ಬಾಗಲಕೋಟೆ: ಜಿಲ್ಲೆಯಲ್ಲಿ ಬಿಜೆಪಿ ನಾಯಕರ ನಡುವಿನ ವೈಮನಸ್ಸು, ಭಿನ್ನಾಭಿಪ್ರಾಯ ಪಕ್ಷದ ಕಾರ್ಯಕರ್ತರಲ್ಲಿ ಮುಜುಗರಕ್ಕೆ ಕಾರಣವಾಗಿದೆ. ಈ ನಡುವೆ ಬಾಗಲಕೋಟೆ ಮತಕ್ಷೇತ್ರ ವ್ಯಾಪ್ತಿಯಲ್ಲಿ ಬಿಜೆಪಿ ನಾಯಕರ ಉಚ್ಚಾಟನೆ ವಿಷಯ ತಾರ್ಕಿಕವಾಗಿ ಅಂತ್ಯವಾಗುತ್ತಿಲ್ಲ. ಶನಿವಾರ ನಗರದಲ್ಲಿ ನಡೆದ ಸುದ್ದಿಗೋಷ್ಠಿಗಳು ಇದಕ್ಕೆ ಪುಷ್ಠಿ ನೀಡಿವೆ.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮಲ್ಲಿಕಾರ್ಜುನ ಚರಂತಿಮಠ, ಬಿಜೆಪಿ ಜಿಲ್ಲಾಧ್ಯಕ್ಷ ಶಾಂತಗೌಡ ಪಾಟೀಲ ಯಾವುದೇ ಸ್ಪಷ್ಟನೆ ನೀಡಿಲ್ಲ. ಸುಳ್ಳು ಹೇಳುತ್ತಿದ್ದಾರೆ. ಸ್ಪಷ್ಟನೆ ನೀಡಿದ ಬಗ್ಗೆ ಹಾಗೂ ಉಚ್ಛಾಟನೆ ಪತ್ರ ಕೂಡಾ ನನಗೆ ತಲುಪಿಲ್ಲ. ಮಾಧ್ಯಮಗಳಲ್ಲಿ ಉಚ್ಛಾಟನೆ ಬಗ್ಗೆ ಪ್ರಕಟಣೆ ನೀಡಿದ್ದು ಮಾತ್ರ ನನಗೆ ಗೊತ್ತು. ಇದು ವರೆಗೂ ನನಗೆ ಪತ್ರ ಬಂದಿಲ್ಲ. ಬಿಜೆಪಿ ಜಿಲ್ಲಾಧ್ಯಕ್ಷರು ನಾನು ಈ ಹಿಂದೆ ಹೇಳಿದ ಹುಳದ ಭಯ ಇದ್ದಂತೆ ಕಾಣುತ್ತಿದೆ. ಪಕ್ಷದ ವರಿಷ್ಠರಿಗೆ ನಾವು ಕೂಡಾ ಇಲ್ಲಿನ ಬೆಳವಣಿಗೆ ಬಗ್ಗೆ ತಿಳಿಸಿದ್ದೇವೆ. ಕಾದು ನೋಡಿ ಅಂತ ತಿಳಿಸಿದ್ದಾರೆ. ಹೀಗಾಗಿ ಸುಮ್ಮನಿದ್ದೇವೆ. ಪಕ್ಷದ ವರಿಷ್ಠರ ಸೂಚನೆ ಬಳಿಕ ಚುನಾವಣೆಗೆ ಸ್ಪಂದಿಸುವ ಕುರಿತು ಬಹಿರಂಗಗೊಳಿಸಲಾಗುವುದು ಎಂದರು.
ಯುವ ಮುಖಂಡ ಸಂತೋಷ ಹೊಕ್ರಾಣಿ ಮಾತನಾಡಿ, ಗುಜರಾತ್ ಮಾದರಿ ರಾಜ್ಯದಲ್ಲಿಯೂ ಅನ್ವಯವಾಗುವ ವಿಶ್ವಾಸವಿದೆ. ಗುಜರಾತ ಚುನಾವಣೆ ವೇಳೆ ಹೊಸಬರಿಗೆ ಟಿಕೆಟ್ ನೀಡಲಾಯಿತು. ಎಲ್ಲರು ಗೆದ್ದು ಬಂದರು. ಹೀಗಾಗಿ ಕರ್ನಾಟಕದಲ್ಲಿ ಇದೇ ಮಾದರಿ ಪಕ್ಷ ಅನುಸರಿಸುವ ಸಾಧ್ಯತೆ ಇದೆ ಎಂದು ಹೇಳಿದರು.
ಮುಖಂಡ ಅರುಣ ಲೋಕಾಪುರ ಸುದ್ದಿಗೋಷ್ಠಿಯಲ್ಲಿ ಇದ್ದರು.
