Clothes waste : ಗಂಗೇಚ ಯಮುನೇಚೈವ ಗೋದಾವರಿ ಸರಸ್ವತಿ ನರ್ಮದೇ ಸಿಂಧು ಕಾವೇರೀ ಜಲೇಸ್ಮಿನ್ ಸನ್ನಿಧಿಮ್ ಕುರು|| ಈ ಶ್ಲೋಕ ದಿನ ನಿತ್ಯ ಸ್ನಾನ ಮಾಡುವ ಸಮಯದಲ್ಲಿ ಪಠಿಸುವುದು ಸಾಮಾನ್ಯ. ವಿಶ್ವದ ಅನೇಕ ನದಿಗಳ ದಡದಲ್ಲಿ ನಾಗರೀಕತೆ ಬೆಳೆದ ಬಗ್ಗೆ ಇತಿಹಾಸದ ಪುಟಗಳು ನಮಗೆ ತಿಳಿಸುತ್ತವೆ. ಅತಿ ಪ್ರಾಚೀನವೆನ್ನಿಸಿಕೊಂಡ ಸಿಂಧೂ ನದಿಯ ನಾಗರಿಕತೆ ನಮ್ಮ ಇತಿಹಾಸ. ನೀರಿನ ಪ್ರತಿ ಹನಿಯಲ್ಲೂ ನಾವೂ ಪವಿತ್ರ ನದಿಗಳಾದ ಗಂಗೆ, ಯಮುನೆ, ಗೋದಾವರಿ, ಸರಸ್ವತಿ, ನರ್ಮದೆ, ಸಿಂಧು ಮತ್ತು ಕಾವೇರಿ ಸನ್ನಿಧಿಯನ್ನು ಅಪೇಕ್ಷಿಸುತ್ತೇವೆ. ಹೀಗೆ ಪವಿತ್ರ ನದಿಯಗಳ ಸನ್ನಿಧಿಯನ್ನು ಪ್ರತಿದಿನವೂ ಅಪೇಕ್ಷಿಸುವ ನಾವು, ಈ ಪವಿತ್ರ ನದಿಗಳ ತೀರಕ್ಕೇ ಹೋದರೆ, ಇನ್ನೆಷ್ಟು ಭಕ್ತಿಯಿಂದ ನದಿಯನ್ನು ನಾವು ಅನುಭವಿಸಬಹುದು, ಪೂಜಿಸಬಹುದು! ಅದರಲ್ಲೂ ಇದೀಗ ಮಳೆಗಾಲ, ತುಂಬಿ ಹರಿಯುತ್ತಿರುವ ನದಿಗಳ ಪೂಜಿಸಿ ಬಾಗಿನ ಅರ್ಪಿಸುವ ಸಮಯ. ಭಕ್ತಿ ಭಾವದಿ೦ದ ನದಿಯ ತೀರಕ್ಕೆ ಹೋದರೆ ನಮಗೆ ಕಾಣುವುದೇನು? ಎಲ್ಲೆಲ್ಲೂ ರಾಶಿ ರಾಶಿಯಾಗಿ ಬಿದ್ದ ಬಟ್ಟೆಗಳು. ಹೇಗೋ ದಡದಲ್ಲಿರುವ ಬಟ್ಟೆಗಳನ್ನು ಸರಿಸಿ ನದಿಯೊಳಗೆ ಕಾಲಿಟ್ಟಿರೋ ಅಲ್ಲಿಯೂ ಸೀರೆ, ಅಧವಾ ಇನ್ನಾವುದೋ ಕೊಳೆತ ಬಟ್ಟೆ ನಮ್ಮ ಕಾಲಿಗೆ ಸಿಕ್ಕಿ ಹಾಕಿಕೊoಡು ಕಾಲು ಜಾರಿ ನೀವು ನೀರೊಳಗೆ ಬಿದ್ದರೂ ಅಚ್ಚರಿಯಿಲ್ಲ.
