ಅನಧಿಕೃತ ಕೇಬಲ್​ ತೆರವಿಗೆ ಬೆಸ್ಕಾಂ ಸೂಚನೆ; ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮದ ಎಚ್ಚರಿಕೆ

ಬೆಂಗಳೂರು: ಬೆಸ್ಕಾಂ ವ್ಯಾಪ್ತಿಯ ವಿದ್ಯುತ್​ ಕಂಬಗಳಲ್ಲಿ ಅಳವಡಿಸಿರುವ ಅನಧಿಕೃತ ಒಎಫ್​ಸಿ ಕೇಬಲ್​, ಡೇಟಾ ಕೇಬಲ್​ ಹಾಗೂ ಡಿಶ್​ ಕೇಬಲ್​ಗಳನ್ನು 8ರೊಳಗಾಗಿ ತೆರವುಗೊಳಿಸಲು ಇಂಟರ್​ನೆಟ್​ ಸೇವಾ ಕಂಪನಿಗಳು ಹಾಗೂ ಟಿವಿ ಕೇಬಲ್​ ಆಪರೇಟರ್​ಗಳಿಗೆ ಬೆಸ್ಕಾಂ ಸೂಚಿಸಿದೆ.

ಸಂಬಂಧಪಟ್ಟವರು ಅನಧಿಕೃತವಾಗಿ ಅಳವಡಿಸಿರುವ ಕೇಬಲ್​ಗಳನ್ನು ತೆರವುಗೊಳಿಸದಿದ್ದರೆ, ಬೆಸ್ಕಾಂ ಅವುಗಳನ್ನು ಯಾವುದೇ ಮುನ್ಸೂಚನೆ ನೀಡದೆ ತೆರವುಗೊಳಿಸಲಿದೆ. ಬಳಿಕ ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಿದೆ. ಅನಧಿಕೃತ ಕೇಬಲ್​ಗಳಿಂದ ವಿದ್ಯುತ್​ ಅವಡಗಳು ಸಂಭವಿಸಿದ್ದಲ್ಲಿ ಸಂಬಂಧಿಸಿದವರನ್ನೇ ನೇರ ಹೊಣೆಗಾರರಾಗುತ್ತಾರೆ ಎಂದು ಎಚ್ಚರಿಸಿದೆ.

ಬೆಸ್ಕಾಂ ಕಳೆದ ವರ್ಷ ಆಗಸ್ಟ್​ನಲ್ಲಿ ವಿದ್ಯುತ್​ ಕಂಬಗಳಲ್ಲಿ ಅಳವಡಿಸಿರುವ ಅನಧಿಕೃತ ಕೇಬಲ್​ ತೆರವು ಸಂಬಂಧ ವಿಶೇಷ ಕಾರ್ಯಾಚರಣೆ ಕೈಗೊಂಡಿತ್ತು. ಅನಧಿಕೃತ ಕೇಬಲ್​ ತೆರವಿಗೆ ಒಂದು ವಾರ ಗಡುವು ನೀಡಿತ್ತು. ಈ ವಿಶೇಷ ಕಾರ್ಯಾಚರಣೆ ಹೊರತಾಗಿಯೂ ಅನಧಿಕೃತ ಕೇಬಲ್​ಗಳನ್ನು ವಿದ್ಯುತ್​ ಕಂಬಗಳ ಮೇಲೆ ಅಳವಡಿಸಲಾಗುತ್ತಿದೆ ಆದ್ದರಿಂದ ಬೆಸ್ಕಾಂ ಮತ್ತೆ ಈ ಗಡುವು ನೀಡಿದೆ.