ರಕ್ತನಿಧಿ ಘಟಕ ನೋಂದಣಿ ಕಡ್ಡಾಯ

ಹಾವೇರಿ: ಜಿಲ್ಲೆಯಲ್ಲಿ ಖಾಸಗಿ ಆಸ್ಪತ್ರೆಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ರಕ್ತನಿಧಿ ಘಟಕಗಳು ಅಥವಾ ಪ್ರತ್ಯೇಕವಾಗಿ ಕಾರ್ಯ ನಿರ್ವಹಿಸುತ್ತಿರುವ ಖಾಸಗಿ ರಕ್ತನಿಧಿ ಘಟಕಗಳನ್ನು ಕೆಪಿಎಂಇ ಕಾಯ್ದೆಯಡಿ ಆನ್​ಲೈನ್ ಪೋರ್ಟ್​ಲ್ನಲ್ಲಿ ನೋಂದಣಿ ಮಾಡಿಸುವುದು ಕಡ್ಡಾಯವಾಗಿದೆ.

ನೋಂದಣಿ ಮಾಡದ ಸಂಸ್ಥೆಯವರ ವಿರುದ್ಧ ಕೆಪಿಎಂಇ ನಿಯಮಗಳ ಅನ್ವಯ ಸೂಕ್ತ ಕ್ರಮ ಜರುಗಿಸಲಾಗುವುದು. ಖಾಸಗಿ ವೈದ್ಯಕೀಯ ಸಂಸ್ಥೆಗಳನ್ನು ಪ್ರಾರಂಭಿಸುವ ಮುನ್ನ ಕರ್ನಾಟಕ ವೈದ್ಯಕೀಯ ಅಧಿನಿಯಮ 2007, 2009 ಹಾಗೂ ತಿದ್ದುಪಡಿ ನಿಯಮ-2018ರ ಪ್ರಕಾರ ಕೆಪಿಎಂಇ ಕಾಯ್ದೆಯಡಿ ನೋಂದಣಿ ಮಾಡುವುದು ಕಡ್ಡಾಯವಾಗಿದೆ.

ಕೆಪಿಎಂಇ ತಿದ್ದುಪಡಿ ನಿಯಮ 2018ರ ನಿಯಮ-4ರಲ್ಲಿನ 18- ಕೆಟಗರಿಗಳ ಪೈಕಿ ಬ್ಲಡ್ ಬ್ಯಾಂಕ್ ಸಹ ಒಂದು ಕೆಟಗರಿಯಾಗಿದೆ.

ಕೆಪಿಎಂಇ ತಿದ್ದುಪಡಿ ನಿಯಮ-6 ಮತ್ತು ನಿಯಮ-7ರನ್ವಯ ಬ್ಲಡ್ ಬ್ಯಾಂಕ್​ಗಳನ್ನು ಈ ಕೆಟಗರಿ ಅಡಿಯಲ್ಲಿ ಕೆಪಿಎಂಇ ಆನ್​ಲೈನ್ ಪೋರ್ಟಲ್​ನಲ್ಲಿ ನೋಂದಣಿ ಮಾಡುವುದು ಕಡ್ಡಾಯವಾಗಿದೆ ಎಂದು ಡಿಎಚ್​ಒ ಡಾ.ಎಚ್.ಎಸ್. ರಾಘವೇಂದ್ರಸ್ವಾಮಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.