ರಾಮನಗರ : ಬಿಜೆಪಿ ನಾಯಕರು ಎಂದೂ ಸ್ವಂತ ಬಲದಿಂದ ಅಧಿಕಾರಕ್ಕೆ ಬಂದಿಲ್ಲ. ಅಧಿಕಾರ ಹಿಡಿಯಲು ವಾಮಮಾರ್ಗ ಹಿಡಿಯುತ್ತಾರೆ. ಅವರ ಪ್ರಯತ್ನಕ್ಕೆ ನಾವು ಈ ಬಾರಿ ಅವಕಾಶ ನೀಡುವುದಿಲ್ಲ ಎಂದು ಶಾಸಕ ಎಚ್.ಸಿ. ಬಾಲಕೃಷ್ಣ ತಿಳಿಸಿದರು.
ರಾಮನಗರ ತಾಲೂಕಿನ ಕೂಟಗಲ್ ಗ್ರಾಪಂ ಆವರಣದಲ್ಲಿ ಸೋಮವಾರ ನವೀಕರಣ ಗ್ರಾಮ ಪಂಚಾಯಿತಿ ಕಟ್ಟಡ ಉದ್ಘಾಟಿಸಿ ಮಾತನಾಡಿ, ಬಿಜೆಪಿ ಜನರಿಂದ ಆಯ್ಕೆಯಾಗಿ ಒಂದು ಬಾರಿಯೂ ಅಧಿಕಾರ ಮಾಡಿಲ್ಲ. ಅವರ ಆಮಿಷಕ್ಕೆ ಯಾರೂ ಸೊಪ್ಪು ಹಾಕುವುದಿಲ್ಲ ಎಂದರು.
ಕಾಂಗ್ರೆಸ್ ಸರ್ಕಾರವನ್ನು ಬೀಳಿಸಲು ಬಿಜೆಪಿ 1200 ಕೋಟಿ ರೂ. ಸಂಗ್ರಹ ಮಾಡಿದೆ ಎಂದು ಆ ಪಕ್ಷದ ನಾಯಕ ಯತ್ನಾಳ್ ಅವರೇ ಹೇಳುತ್ತಿದ್ದಾರೆ. ಇಂತಹ ಪ್ರಯತ್ನ ಖಂಡಿತಾ ನಡೆಯುತ್ತಿದೆ. ಈ ಹಿಂದೆ ನಮ್ಮ ಶಾಸಕರೊಬ್ಬರು ಇದರ ಬಗ್ಗೆ ಹೇಳಿದ್ದರು. ಇದು ಸುಳ್ಳೆಂದು ಬಿಜೆಪಿಯವರು ಹೇಳಿದ್ದರು. ಈಗ ಅವರ ಪಕ್ಷದ ನಾಯಕರೇ ಇದನ್ನು ಹೇಳುತ್ತಿದ್ದಾರೆ ಎಂದರು.
ಕಾಂಗ್ರೆಸ್ ಸರ್ಕಾರ ಉರುಳಿಸಲು ಬಿಜೆಪಿಯವರು ಸಿಎಂ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ನಾವೆಲ್ಲ ಶಾಸಕರು ಒಗ್ಗಟ್ಟಾಗಿದ್ದು, ಸರ್ಕಾರ ಉರುಳಿಸಲು ಬಿಡುವುದಿಲ್ಲ. ಈಗ ಸಿದ್ದರಾಮಯ್ಯ ಅವರ ಮೇಲೆ ಪ್ರಕರಣ ದಾಖಲಿಸಿರೋದು ಅದೇ ಉದ್ದೇಶಕ್ಕೆ ಎಂದರು.
ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ವಿರುದ್ಧ ಎಡಿಜಿಪಿ ಚಂದ್ರಶೇಖರ್ ಪದಬಳಕೆ ವಿಚಾರವಾಗಿ ಪ್ರತಿಕ್ರಿಯಿಸಿದ ಬಾಲಕೃಷ್ಣ, ಏನಂತ ಪದಬಳಕೆ ಮಾಡಿದ್ದಾರೆ, ಯಾವ ಹಂದಿಗೆ ಹೋಲಿಕೆ ಮಾಡಿದ್ದಾರೆ. ಹಂದಿ ಎಂದರೆ ವರಹ ಅಂತ. ಅದನ್ನು ಬೇರೆ ರೀತಿ ಏಕೆ ಅರ್ಥೈಸಿಕೊಳ್ಳುತ್ತೀರಿ. ಅವರ ಅಭಿಮಾನಿಗಳು ಬೇರೆ ರೀತಿ ಅರ್ಥಮಾಡಿಕೊಳ್ಳಬಾರದು. ಅವರ ಆಲೋಚನೆ ಹೇಗಿರುತ್ತೋ ಹಾಗೆ ತಿಳಿದುಕೊಳ್ಳುತ್ತಾರೆ ಎಂದರು.
ಒಬ್ಬ ಐಪಿಎಸ್ ಅಧಿಕಾರಿಯನ್ನು ಇವರು ಯಾವ ರೀತಿ ಸಂಬೋಧಿಸುತ್ತಿದ್ದಾರೆ ಎಂದು ನೋಡಿ. ಅಧಿಕಾರಿಗಳ ಜತೆ ಗುದ್ದಾಡುವುದನ್ನು ಬಿಡಲು ಹೇಳಿ. ಕೆಲಸಕ್ಕೆ ಬಾರದವರ ಜತೆ ಗುದ್ದಾಡಲು ಹೋದರೆ ಹೀಗೆಯೇ ಆಗುವುದು ಎಂದು ಎಡಿಜಿಪಿ ಹೇಳಿಕೆಯನ್ನು ಶಾಸಕ ಸಮರ್ಥಿಸಿಕೊಂಡರು.
ಗ್ರಾಪಂ ಅಧ್ಯಕ್ಷೆ ಎ.ಎಲ್.ಸವಿತಾ ಶಿವಕುಮಾರ್, ಪಿಡಿಒ ಕೆ.ಎಸ್. ಸೋಮಶೇಖರ್, ಸದಸ್ಯರಾದ ಗಂಗಾಧರ್ಗೌಡ, ನಂದೀಶ್, ಭಾಗ್ಯನಟರಾಜು, ಜಗದೀಶ್, ಸುಶೀಲಮ್ಮ, ಮಂಚೇಗೌಡ, ಲಿಂಗಾಚಾರಿ ಗ್ರಾಪಂ ಮಾಜಿ ಅಧ್ಯಕ್ಷ ರಾಮಚಂದ್ರಯ್ಯ, ಮುಖಂಡರಾದ ರವಿ, ಮಹದೇವಯ್ಯ, ರಾಮಕೃಷ್ಣಯ್ಯ, ವೇದಮೂರ್ತಿ, ಹೊಸೂರು ಜಗದೀಶ್, ರಮೇಶ್, ಅಂಕೂಗೌಡ ಇದ್ದರು.
