ಬಾಗಲಕೋಟೆ: ಅರ್ಹತೆ ಹಾಗೂ ಸಮಾಜಮುಖಿ ಆಗಿದ್ದರೆ ಬ್ರಾಹ್ಮಣರು ಸಿಎಂ ಆಗಲು ಅಡ್ಡಿಯಿಲ್ಲ. ಆದರೆ, ಯಾರೋ ವ್ಯಕ್ತಿಗಳು ಕುಳಿತು ಇಂತವರೆ ಸಿಎಂ ಆಗಬೇಕು, ಇಂತವರು ಆಗಬಾರದು ಎಂದರೆ ಅದು ಪ್ರಜಾಪ್ರಭುತ್ವ ಆಗಲ್ಲ, ಡಿಕ್ಟೇಟರಶಿಫ ಆಗುತ್ತೆ ಎಂದು ಮಂತ್ರಾಲಯ ರಾಘವೇಂದ್ರಮಠ ಪೂಜ್ಯ ಸುಬುದೇಂದ್ರಶೀರ್ಥ ಶ್ರೀಪಾದಂಗಳವರು ಹೇಳಿದ್ದಾರೆ.
ಬಾಗಲಕೋಟೆ ನಗರದಲ್ಲಿ ದಿಗ್ವಿಜಯ ಯಾತ್ರೆಗೆ ಆಗಮಿಸಿರುವ ಪೂಜ್ಯರು ಮಂಗಳವಾರ ಸುದ್ದಿಗಾರರ ಜೊತೆ ಮಾತನಾಡಿದರು.
ಬ್ರಾಹ್ಮಣ ಸಿಎಂ ಬಗ್ಗೆ ಮಾಜಿ ಸಿಎಂ ಕುಮಾರಸ್ವಾಮಿ ಅವರ ಹೇಳಿಕೆಗೆ ತೀಕ್ಷ್ಣ ಹಾಗೂ ಖಾರವಾಗಿಯೇ ಪ್ರತಿಕ್ರಿಯಿಸಿರುವ ಶ್ರೀಗಳು, ವ್ಯಕ್ತಿಗತವಾಗಿ ಯಾರು ಸಿಎಂ ಆಗಬೇಕು, ಆಗಬಾರದು ಎಂದು ನಿರ್ಣಯ ಮಾಡುವುದು ಮತದಾರರು ಹಾಗೂ ಪಕ್ಷಗಳ. ಮತದಾರರು ಪ್ರಲ್ಹಾದ ಜೋಶಿ ಆಗಬಾರದು ಎಂದರೆ ಅದರ ಬಗ್ಗೆ ವಿಚಾರ ಬೇರೆ ಎಂದರು.
ನಾವೆಲ್ಲ ಒಂದೇ ತಾಯಿಯ ಭಾರತಾಂಬೆ ಮಕ್ಕಳು. ಅದರಲ್ಲಿ ದೊಡ್ಡಮಗ, ಸಣ್ಣಮಗ, ಮಗಳು ಎನ್ನುವ ಬೇರೆ ಬೇರೆ ಪ್ರಾಂತಗಳು ಇರಬಹುದು. ಆದರೆ, ನಾವೆಲ್ಲ ಭಾರತೀಯರು ಎಂದಾಗ ಎಲ್ಲರು ಅಣ್ಣ ತಮ್ಮಂದಿರು. ಪರಸ್ಪರ ರಾಜ್ಯಗಳಲ್ಲಿ, ಜಾತಿಗಳಲ್ಲಿ, ವ್ಯಕ್ತಿಗಳಲ್ಲಿ ಭಿನ್ನಾಭಿಪ್ರಾಯಗಳು ಬಂದರೆ ಅದು ದೇಶದ ಅಭಿವೃದ್ದಿಗೆ, ಜನರ ಕಲ್ಯಾಣಕ್ಕೆ ಅಡ್ಡಿಯಾಗುತ್ತದೆ ಎಂದು ಶ್ರೀಗಳು ಕಿವಿಮಾತು ಹೇಳಿದರು.
