ಧರ್ಮಸ್ಥಳದ ವಿದುಷಿ ಚೈತ್ರಾ ಸತ್ಯಕುಮಾರ್ ಶಾಸ್ತ್ರೀಯ ನೃತ್ಯ ನಾಟ್ಯಾಧಿಪತಿ ನಟರಾಜನ ಆರಾಧನೆಯೊಂದಿಗೆ ಆರಂಭವಾಯಿತು. ಗಣೇಶ ಸ್ತುತಿಯೊಂದಿಗಿನ ಸ್ವಾಗತ ನೃತ್ಯದ ಮೂಲಕ ಅನಘಾ, ಅನನ್ಯ ಹೆಬ್ಬಾರ್, ಚೈತ್ರಾ ಸತ್ಯ ಕುಮಾರ್ ತಂಡ ಗಮನ ಸೆಳೆದರು. ಪುರಂದರ ದಾಸ ವಿರಚಿತ ’ಚಂದ್ರಚೂಡ’ ಹಾಡಿಗೆ ಚಂದ್ರ ಚೂಡನಾಗಿ ರಾರಾಜಿಸುವ ಪಾರ್ವತಿಯ ರಮಣನು ವಿಷವನ್ನು ಕುಡಿದು ಲೋಕ ಕಲ್ಯಾಣ ಗೈದ ಸ್ವಾಮಿ ನಿನಗೆ ಶರಣು ಎಂದು ಅನನ್ಯ, ಶ್ರೀಯಸಿ, ಸ್ಪಂದನ ಮಾನ್ಯ, ರಿಷಿಕಾ ನರ್ತಿಸಿದರು. ಬ್ರಹ್ಮ ಮತ್ತು ವಿಷ್ಣುವಿನಿಂದ ಪೂಜಿಸಲ್ಪಡುವ, ನಂದಿಯನ್ನು ವಾಹನನಾಗಿಸಿದವನು, ತ್ರಿಶೂಲಧಾರಿ, ನಾಟ್ಯ ಮತ್ತು ಸಂಗೀತವನ್ನು ಪ್ರೀತಿಸುವ ಶಿವನನ್ನು ವರ್ಣಿಸುವ ನೃತ್ಯಕ್ಕೆ ಅನಘ, ಅನ್ವಿತಾ, ಜಾನ್ಹವಿ, ಕುಸುಮಿತ, ಜಿಯಾ, ಶ್ರಾವ್ಯ ಹೆಜ್ಜೆ ಹಾಕಿದರು. ಶಿವನ ವಾಮ ಭಾಗವನ್ನು ಪಾರ್ವತಿ ಅಲಂಕರಿಸಿ, ಒಂದೇ ದೇಹದಲ್ಲಿ ಶಿವಶಕ್ತಿಯರು ಒಂದಾಗಿ ಅರ್ಧನಾರೀಶ್ವರಾದ ಪರಿಯನ್ನು ನೃತ್ಯದ ಮೂಲಕ ವಿದುಷಿ ಚೈತ್ರಾ ಸತ್ಯ ಕುಮಾರ್ ವರ್ಣಿಸಿದರು.
