ಗ್ರಾಮ ಲೆಕ್ಕಾಧಿಕಾರಿ, ಸಹಾಯಕ ಲೋಕಾ ಬಲೆಗೆ

ಹೋಬಳಿಯ ಕೆಂಚನಕುಪ್ಪೆ ವೃತ್ತ ಮತ್ತು ಮಾಯಗಾನಹಳ್ಳಿ ವೃತ್ತದ (ಪ್ರಭಾರ) ಗ್ರಾಮ ಲೆಕ್ಕಾಧಿಕಾರಿ ಚೇತನ್​ ಎಸ್​.ವಿ. ಹಾಗೂ ಮಾಯಗಾನಹಳ್ಳಿ ಗ್ರಾಪಂನ ಗ್ರಾಮ ಸಹಾಯಕ ವೆಂಕಟರಮಣ ಸ್ವಾಮಿ ಬಂಧಿತರು.

ಶಾಂತಕುಮಾರ್​ ಎಂಬುವವರು ಮಾಯಗನಹಳ್ಳಿ ಬಳಿಯ ವಸತಿ ಶಾಲೆಯ ಪಕ್ಕದಲ್ಲಿ ಜಮೀನು ಹೊಂದಿದ್ದರು. ಮಳೆಯಿಂದ ಜಮೀನಿನ ಮಣ್ಣು ಕೊಚ್ಚಿ ಹೋಗಿದ್ದರಿಂದ ಸ್ಪಲ್ಪ ದೂರದಲ್ಲಿದ್ದ ಕೆರೆಯಿಂದ ಜೆಸಿಬಿ ಬಳಸಿ ಲಾರಿಗಳ ಮೂಲಕ ಮಣ್ಣನ್ನು ಜಮೀನಿಗೆ ಸಾಗಿಸುತ್ತಿದ್ದರು. ಈ ವೇಳೆ ಗ್ರಾಮ ಲೆಕ್ಕಾಧಿಕಾರಿ ಚೇತನ್​ ಹಾಗೂ ಗ್ರಾಮ ಸಹಾಯಕ ವೆಂಕಟರಮಣ ಸ್ಥಳಕ್ಕೆ ಬಂದು ಮಣ್ಣು ಹೊಡೆಯದಂತೆ ತಡೆದರು. ಇದನ್ನು ವಿಡಿಯೋ ಮಾಡಿದ್ದ ಚೇತನ್​ ದೃಶ್ಯಗಳನ್ನು ಶಾಂತಕುಮಾರ್​ಗೆ ಕಳುಹಿಸಿ 7 ಸಾವಿರ ರೂ.ಗೆ ಬೇಡಿಕೆ ಇಟ್ಟಿದ್ದರು.

ಈ ಪೈಕಿ ಮುಂಗಡವಾಗಿ 2 ಸಾವಿರ ರೂ.ಅನ್ನು ಫೋನ್​ಪೇ ಮೂಲಕ ಪಡೆದಿದ್ದು, ಬಾಕಿ ಹಣ ವಸೂಲಿಗೆ ಗ್ರಾಮ ಸಹಾಯಕನನ್ನು ಶಾಂತಕುಮಾರ್​ ಬಳಿ ಕಳುಹಿಸಿದ್ದ. ಈ ಬಗ್ಗೆ ಶಾಂತಕುಮಾರ್​ ಲೋಕಾಯುಕ್ತಕ್ಕೆ ದೂರು ನೀಡಿದ್ದರು. ದೂರಿನ ಹಿನ್ನೆಲೆಯಲ್ಲಿ ಭಾನುವಾರ ಮಾಯಗಾನಹಳ್ಳಿಯಲ್ಲಿ ಗ್ರಾಮ ಸಹಾಯಕ ವೆಂಕಟರಮಣ ಬಾಕಿ 5 ಸಾವಿರ ರೂ. ಸ್ವೀಕರಿಸುತ್ತಿದ್ದ ವೇಳೆ ಸಿಕ್ಕಿಬಿದ್ದಿದ್ದಾನೆ. ಇದಾದನಂತರ ಲಂಚದ ಸೂತ್ರಧಾರ ಚೇತನ್​ನನ್ನು ಬಂಧಿಸಲಾಗಿದೆ ಎಂದು ಲೋಕಾಯುಕ್ತ ಪೊಲೀಸರು ತಿಳಿಸಿದ್ದಾರೆ. ಲೋಕಾಯುಕ್ತ ಎಸ್​ಪಿ ಪಿ.ವಿ.ಸ್ನೇಹಾ ಮಾರ್ಗದರ್ಶನ, ಡಿವೈಎಸ್ಪಿ ಶಿವಪ್ರಸಾದ್​ ಮೇಲ್ವಿಚಾರಣೆಯಲ್ಲಿ ಸಿಪಿಐಗಳಾದ ಶ್ರೀಕುಮಾರ್​ ಎಂ., ಮತ್ತು ಸಂದೀಪ್​ ಕುಮಾರ್​ ಬಿ.ಎನ್​. ನೇತೃತ್ವದ ತಂಡ ಕಾರ್ಯಾಚರಣೆ ನಡೆಸಿತ್ತು.