ಪೂರ್ವಿಕರ ಕಾಲದಿಂದ ಮಾಗಡಿ ಭಾಗದಲ್ಲಿ ರಾಗಿಯೊಂದಿಗೆ ಸೊಗಡಿನ ಅವರೆಕಾಯಿ ಬೆಳೆಯುವುದು ವಾಡಿಕೆ. ಮುಖ್ಯವಾಗಿ ತಾಲೂಕಿನಲ್ಲಿ ಚಿನಿಗಲ ಅವರೆ, ದೆಬ್ಬೆ ಅವರೆ, ನಂತರ ಗದ್ದೆ ಬಯಲಿನಲ್ಲಿ ಮೂರು ತಿಂಗಳ ಅವರೆ ಬೆಳೆಯಲಾಗುವುದು. ಇಲ್ಲಿನ ಸ್ಥಳಿಯ ಸೊಗಡಿನ ಅವರೆಕಾಯಿ ವಾಸನೆ, ರುಚಿ ಬೇರೆ ಅವರೆಕಾಯಿಗಿಂದ ವಿಶೇಷ. ಇದೇ ಕಾರಣದಿಂದ ಬೆಂಗಳೂರು ದಣ ರಾಮನಗರ ಜಿಲ್ಲೆ ಅಷ್ಟೇ ಅಲ್ಲದೆ ಬೆಂಗಳೂರು, ತುಮಕೂರು, ಹಾಸನ ಜಿಲ್ಲೆಗಳಲ್ಲಿ ಮಾಗಡಿ ಅವರೆಗೆ ಬೇಡಿಕೆ ಇದೆ. ಸಾಮಾನ್ಯವಾಗಿ ನವೆಂಬರ್ನಿಂದ ಪ್ರಾರಂಭವಾಗಿ ಜ.15ರವರೆಗೆ ಮಾಗಡಿ ಸೊಗಡಿನ ಅವರೆಕಾಯಿ ಮಾರುಕಟ್ಟೆಗೆ ಲಗ್ಗೆ ಇಡುತ್ತದೆ. ಆದರೆ ಇತ್ತೀಚೆಗೆ ಅವರೆ ಬೆಳೆಯುವರ ಸಂಖ್ಯೆ ಕಡಿಮೆಯಾಗುತ್ತಿರುವ ಕಾರಣ ಬೇಡಿಕೆಯಂತೆ ಮಾರುಕಟ್ಟೆಗೆ ಆವಕ ಪೂರೈಕೆಯಾಗುತ್ತಿಲ್ಲ. ಪರಿಣಾಮ ಬೆಲೆ ಗಗನಕ್ಕೇರಿದೆ.
