ವಿಶ್ರಾಂತಿಗೆ ಮೊರೆಹೋದ ಅಮ್ಮಾಜಮ್ಮ: ಕರೊನಾ ನಂತರ ಗುಣಮುಖರಾಗಿ ಚುನಾವಣಾ ಅಖಾಡಕ್ಕೆ ಧುಮುಕಿದ್ದ ಜೆಡಿಎಸ್ ಅಭ್ಯರ್ಥಿ ಅಮ್ಮಾಜಮ್ಮಗೆ ರಾಜಕೀಯ ಗದ್ದಲ, ಚುನಾವಣಾ ಪ್ರಚಾರ ಎಲ್ಲವೂ ಹೊಸದು. ಪತಿ ಶಾಸಕರಾಗಿ, ಮಂತ್ರಿಯಾಗಿ ಸೇವೆ ಸಲ್ಲಿಸಿದ್ದರೂ ಒಮ್ಮೆಯೂ ವಿಧಾನಸೌಧ ಮೆಟ್ಟಿಲು ತುಳಿಯದ ಅಮ್ಮಾಜಮ್ಮ ಈ ಬಾರಿ ಹಳ್ಳಿ, ಹಳ್ಳಿಯಲ್ಲಿ ಸುತ್ತಿ ಮತಯಾಚಿಸಿದರು. ಧೂಳು, ಬಿಸಿಲಿನಿಂದ ಬಸವಳಿದಿದ್ದ ಅಮ್ಮಾಜಮ್ಮ ಇಂದು ತುಮಕೂರಿನ ನಿವಾಸದಲ್ಲಿ ವಿಶ್ರಾಂತಿಗೆ ಮೊರೆ ಹೋಗಿದ್ದರು. ಮನೆಗೆ ಬಂದಿದ್ದ ಪತಿಯ ಸ್ನೇಹಿತರೊಂದಿಬ್ಬರ ಜತೆ ಕುಶಲೋಪರಿ ಮಾತುಕತೆ ನಂತರ ಪೂಜೆ-ಪುನಸ್ಕಾರ, ಮನೆಯ ದೈನಂದಿನ ಕೆಲಸದಲ್ಲಿ ತೊಡಗಿಸಿಕೊಂಡು ವಿಶ್ರಾಂತಿ ಮಾಡಿದರು. ನಂತರ ಮೊಮ್ಮಕ್ಕಳೊಂದಿಗೆ ಕೇರಂ ಆಡಿ ದಣಿವು, ಒತ್ತಡದಿಂದ ಮುಕ್ತರಾದರು.
