ಪತಿಯ ಉಳಿಸಲು ಪರದಾಟ: ಕೋರಮಂಗಲದ 40 ವರ್ಷದ ಮಹಿಳೆಗೆ 16 ವರ್ಷಗಳ ಹಿಂದೆ ಆಟೋ ಚಾಲಕನೊಂದಿಗೆ ವಿವಾಹವಾಗಿತ್ತು. ದಂಪತಿಗೆ ಜನಿಸಿದ ಮಗು ನ್ಯುಮೋನಿಯಾಗೆ ತುತ್ತಾಗಿ ಮೃತಪಟ್ಟಿತ್ತು. ವರ್ಷದ ಹಿಂದೆ ಪತಿ ಅನಾರೋಗ್ಯಕ್ಕೀಡಾಗಿದ್ದಾಗ ಚಿಕಿತ್ಸೆಗೆ 1 ಲಕ್ಷ ರೂ. ಬೇಕಿದ್ದರಿಂದ ಮನೆ ಸಮೀಪದಲ್ಲಿದ್ದ 50 ವರ್ಷದ ಉದ್ಯಮಿ ಬಳಿ ಸಾಲ ಕೇಳಿದ್ದಳು. ತನ್ನ ಜತೆ ಸಹಕರಿಸಿದರೆ ಹಣ ಕೊಡುವುದಾಗಿ ಆತ ಆಕೆಯನ್ನು ದುರ್ಬಳಕೆ ಮಾಡಿಕೊಂಡಿದ್ದ. ಪತಿ ಗುಣಮುಖನಾದ ಬಳಿಕ ಸಾಲ ಹಿಂದಿರುಗಿಸಿದ್ದ ಮಹಿಳೆ, ಸಲುಗೆ ಮುಂದುವರಿಸಲು ನಿರಾಕರಿಸಿದ್ದಳು. ಆದರೆ, ಉದ್ಯಮಿ ಆಕೆಯೊಂದಿಗಿನ ಖಾಸಗಿ ದೃಶ್ಯವನ್ನು ತೋರಿಸಿ, ತಾನು ಹೇಳಿದಂತೆ ಕೇಳದಿದ್ದರೆ ಜಾಲತಾಣದಲ್ಲಿ ಅಪ್ಲೋಡ್ ಮಾಡುವುದಾಗಿ ಹೆದರಿಸಿದ್ದ. ಇತ್ತೀಚೆಗೆ ಮಹಿಳೆ ನ್ಯಾಯಕ್ಕಾಗಿ ‘ಪರಿಹಾರ’ ಕೇಂದ್ರದ ಮೊರೆ ಹೋಗಿದ್ದಳು. ಉದ್ಯಮಿಯನ್ನು ಕಚೇರಿಗೆ ಕರೆಸಿದ ಆಪ್ತ ಸಮಾಲೋಚಕರು ವಿಚಾರಣೆ ನಡೆಸಿ, ಆತನನ್ನು ಪೊಲೀಸರಿಗೆ ಒಪ್ಪಿಸಿದ್ದಾರೆ.
