ಸಾಲ ಕೊಟ್ಟಿದ್ದ ಮಹಿಳೆಯನ್ನೇ ಕೊಂದರು!

ರಾಮನಗರ ತಾಲೂಕು ಸಂಗಬಸವನದೊಡ್ಡಿಯ ಗಿರಿಜಾ (36) ಮತ್ತು ಮಹೇಶ (42) ಬಂಧಿತರು.

ಗ್ರಾಮದ ಸುಶೀಲಮ್ಮ ಕೊಲೆಯಾದವರು.

ಸುಶೀಲಮ್ಮ ಅವರು ಗಿರಿಜಾಗೆ 20 ಸಾವಿರ ರೂ ಸಾಲ ನೀಡಿದ್ದರು. ಇದರ ಬಡ್ಡಿ ಆಗಾಗ್ಗೆ ತೆರಳಿ ಪಡೆದುಕೊಂಡು ಬರುತ್ತಿದ್ದರು. ಆದರೆ, ಜೂ.15ರ ಮಧ್ಯಾಹ್ನ ಮನೆಯಿಂದ ತೆರಳಿದ್ದ ಸುಶೀಲಮ್ಮ ನಂತರ ನಾಪತ್ತೆ ಆಗಿದ್ದರು. ಈ ಸಂಬಂಧ ಸುಶೀಲಮ್ಮ ಪುತ್ರ ಮಹದೇವಯ್ಯ ರಾಮನಗರ ಮಹಿಳಾ ಠಾಣೆಯಲ್ಲಿ ನಾಪತ್ತೆ ಪ್ರಕರಣ ದಾಖಲಿಸಿದ್ದರು. ಆದರೆ, ಜೂ.21ರಂದು ತಮ್ಮ ಮನೆಯ ಹಿಂದೆಯೇ ಹಾದು ಹೋಗಿರುವ ರೈಲ್ವೆ ಹಳಿ ಮೇಲೆ ಸುಶೀಲಮ್ಮ ಅವರ ಮೃತದೇಹ ಕೊಳತೆ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು.

ಈಕೆಯ ಮೈಮೇಲಿದ್ದ ಒಡವೆಗಳು ಇಲ್ಲದಿರುವುದನ್ನು ಗಮನಿಸಿದ್ದ ಮಹದೇವಯ್ಯ ತಮ್ಮ ತಾಯಿಯನ್ನು ಕೊಲೆ ಮಾಡಲಾಗಿದೆ. ಗ್ರಾಮದ ಗಿರಿಜಾ ಅವರೇ ಈ ಕೃತ್ಯ ನಡೆಸಿದ್ದಾರೆ ಎಂದು ಅನುಮಾನ ವ್ಯಕ್ತಪಡಿಸಿ ರಾಮನಗರ ಗ್ರಾಮಾಂತರ ಪೊಲೀಸರಿಗೆ ದೂರು ನೀಡಿದ್ದರು. ದೂರುದಾರರ ಸುಳಿವಿನ ಮೇರೆಗೆ ಗಿರಿಜಾ ಮತ್ತು ಮಹೇಶ್​ ಇಬ್ಬರೂ ಬಂಧಿಸಿ ವಿಚಾರಣೆಗೆ ಒಳಪಡಿಸಿದಾಗ ಕೊಲೆ ಆಗಿರುವುದು ತಿಳಿದು ಬಂದಿದೆ. ಗ್ರಾಮಾಂತರ ಸಿಪಿಐ ಮುರಳಿ ನೇತೃತ್ವದಲ್ಲಿ ತನಿಖೆ ನಡೆಸಿದ್ದು, ಪಿಎಸ್​ಐ ಸಿದ್ದರಾಜು, ನರಸಿಂಹಯ್ಯ, ಅರ್ಜುನ್​ ಸಿಬ್ಬಂದಿ ಸುಜಾತಾ, ಗಿರಿಯಮ್ಮ, ವೀಣಾ, ರವಿ, ಲತಾ, ಸುನೀತ ಭಾಗವಹಿಸಿದ್ದರು.

ಬಂಧಿತ ಆರೋಪಿಗಳಿಬ್ಬರೂ ಹಣ ಕೇಳಲು ಬಂದ ಸುಶೀಲಮ್ಮ ಅವರನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿ ಆಕೆಯ ಮೈಮೇಲೆ ಇದ್ದ ಓಲೆಗಳು, ಮಾಂಗಲ್ಯ ಸರ ಕಸಿದುಕೊಂಡಿದ್ದರು. ನಂತರ ರಾಮನಗರದ ಒಡವೆ ಅಂಗಡಿಯೊಂದರಲ್ಲಿ ಮಾರಾಟ ಮಾಡಿ, ನಂತರ ಹೊಸ ಒಡವೆಗಳನ್ನು ಗಿರಿವಿ ಸಹ ಇಟ್ಟಿದ್ದಾರೆ. ಗಿರವಿ ಇಟ್ಟಿದ್ದ 9.26 ಗ್ರಾಂ ತೂಕದ ಓಲೆಗಳು 29.93 ಗ್ರಾಂ ತೂಕದ ಚಿನ್ನದ ಸರ ಮತ್ತು ಪಾಟ್​ ಒಂದರಲ್ಲಿ ಉದುಗಿಸಿಟ್ಟಿದ್ದ ಸುಶೀಲಮ್ಮ ಅವರ ಮಾಂಗಲ್ಯವನ್ನು ವಶಪಡಿಸಿಕೊಳ್ಳಲಾಗಿದೆ