ಸಾರ್ವಜನಿಕರ ಸ್ಥಳಗಳಲ್ಲಿ ವಾಚನಾಲಯ

ಹೌದು..., ವಾಚನಾಲಯ ಸ್ಥಾಪನೆ ಮೂಲಕ ನಗರಸಭೆ ಹೊಸ ಹೆಜ್ಜೆ ಇಟ್ಟಿದೆ. ವಿಹಾರಿಗಳು, ಪ್ರಯಾಣಿಕರು, ಹಿರಿಯ ನಾಗರಿಕರು ಮತ್ತು ಯುವಕರಲ್ಲಿ ಜ್ಞಾನಾರ್ಜನೆ ಹೆಚ್ಚಿಸುವುದು ಹಾಗೂ ಡಿಜಿಟಲ್​ ಜಗತ್ತಿನ ನಡುವೆಯೂ ಪತ್ರಿಕೋದ್ಯಮವನ್ನು ಜೀವಂತವಾಗಿಡುವುದು ನಗರಸಭೆ ಉದ್ದೇಶ. ಜು.2ರಂದು ಬೆಳಗ್ಗೆ 6 ಗಂಟೆಗೆ ನಗರಸಭೆ ಅಧ್ಯಕ್ಷ ಕೆ. ಶೇಷಾದ್ರಿ ನಗರದ ಎಲ್ಲ ಉದ್ಯಾನವನಗಳು ಮತ್ತು ಬಸ್​ ನಿಲ್ದಾಣಗಳಿಗೆ ಭೇಟಿ ನೀಡಿ ದಿನಪತ್ರಿಕೆ ಓದುಗರ ವಾಚನಾಲಯಕ್ಕೆ ಚಾಲನೆ ನೀಡಲಿದ್ದಾರೆ. ಆಯುಕ್ತ ಡಾ.ಜಯಣ್ಣ, ಉಪಾಧ್ಯೆ ಗಿರಿಜಮ್ಮ ಗುರುವೇಗೌಡ ಸೇರಿ ಸದಸ್ಯರೂ, ಅಧಿಕಾರಿಗಳು ಹಾಜರಿರಲಿದ್ದಾರೆ ಎಂದು ನಗರಸಭೆ ಎಇಇ ಸುಬ್ರಹ್ಮಣ್ಯ ತಿಳಿಸಿದ್ದಾರೆ.

ವಾಚನಾಲಯ ಸ್ಥಳದಲ್ಲಿ ವಿಜಯವಾಣಿ ಸೇರಿ 5 ರಾಜ್ಯ ಕನ್ನಡ ದಿನಪತ್ರಿಕೆಗಳು, 5 ಸ್ಥಳಿಯ ದಿನಪತ್ರಿಕೆಗಳು ಇರಲಿವೆ. ಓದುಗರು ತಾವು ಓದಿದ ಪತ್ರಿಕೆಯನ್ನು ಪುನ@ ನಿಗದಿತ ಸ್ಥಳದಲ್ಲೆ ಇಡಲು ಕಬ್ಬಿಣದ ರ್ಯಾಕ್​ ಮಾಡಿಸಿ ಪತ್ರಿಕೆ ಜೋಡಣೆಗೆ ಆಯಾ ಸ್ಥಳಗಳಲ್ಲಿ ಅನುಕೂಲ ಕಲ್ಪಿಸಲಾಗಿದೆ. ಪ್ರಯಾಣಿಕರ ಬಿಡುವಿನ ವೇಳೆ ಸದ್ಬಳಕೆ: ಬಸ್​ ನಿಲ್ದಾಣಕ್ಕೆ ನಿತ್ಯ ವಿದ್ಯಾರ್ಥಿಗಳು, ಉದ್ಯೋಗಿಗಳು ಸೇರಿ ಸಾವಿರಾರು ಮಂದಿ ಆಗಮಿಸುತ್ತಾರೆ.

ನಗರದ ಐಜೂರು ಕುವೆಂಪು ಉದ್ಯಾನವನ, ವಿನಾಯಕನಗರ ಉದ್ಯಾನವನ, ಕೋರ್ಟ್​ರಸ್ತೆ ಗಾಂಧಿ ಪಾರ್ಕ್​, ರಂಗರಾಯರದೊಡ್ಡಿ ಕೆರೆ ಉದ್ಯಾನವನ, ನಾಗನಕಟ್ಟೆ ಉದ್ಯಾನವನ, ಐಜೂರು ವಾಟರ್​ ಟ್ಯಾಂಕ್​ ಉದ್ಯಾನವನ, ಬಾಲಾಜಿ ಲೇಔಟ್​ ಉದ್ಯಾನವನ, ಕೆಎಸ್​ಆರ್​ಟಿಸಿ ಬಸ್​ ನಿಲ್ದಾಣದ ಸಿಗ್ನಲ್​ ಬಳಿ, ದ್ಯಾವರೇಸವಡನದೊಡ್ಡಿ ರಸ್ತೆ ಆರ್ಚ್​ ಸಮೀಪ, ಎಸ್​ಪಿ ಕಚೇರಿ ಮುಂಭಾಗದ ಬಸ್​ ನಿಲ್ದಾಣ, ಕಂದಾಯ ಭವನದ ಬಸ್​ ನಿಲ್ದಾಣ, ಗೌಸಿಯಾ ಕಾಲೇಜು ಬಸ್​ ನಿಲ್ದಾಣದ ಬಳಿ ಸ್ಥಾಪಿಸಲಾಗಿದೆ.

ಕೆಂಗಲ್​ ಹನುಮಂತಯ್ಯ ವೃತ್ತ, ಹಳೇ ಬಸ್​ ನಿಲ್ದಾಣ, ಕಾಮಣ್ಣನಗುಡಿ ಸರ್ಕಲ್​, ಎಪಿಎಂಸಿ ಮಾರುಕಟ್ಟೆ, ಕೆಂಪೇಗೌಡ ಸರ್ಕಲ್​, ರೋಟರಿ ಸರ್ಕಲ್​, ರಾಯರದೊಡ್ಡಿ ಸರ್ಕಲ್​, ವಿಜಯನಗರ ಆರ್ಚ್​ ಬಳಿ ಓದುಗರ ವಾಚನಾಲಯ ಸ್ಥಾಪನೆಗೆ ಸಾರ್ವಜನಿಕರು ಮನವಿ ಮಾಡಿದ್ದಾರೆ.

"

ಪ್ರತಿ ಬಜೆಟ್​ ಪೂರ್ವಭಾವಿ ಸಭೆಯಲ್ಲಿ ಉದ್ಯಾನವನ, ಬಸ್​ ನಿಲ್ದಾಣ, ಸಮುದಾಯ ಭವನಗಳಲ್ಲಿ ಓದುಗರಿಗೆ ದಿನಪತ್ರಿಕೆ ಒದಗಿಸುವಂತೆ ನಗರಸಭೆಗೆ ಸಾರ್ವಜನಿಕರು ಮನವಿ ಮಾಡುತ್ತಲೇ ಬಂದಿದ್ದರು. ಜನರ ಮನವಿ ಮೇರೆಗೆ ಈ ಬಾರಿಯ ಬಜೆಟ್​ನಲ್ಲಿ 2 ಲಕ್ಷ ರೂ. ಅನುದಾನ ಮೀಸಲಿಟ್ಟು, ವಾಚನಾಲಯ ನಿರ್ಮಾಣಕ್ಕೆ ಕ್ರಮ ಕೈಗೊಳ್ಳಲಾಗಿದೆ. ನಗರ ವ್ಯಾಪ್ತಿಯ ವಿವಿಧ ಸ್ಥಳಗಳಲ್ಲಿ ಜು.2ರಂದು ವಾಚನಾಲಯ ಪ್ರಾರಂಭಿಸಲಾಗುತ್ತಿದೆ.

— > ಡಾ.ಜಯಣ್ಣ, ಆಯುಕ್ತರು, ನಗರಸಭೆ, ರಾಮನಗರ.