕ್ಕೆ ಯೋಜನೆ ​ ಮಾಡುವ ಮೊದಲು ಈ ಮೂರು ದೈವಗಳಿಗೆ ಪೂಜೆ ಮಾಡಿ ಅಪ್ಪಣೆ ಪಡೆದುಕೊಳ್ಳುತ್ತಿದ್ದರಂತೆ. ದೇವರ ಅಪ್ಪಣೆ ಪಡೆದುಕೊಂಡೆವೆಂಬ ನಂಬಿಕೆಯಿಂದ ಅಷ್ಟ ದಿಕ್ಕುಗಳಿಗೆ ತೆರಳಿ ಬೀಗ ಹಾಕಿರುವ ಮನೆಗಳು, ಮನೆ ಮುಂದೆ ಐಷಾರಾಮಿ ಕಾರುಗಳಿರುವ ಮನೆಗಳಿಗೆ ಕನ್ನ ಹಾಕಿ ದರೋಡೆ ಮಾಡುವುದೇ ಇವರ ವೃತ್ತಿಯಾಗಿದೆ.

ಮಹಜರು: ಸಾಧಿಕ್​ ಮತ್ತು ಅಮೀರ್​ ಪಟ್ಟಣದ ಹಲವೆಡೆಗಳಲ್ಲಿ ದರೋಡೆಗೆ ಸ್ಕೆಚ್​ ಹಾಕಿದ್ದನ್ನು ಬಾಯಿಬಿಟ್ಟಿದ್ದ್ದರಿಂದ ಪಟ್ಟಣದ ಕೆಲವೆಡೆಗಳಲ್ಲಿ ಪೊಲೀಸರು ಮಹಜರು ನಡೆಸಿದರು.