9 ವರ್ಷದಿಂದ ಈ ತಾಯಿಗೆ ಶಿಥಿಲ ಸಮುದಾಯ ಭವನವೇ ಆಸರೆ!

ಮಾಗಡಿ ತಾಲೂಕು ಸೋಲೂರು ಹೋಬಳಿ ಉಡುಕುಂಟೆ ಗ್ರಾಮದ ಲಕ್ಷ್ಮಮ್ಮ(66)ಅವರೇ ಆ ನತದೃಷ್ಟೆ. ಅವರಿಗೆ ಈ ಹಿಂದೆ ಇದ್ದ ಅಲ್ಪಸ್ವಲ್ಪ ಆಸರೆಯೂ ಪತಿಯ ಮರಣದ ನಂತರ ಮರೀಚಿಕೆಯಾಗಿದೆ. ವಾಸವಿದ್ದ ಹಳೇ ಮನೆ ಕುಸಿದು ಬಿದ್ದಿದೆ. ಆ ಕ್ಷಣದಲ್ಲಿ ಬೀದಿಗೆ ಬಂದ ಲಕ್ಷ್ಮಮ್ಮ ಅಂತಿಮವಾಗಿ ಪಾಳು ಬಿದ್ದ ಸಮುದಾಯ ಭವನದ ಮೊರೆ ಹೋಗಿದ್ದಾರೆ. ಅಲ್ಲಿ ಅವರು ಆಶ್ರಯ ಪಡೆದು ಬರೋಬ್ಬರಿ 9 ವರ್ಷ ಕಳೆದಿದ್ದರೂ ಇವರ ಬದುಕಿಗೆ ದಾರಿ ತೋರಿಸಿದವರಿಲ್ಲ.

ನಿವೇಶನವಾಗಲೀ, ಅಥವಾ ವಸತಿ ಯೋಜನೆಯ ಮನೆಯಾಗಲೀ ಅವರಿಗೆ ಸಿಕ್ಕಿಲ್ಲ. ಇದ್ದೊಬ್ಬ ಮಗನೂ ಮಾನಸಿಕ ಅಸ್ವಸ್ಥ. ಹಳೆಯ ಮನೆ ಜಾಗದಲ್ಲಿ ಹೊಸ ಮನೆ ಕಟ್ಟಿಕೊಳ್ಳಲು ಶಕ್ತಿಯಿಲ್ಲ, ಹೀಗಾಗಿ ಇಲ್ಲಿಯೇ ಬಿದ್ದಿದ್ದೇನೆ’ ಎಂದು ಲಕ್ಷ್ಮಮ್ಮ ಅಳುತ್ತಾರೆ. ಅವರು ಆಶ್ರಯ ಪಡೆದಿರುವ ಸಮುದಾಯ ಭವನದ ಸ್ಥಿತಿ ಸಹ ಹದಗೆಟ್ಟಿದ್ದು, ಮಳೆ ಬಂದರೆ ಸೋರುತ್ತದೆ. ಅಪಾಯಕಾರಿ ಕಟ್ಟಡದಲ್ಲಿಯೇ ಜೀವ ಕೈಯಲ್ಲಿ ಹಿಡಿದು ಆಕೆ ವಾಸಿಸುವಂತಾಗಿದೆ.